17-Feb-2023

ବଲାଙ୍ଗୀର(ପ୍ରେରଣା ଖବର)-ବଲାଙ୍ଗୀର ସହରରେ ମିଶନକ୍ଲିନ ଜରିଆରେ ଅପରାଧିମାନଙ୍କର ବେଆଇନ ଘର ଓ ଦୋକାନ ଭଙ୍ଗାଚାଲିଥିବା ବେଳେ ସେପଟେ କଣ୍ଟାବାଞ୍ଜି ନିର୍ବାଚନମଣ୍ଡଳିର ବିଭିନ୍ନ ସ୍ଥାନରେ ବେଆଇନ ଇଟାଭାଟି ଉପରେ ପ୍ରଶାସନର ବୁଲଡୋଜର ଚାଲିଛି । ଟିଟିଲାଗଡ ଉପଜିଲ୍ଲାପାଳ ତାଙ୍କ ଟିମ ନେଇ ଗତ କିଛିଦିନ ହେଲା ବେଆଇନ ଇଟାଭାଟି ଉପରେ ଚଢାଉ କରୁଛନ୍ତି । ଗତ ୫ଦିନ ତଳେ ତୁରେକେଲାର କୁକୁଡାହାଡ ଗାଁ ନିକଟରେ ପ୍ରାୟ ୫୦ଲକ୍ଷ ଟଙ୍କାର ଇଟାଭାଟିକୁ ବୁଲଡୋଜର ଲଗାଇ ଧ୍ୱଂସ କରାଯାଇଥିଲା । ଆଜି ପୁଣି ମୁରିବାହାଲ ତହସିଲର ସରଧାପୁର ଗାଁରେ ଦୁଇଟି ଇଟାଭାଟିରେ ପ୍ରଶାସନ ଚଢାଉ କରି ବୁଲଡୋଜର ଲଗାଇ ତାକୁ ଭାଙ୍ଗିଦେଇଛି । ଏଠାରେ ପ୍ରାୟ ୪୦ଲକ୍ଷ ଇଟା ନଷ୍ଟ କରାଯାଇଥିବା ସୂଚନା ମିଳିଛି ।

ସେହିପରି ଇଟଭାଟି କାମରେ ଲାଗିଥିବା ୨ଟି ଜେସିବି ମେସିନ,୫ଟି ଟ୍ରାକ୍ଟର ଓ ୨ଟି ହାଇୱାକୁ ମଧ୍ୟ ଉପଜିଲ୍ଲାପାଳ ଜବତ କରିଛନ୍ତି । ଆଜି କୌଣସି ସୂତ୍ରରୁ ଖବର ପାଇ ଟିଟିଲାଗଡ ଉପଜିଲ୍ଲାପାଳ ଦୟାମୟ ପାଢୀ, ମୁରିବାହାଲ ତହସିଲଦାର ସୋନାଲି ପାତ୍ର,ଟିଟିଲାଗଡ ଏସଡିପିଓ ଅଙ୍କିତା କୁମ୍ଭାର,କଣ୍ଟାବାଞ୍ଜି ଏସଡିପିଓ ଲକ୍ଷ୍ମୀନାରାୟଣ ମାରାଣ୍ଡି,ମୁରିବାହାଲ ଥାନାଧିକାରୀ ପଞ୍ଚାନନ ନାଏକ,ଟିଟିଲାଗଡ ଆଇଆଇସି ରଂଜନ ବରିହା,ବଙ୍ଗୋମୁଣ୍ଡା ଥାନାଧିକାରୀ ପ୍ରଣୟ ମୁର୍ମୁ,ଜିଲ୍ଲା ଶ୍ରମଅଧିକାରୀ ପ୍ରଶାନ୍ତ ସୁନା ପ୍ରମୁଖ ମିଳିତ ଭାବରେ ଚଢାଉ କରି ଏହି ବେଆଇନ ଇଟାଭାଟିରେ ବୁଲଡୋଜର ଲଗାଇଥିଲା । ଦୁଇଟି ଯାକ ଇଟାଭାଟି ସରଧାପୁରର ଗୁନେନ ଝାଙ୍କରଙ୍କର ବୋଲି ଜଣାଯାଇଛି । ପ୍ରଶାସନ ଗତକିଛିଦିନ ତଳେ ତାଙ୍କଠାରୁ ଇଟାଭାଟି ବାବଦରେ ଫାଇନ ମଧ୍ୟ ଆଦାୟ କରିଥିଲା । ତେବେ ଟିଟିଲାଗଡ ଉପଖଣ୍ଡର କଣ୍ଟାବାଞ୍ଜି ନିର୍ବାଚନ ମଣ୍ଡଳିରେ ବିଭିନ୍ନ ସ୍ଥାନରେ ଚଢାଉ କରାଯାଉଥିବା ବେଳେ ଟିଟିଲାଗଡ ନିର୍ବାଚନ ମଣ୍ଡଳିର ବେଆଇନ କ୍ରସର,ପଥରକ୍ୱାରୀ ,ବାଲିକ୍ୱାରି ଓ ଇଟାଭାଟିରୁ ବିପୁଳ ପରିମାଣର ଚାନ୍ଦା ଆଦାୟ କରାଯାଉଥିବା ଅଭିଯୋଗ ମଧ୍ୟ ହେଉଛି ।