15-Mar-2023

ବଲାଙ୍ଗୀର(ପ୍ରେରଣା ଖବର ): ଏଇ କିଛିଦିନ ହେଲା ବଲାଙ୍ଗୀର ପୁଲିସ୍ ର ଅପରାଧୀ ଓ ନିଶାବିକାଳୀଙ୍କୁ ଧରପଗଡ ଅଭିଯାନକୁ  ସବୁମହଲରେ ପ୍ରଶଂସା କରାଯାଇଛି । ଏସ୍ ପି ନୀତିନ୍ କୁଶଳକରଙ୍କ ନିର୍ଦ୍ଦେଶରେ ବଲାଙ୍ଗୀର ଓ ପାଟଣାଗଡ ସହରରେ ଜଣାଶୁଣା ଡନ୍ ବା ଅପରାଧୀ ଓ ଅସାମାଜିକ ବ୍ୟକ୍ତିଙ୍କ ଆଡ୍ଡା, ସରକାରୀ ଜମିରେ ଜବରଦଖଲର ଘରଦ୍ବାରକୁ ବୁଲ୍ ଡୋଜର୍ ଚଢାଇ ଧୂଳିସାତ୍ କରିଦିଆଯିବା ସହିତ  ଗଲାକିଛିବର୍ଷଧରି ଜିଲ୍ଲାରେ ବ୍ୟାପକ ହୋଇଯାଇଥିବା ମୁଖ୍ୟତଃ କଫସିରପ୍ ଓ ନିଶାବଟିକା ବେପାରରେ ଜଡିତ ଅସାମାଜିକ ଯୁବକଙ୍କୁ ଧରିବାରେ ପୁଲିସ୍ ସକ୍ରିୟ ହୋଇଉଠିଛି ।  ଆରଟିଓ ଛକର ଚିତ୍ତ ମହାନ୍ତିର ଅଧାଅଧି ସରକାରୀ ଜମି ଜବରଦଖଲରେ ଗଢି ଉଠିଥିବା ଘର ଓ ଆର୍ଯ୍ୟପ୍ୟାଲେସ୍ ମଣ୍ଡପ, ଜମିମାଫିଆ ଡନ୍ ଟିମନ୍ ଓରଫ ଶ୍ରୀକାନ୍ତ କୁମ୍ଭାରର ଲର୍କିପାଲି ଓ ପଥରଚେପାର ପାଟଣାଗଡ ରୋଡ୍ ର ସହର ଉପକଣ୍ଠରେ ଥିବା ଆଲିଶାନ୍ ଘର , ହୋଟେଲ , ଆ ଡ୍ ଡା ବା ଅଫିସ୍ , ଷ୍ଟଲ୍ ଓ ଅନ୍ୟାନ୍ୟ ଜବରଦଖଲ ନିର୍ମାଣକୁ ବୁଲ୍ ଡୋଜର୍ ଲଗାଯାଇ ଦୁଇଦିନ ଧରି ପୁଲିସ୍ - ପ୍ରଶାସନ ଭାଙ୍ଗିଦେଇଛି । ପାଟଣାଗଡ ରାମପାଲିର ଜଣେ ଅପରାଧୀ ଜଗା ସେନାପତିର ଘରକୁ ମଧ୍ୟ ପୁଲିସ୍ ଭାଙ୍ଗି ଦେଇଛି ।  କେବଳ ଏତିକି ନୁହେଁ, ବଲାଙ୍ଗୀରରୁ ଚେର ଲମ୍ବାଇ ପଶ୍ଚିମଓଡିଶା ସମେତ କଟକ ବା ଅଧାଓଡିଶା ଓ ରାଜ୍ୟବାହାରକୁ ଚେର ଲମ୍ବିଥିବା କୋରେକ୍ସ ଆଦି ନିଶାଔଷଧ, ନିଶାବଟିକାର ନିଶାମାଫିଆ ବଲାଙ୍ଗୀରର ସାନ ନେଗୀ ଓ ଏଭଳି ଅନ୍ୟାନ୍ୟ ନିଶାବିକାଳୀଙ୍କୁ ପୁଲିସ୍ ଗୋଡେଇ ଗୋଡେଇ ଧରୁଛି । ଅଦ୍ୟାବଧି ବଲାଙ୍ଗୀର ଟାଉନ୍ ଥାନା ପୁଲିସ୍ ଏଭଳି ୩୫ରୁ ଉର୍ଦ୍ଧ୍ବ ଯୁବକଙ୍କୁ ଗିରଫ କରିଥିବା ପ୍ରକାଶ । ଫଳରେ ବଲାଙ୍ଗୀରରେ ଅପରାଧୀ ଓ ନିଶାବେପାରୀଙ୍କ ମଧ୍ୟରେ ଛନକା ପଶିଯାଇଛି । ଏସ୍ ପିଙ୍କ ଏହି ମିଶନ୍ କ୍ଲିନ୍ କୁହାଯାଉଥିବା ଅଭିଯାନକୁ ସବୁମହଲରେ ଉଚ୍ଚପ୍ରଶଂସା କରାଯାଉଛି । କିଛିଦିନତଳେ ବଲାଙ୍ଗୀର ପୁଲିସ୍ ଉପରେ ଜିଲ୍ଲାରେ ଅପରାଧବୃଦ୍ଧି ଓ ଅନ୍ୟାନ୍ୟ ଆଇନ ଶୃଙ୍ଖଳା ବିପର୍ଯ୍ୟସ୍ତ ହୋଇପଡିଥିବା ଅଭିଯୋଗ ହୋଇ ଆସୁଥିଲା ।  ଏପରିକି ମମିତାମେହେର ହତ୍ୟାମାମଲା ଓ ଏହାର ଅଭିଯୁକ୍ତ ଗୋବିନ୍ଦସାହୁ ଆତ୍ମହତ୍ୟାର ତଦନ୍ତରେ ତ୍ରୁଟି, କିଛିଦିନତଳେ କଣ୍ଟାବାଞ୍ଜିରେ ଜଣେ ଡିଏସପି ଦାଦନସେଠ୍ ଙ୍କର ଲକ୍ଷାଧିକଟଙ୍କା ହଡପ କରି ନିଲମ୍ବିତ ହେବା, ପାଟଣାଗଡରେ ଦିନ ଦ୍ବିପ୍ରହରରେ ଜେଇ ହତ୍ୟା, ଡକାୟତି ଆଦି ଅପରାଧ ସଂଘଟିତ ହେବା, ଭୀମଭୋଇ ମେଡିକାଲ କଲେଜର ରାଗିଂରେ ଡାକ୍ତରୀଛାତ୍ରଙ୍କ ମୃତ୍ୟୁ ଇତ୍ୟାଦି ଘଟଣା ବଲାଙ୍ଗୀର ପୁଲିସ୍ ର ଛବିକୁ ମଳିନ କରିଥିବାବେଳେ , ହଠାତ୍ ଏସପି ବନାମ ବଲାଙ୍ଗୀର ପୁଲିସ୍ ର ଏହି ଅଭିଯାନ ଖୁବ୍ ପ୍ରଶଂସନୀୟ ହୋଇଥିବା ଲୋକଙ୍କ ଚର୍ଚ୍ଚାରୁ ପ୍ରକାଶ ।