15-Mar-2023

ସୁବର୍ଣ୍ଣପୁର : ଆଜି ଓଡିଶା ଡ୍ରାଇଭର ମହାସଂଘର ଆହ୍ୱାନ କ୍ରମେ  ଓ ରାଜ୍ୟ ଡ୍ରାଇଭର ଏକତା ମହାମଞ୍ଚର ନିଷ୍ପତ୍ତି କ୍ରମେ ରାଜ୍ୟର ବିଭିନ୍ନ ସଂଗଠନ ର ସମର୍ଥନରେ ଷ୍ଟେରିଙ୍ଗ ଛାଡ଼ ଆନ୍ଦୋଳନ କରି ରାଜରାସ୍ତାରେ ଗଣଧାରଣା ଦେଇଛନ୍ତି ସୁବର୍ଣ୍ଣପୁର ଜ଼ିଲ୍ଲା ଡ୍ରାଇଭର ସଂଘ l ସୋନପୁର ବ୍ଲକ୍ ସଭାପତି ନରୋତ୍ତମ ନନ୍ଦ ଓ ସଂପାଦକ ଜ୍ୟୋତିରଂଜନ ପ୍ରଧାନଙ୍କ ନେତୃତ୍ବରେ ସୁବର୍ଣ୍ଣପୁରର ଅର୍ଜୁନପୁର ଛକ ଠାରେ ଡ୍ରାଇଭର ସଂଘ ର କର୍ମକର୍ତ୍ତା ମାନେ ରାସ୍ତା ଅବରୋଧ ଜାରି ରଖିଥିବା ବେଳେ ସଙ୍ଘର ସୁବର୍ଣ୍ଣପୁର ଜିଲ୍ଲା ସଭାପତି ଅକ୍ଷୟ ଥାପା ଓ ସମ୍ପାଦକ ସୁବାଷ ବିଶୋୟୀଙ୍କ ନେତୃତ୍ବରେ ଜ଼ିଲ୍ଲାର ୬ ଟି ଯାକ ବ୍ଲକର ବିଭିନ୍ନ ମୁଖ୍ୟ ରାସ୍ତା ମାନଙ୍କରେ ବ୍ଲକ ସଂଘ ପକ୍ଷରୁ ଶାନ୍ତିପୂର୍ଣ ଭାବେ ଧାରଣା ଦିଆ ଯାଇଥିବା ସୂଚନା ମିଳିଛି l ଆମ୍ବୁଲାନ୍ସ ସେବା, ଅଗ୍ନିଶମ ସେବା, ଗଣମାଧ୍ୟମଙ୍କ ସେବା, ମାଟ୍ରିକ ପରୀକ୍ଷାର୍ଥୀ ଙ୍କ ଯିବା ଆସିବା, ପୋଲିସ ଓ ପ୍ରଶାସନିକ ସେବା  ଭଳି ଏସବୁ ଜରୁରୀକାଳୀନ ସେବା ବ୍ୟତୀତ ଆଜି ଘରୋଇ ବସ, ଚାରି ଚକିଆ ଗାଡି ମୋଟର ଏପରିକି ଅଖ ଚକ ସବୁ  ବନ୍ଦ ରହିଥିବା ଦେଖିବାକୁ ମିଳିଛି l  ଡ୍ରାଇଭର ଙ୍କ ସ୍ୱାସ୍ଥ୍ୟ ବୀମା, ଦୁର୍ଘଟଣା  ପ୍ରାଣହାନିରେ ୨୦ ଲକ୍ଷ ଟଙ୍କା, ରାଜପଥ ରେ ବିଶ୍ରାମ ଗାର, ଡ୍ରାଇଭର ଲାଇସେନ୍ସ ଫ୍ରି, ମାଗଣା ଶିକ୍ଷା ପ୍ରଦାନ, ଦ୍ଵିତୀୟ ସୈନିକ ମାନ୍ୟତା ପ୍ରମୁଖ  ଦଶ ଦଫା ଦାବି ପ୍ରତି ରାଜ୍ୟ ସରକାର  ଅଣଦେଖା କରିଥିବାରୁ ଏବଂ ତାଙ୍କ ଅଧିକାର ଓ ସମ୍ମାନ ଫେରି ପାଇବାକୁ ଆଜି

ମହାସଂଘ ଅନିର୍ଦିଷ୍ଟ କାଳ ଯାଏ ଏହି ଆନ୍ଦୋଳନ ଆରମ୍ଭ  କରିଥିବା ପ୍ରକାଶ କରିଛନ୍ତି l ଯେମିତି ଜ଼ିଲ୍ଲାର କୌଣସି ବି ସ୍ଥାନ ରେ କିଛି ଗଣ୍ଡଗୋଳ ଓ ଅପ୍ରୀତିକର ପରିସ୍ଥିତି ସୃଷ୍ଟି ନ ହୁଏ ସେଥିପ୍ରତି ଜ଼ିଲ୍ଲା ପୋଲିସ ପ୍ରଶାସନ ପକ୍ଷରୁ କଡା ସୁରକ୍ଷା ବ୍ୟବସ୍ଥା ଓ କଡା ନଜର ରଖିଥିବା ଜଣା ଯାଇଛି l  ରାଜ୍ୟ ସାରା ଯାନ ବାହାନ ବନ୍ଦ ଥିବା ଯୋଗୁଁ ଆଜି ଜ଼ିଲ୍ଲା ର ସମସ୍ତ ସହରର ବ୍ୟବସାୟ ଠପ୍ ହୋଇପଡ଼ିଥିବା ବେଳେ  ଛୋଟ ବଡ଼ ଦୋକାନ ମାନଙ୍କରେ ଆଜି ଆଳୁ ପିଆଜ ଆଦି ନିତ୍ୟ ବ୍ୟବହାର୍ଯ୍ୟ ଜିନିଷର  ଘୋର ଅଭାବ ଦେଖା ଯାଇଛି l ଯଦି ଅତିଶୀଘ୍ର ଏହାର କିଛି ଠୋସ୍ ସମାଧାନର ରାସ୍ତା ନବାହାରେ ତାହେଲେ ଅତ୍ୟାବଶ୍ୟକ ସାମଗ୍ରୀ ର ଅହେତୁକ ମୁଲ୍ୟବୃଦ୍ଧି ର ଆଶଂକା ଖାଉଟି ମହଲରେ ସୃଷ୍ଟି ହୋଇଛି।