07-Dec-2020

ବଲାଙ୍ଗିର, (ସନ୍ତୋଷ କୁମାର ଠାକୁର)- ବଳିଷ୍ଠ ବାର୍ତ୍ତା ବହନ କରୁଥିବା ଦୁଇଟି କ୍ଷୁଦ୍ର ଚଳଚିତ୍ର ଦହନ ଓ ଅଂଶୁବର୍ଣ୍ଣି ସ୍ଥାନୀୟ ଆଇନ ମହାବିଦ୍ୟାଳୟ ପରିସରରେ ପ୍ରଦର୍ଶିତ ହୋଇଯାଇଛି । ଏକ ଦୁର୍ଘଟଣାରେ ଜଣେ ଶିଶୁର ମୃତ୍ୟୁ ହୁଏ । କିନ୍ତୁ ମୃତ୍ୟୁ ପୂର୍ବରୁ ଶିଶୁ ଟି ଚକ୍ଷୁଦାନ କରିବା ପାଇଁ ଇଛା ପ୍ରକାଶ କରେ । ଶିଶୁ ଟିର ଶେଷ ଇଛା ଅନୁଯାୟୀ ତାର ଚକ୍ଷୁ ଅନ୍ୟ ଏକ ଶିଶୁ ଦେହରେ ରୋପଣ କରାଯାଏ । ଶିଶୁ ଟିଏ ହେଲେ ମଧ୍ୟ ଚକ୍ଷୁଦାନ କରି ଯେଉଁ ମହାନ ବାର୍ତ୍ତା ଦେଇଗଲା ତାକୁ ଅତି ସୁନ୍ଦର ଭାବରେ ଅଂଶୁବର୍ଣ୍ଣିରେ ଦର୍ଶାଯାଇଛି । ସେହିପରି ଦହନ ଚଳଚିତ୍ରରେ  ଏକ ଦିବ୍ୟାଙ୍ଗ ଶିଶୁର ବେଦନାକୁ ଦର୍ଶାଯାଇଛି । ଦିବ୍ୟାଙ୍ଗ ହୋଇଥିବା ଯୋଗୁଁ ତାର ଭିତରେ କିଭଳି ଅନ୍ତର୍ଦାହ ରହିଛି ତାହାକୁ ଦର୍ଶାଯାଇଛି । ଉଭୟ ଚଳଚିତ୍ରର ଉଦ୍‌ଘାଟନୀ ଅବସରରେ ଅନୁଷ୍ଠିତ ହୋଇଥିବା ପ୍ରିମିୟରେ ସୋରେ ଉପସ୍ଥିତ ଥିବା ଦର୍ଶକମାନେ ସ୍ତମ୍ଭିଭୂତ ହୋଇ ଯାଇଥିଲେ । ବିଶେଷ କରି ଉଭୟ ଚଳଚିତ୍ରରେ ଅଭିନୟ କରିଥିବା ଶିଶୁ କଳାକାରମାନଙ୍କ ଅଭିନୟ ଅତ୍ୟନ୍ତ ଜୀବନ୍ତ ଓ ନିଖୁଣ ଥିଲା । ଏହି ଉଭୟ ଚଳଚିତ୍ରର କାହାଣୀ ରଚନା କରିବା ସଙ୍ଗେ ନିର୍ଦ୍ଧେଶନା ଦେଇଛନ୍ତି ଉଗ୍ରସେନ ଷଡଙ୍ଗୀ । ଚଳଚିତ୍ରର ବିଭିନ୍ନ ଚରିତ୍ରରେ ଅଭିନୟ କରିଛନ୍ତି ପ୍ରଖ୍ୟାତ ମଂଚ ନିର୍ଦ୍ଧେଶକ ଭାସ୍କର ମେହେଟା , ଚିତ୍ତ ରଞ୍ଜନ ଦାଶ , ପ୍ରହଲ୍ଲାଦ ଦର୍ଜି , ଧିରାଜ ବେଜ , ଡା.ବିଛିନ୍ଦ ପ୍ରଧାନ , ଶ୍ରୀରାଧା ଆଚାର୍ଯ୍ୟ , ଚାନ୍ଦନୀ ମେହେର , ଚନ୍ଦ୍ରମା ହୋତା , ମିଲି ବାରିକ , ସାହିଲ ଷଡଙ୍ଗୀ , ନିୟୋଜିତା ଶାକମ୍ବରୀ ଷଡଙ୍ଗୀ , ସ୍ୱର୍ଣ୍ଣୀମ ଓ ନୀଳେନ୍ଦ୍ରୀ । ଚଳଚିତ୍ରରେ ଚିତ୍ର ଉତ୍ତୋଳନ ପ୍ରକାଶ ଷଡଙ୍ଗୀ କରିଥିବା ବେଳେ ରୂପସଜ୍ୱା କରିଛନ୍ତି ମନୋରଞ୍ଜନ ବେହେରା , ସଙ୍ଗୀତ ଦେଇଛନ୍ତି ମୂରଲୀଧାରୀ ପତି ଓ ଶ୍ରୀକାନ୍ତ ଦାଶ (ଗିଟୁ) ତଥା ସମ୍ପାଦନା କରିଛନ୍ତି ସଂଗ୍ରାମ କେଶରୀ ନାଏକ ଓ ଟି.ଲମ୍ବୋଦର । ଏହି ଅବସରରେ ଅନୁଷ୍ଠିତ ହୋଇଥିବା ଉଦ୍‌ଘାଟନୀ ସଭାରେ ମୁଖ୍ୟ ଅତିଥି ଭାବେ ଯୋଗଦେଇ ବିଶିଷ୍ଟ ସମାଜସେବୀ ତଥା ଚଳଚିତ୍ର ନିର୍ମାତା ଶ୍ରୀକର ମିଶ୍ର କହିଥିଲେ ଯେ , ଆମ ଅଂଚଳରେ ଅତ୍ୟନ୍ତ ଉଚ୍ଚକୋଟୀର କଳାକାର ରହିଛନ୍ତି । ସେମାନଙ୍କୁ କେବଳ ପ୍ରୋତ୍ସାହନ ଯୋଗାଇ ଦେବାର ଆବଷ୍ୟକତା ରହିଛି । ଭବିଷ୍ୟତରେ ମଧ୍ୟ ଆମ ଅଂଚଳରେ ଏଭଳି ଉଚ୍ଚକୋଟୀର ଚଳଚିତ୍ର ନିର୍ମାଣ କରାଯିବ । ତେବେ ଚଳଚିତ୍ର ପ୍ରଦର୍ଶିତ ହେବା ପରେ ଏନଏସଡିଆନ ରାମଚନ୍ଦ୍ର ସାହୁ , ବରିଷ୍ଠ କଳାକାର ଦତ୍ତାନନ୍ଦ ପଣ୍ଡା , ନାଟ୍ୟ ନିର୍ଦ୍ଧେଶକ ପ୍ରଶାନ୍ତ ଖମାରୀ ଓ କୁନା ବାଗ ପ୍ରମୁଖ ସେମାନଙ୍କ ଟିପ୍ପଣୀ ରଖିଥିଲେ । ଖୁବ ଶୀଘ୍ର ଏହି ଉଭୟ ଚଳଚିତ୍ର ୟୁଟ୍ୟୁବରେ ଉପଲବ୍ଧ ହେବା ସହିତ ବିଭିନ୍ନ ପ୍ରତିଯୋଗୀତାକୁ ପଠା ଯିବ ବୋଲି ଏହାର ନିର୍ଦ୍ଧେଶକ ଶ୍ରୀ ପାଣିଗ୍ରାହୀ କହିଛନ୍ତି । କାର୍ଯ୍ୟକ୍ରମକୁ ସଂଯୋଜନା କରିଥିଲେ ଧିରାଜ ବେଜ ।