12-Jun-2023

ବିନିକା(ହିମାଂଶୁ ଶେଖର ପୁଟେଲ): ଗତ କିଛିଦିନ ହେଲା ସୂର୍ଯ୍ୟଙ୍କ ତେଜସ୍ଵୀ ରଶ୍ମିରେ ସାରା ବିନିକା ଅଞ୍ଚଳ ନିଆଁରେ ଜଳୁଛି ।ତାପମାତ୍ରା ୪୫ଡିଗ୍ରୀ ପାଖାପାଖି ରହୁଥିବା ବେଳେ ଜୀବନ ଦୁର୍ବିସହ ହୋଇପଡ଼ିଛି।ଏଭଳି ପରିସ୍ଥିତିରେ ଚାଷଜମିର ପାଳକୁ ପୋଡେଇବା ପାଇଁ କେତେକ ଦୁର୍ବୃତ୍ତ ନିଆଁ ଲଗାଇ ଦେଉଥିବାରୁ ତାପମାତ୍ରା ଆହୁରି ବୃଦ୍ଧି ପାଇବା ସହିତ ହୁର୍ ହୂର ପବନରେ ସେହି ନିଆଁ ସମସ୍ତଙ୍କ ପାଇଁ ଭୟର

ବାତାବରଣ ଖେଲେଇଦେଇଛି  । ସୋସିଆଲ ମିଡ଼ିଆ ହେଉ ଅବା ସଚେତନ ନାଗରିକଙ୍କ ତରଫରୁ କ୍ଷେତରେ ନିଆଁ ନ ଲଗାଇବାକୁ ବାର୍ତା ପ୍ରଦାନ କରାଯାଉଥିଲେ ମଧ୍ୟ କେହି ମାନୁ ନାହାନ୍ତି ।ଫଳରେ ସୂର୍ଯ୍ୟଙ୍କ ତେଜସ୍ଵୀ କିରଣ ସାଙ୍ଗକୁ ନିଆଁର ପ୍ରକୋପ ବିପଦ ସାଜୁଛି ।ଯାର ଜ୍ୱଳନ୍ତ ଉଦାହରଣ ଆଜି ଦେଖିବାକୁ ମିଳିଛି ସମ୍ପ୍ରତି ବିନିକା ଅଞ୍ଚଳରେ ।ଚାଷଜମିର ନିଆଁ ଗାଁ ମୁହାଁ ହୋଇ ଏକ ଗାଈ ଗୁହାଳରେ ଲାଗିଯିବାରୁ ସେଠାରେ ବନ୍ଧା ହୋଇଥିବା ୧୧  ଗାଈ ମଧ୍ୟରୁ ୮ଟି ଗୋରୁ ଜୀବନ୍ତ ଦଗ୍ଧ

ଓ ୩ଗାଈ ଗୁରୁତର ଅବସ୍ଥାରେ ଉଦ୍ଧାର ହୋଇଥିବା ଭଳି ଏକ ଅଭାବନୀୟ ଘଟଣା ଘଟିଛି।ଖବର ନେବାରୁ ଜଣାପଡିଛି ଯେ ସୋମବାର ବିନିକା ବ୍ଲକ ବାବୁପାଳି ପଞ୍ଚାୟତ ପଲସାପାଲି ଗ୍ରାମର ଚାଷଜମିରେ ଜଳୁଥିବା ନିଆଁ ପବନ ଯୋଗୁଁ ଏ କ୍ଷେତରୁ ସେ କ୍ଷେତ ହୋଇ ଗାଁ ମୁହାଁ ହୋଇ ଅଚାନକ ଭାବରେ ଗାଁ ର ସୁଦର୍ଶନ ମେଲ୍ଲି(ଚୈତନ୍ୟ) ଓ କୃପା ମେଲ୍ଲିଙ୍କ ଗୁହାଳରେ ନିଆଁ ଲାଗି ଯାଇଥିଲା।ଫଳରେ ସେଠାରେ ବନ୍ଧା ହୋଇଥିବା ୧୧ଗାଈ ମଧ୍ୟରୁ ୮ଗାଈ ନିଆଁରେ ଜୀବନ୍ତ ଦଗ୍ଧ ହୋଇଥିବା ବେଳେ ୩ଗାଈ ଗୁରୁତର ଅବସ୍ଥାରେ ଉଦ୍ଧାର କରାଯାଇଛି ।ନିଆଁ ର ପ୍ରକୋପ ଏମିତି ଥିଲା ଯେ ଲୋକେ ନିଜ ଜୀବନକୁ ବାଜି ଲଗାଇ ଲିଭାଇବାକୁ ଚେଷ୍ଟା କରି କିଛିମାତ୍ରାରେ ସଫଳ ହୋଇଥିଲେ ।ପରେ ଖବର ପାଇ ରାମପୁର ଦମକଳ ବାହିନୀ ଘଟଣାସ୍ଥଳରେ ପହଞ୍ଚି ଗ୍ରାମବାସୀଙ୍କ ସହାୟତାରେ ନିଆଁକୁ ଆୟତ୍ତ କରିଥିଲେ ।ନିଆଁରେ ୮ଗାଈ ଙ୍କ ମୃତ୍ୟୁ ହୋଇଥିବା ବେଳେ ୩ଗାଈ ଗୁରୁତର ଏବଂ ୪୦ପ୍ୟାକେଟ ଧାନ ନଷ୍ଟ ହେବା ସହ ୪ବଖରା ଘର ଧ୍ବଂସ ହୋଇଯାଇଥିବା ଜଣାପଡ଼ିଛି ।ତେବେ ଚୈତନ୍ୟ  ଓ କୃପା ଉଭୟେ ଗରିବ ପରିବାର ହୋଇଥିବାରୁ ସରକାରୀ ସହାୟତା ଯୋଗାଇ ଦେବାକୁ ଦାବୀ ହେଉଛି ।