15-Feb-2023

ବଲାଙ୍ଗୀର(ପ୍ରେରଣା ଖବର) ପୁଇଁତଲା ବ୍ଳକ ଅନ୍ତର୍ଗତ ବୁବେଲ ସ୍ଥିତ ନିଧିସାଗର ସରକାରୀ ଉଚ୍ଚ ବିଦ୍ୟାଳୟର ବାର୍ଷିକୋତ୍ସବ ଅନୁଷ୍ଠିତ ହୋଇଯାଇଛି। ମୁଖ୍ଯ ଅତିଥି ଲୋଇସିଂହା ବିଧାୟକ ଡ ମୁକେଶ ମହାଲିଙ୍ଗ, ପ୍ରଧାନ ଶିକ୍ଷୟତ୍ରୀ ଗିରିଜା ବାଙ୍କି ଓ ଅନ୍ଯ ଅତିଥି ଦୀପ ପ୍ରଜ୍ବଳନ କରି କାର୍ଯ୍ୟକ୍ରମର  ଶୁଭାରମ୍ଭ କରିଥିଲେ। ଏ ଅବସରରେ ପ୍ରଧାନ ଶିକ୍ଷୟତ୍ରୀଙ୍କ ସଭାପତିତ୍ବରେ ଅନୁଷ୍ଠିତ ସଭାରେ ଅବସରପ୍ରାପ୍ତ ଜିଲ୍ଲା

ଶାରିରୀକ ଶିକ୍ଷା ନିରୀକ୍ଷକ, ସୋନପୁର ଦୁର୍ଯ୍ୟୋଧନ ରାଉତ୍ ମୁଖ୍ଯବକ୍ତା ଭାବରେ ଯୋଗଦାନ କରିଥିବା ବେଳେ ପୁଇଁତଲା ପଞ୍ଚାୟତ ସମିତି ଅଧ୍ୟକ୍ଷ ସରୋଜ ପଧାନ, ଅବସରପ୍ରାପ୍ତ ଶିକ୍ଷକ ଅଶୋକ କୁମାର ମିଶ୍ର ସମ୍ମାନିତ ଅତିଥି ଭାବରେ ଯୋଗଦାନ କରିଥିଲେ। ମୁଖ୍ଯବକ୍ତା ଶିକ୍ଷକ,ଛାତ୍ର ଓ ଅଭିଭାବକଙ୍କ ସଂପର୍କ ଓ ନୀତି ନୈତିକତା ଉପରେ ଆଲୋକପାତ କରିଥିଲେ। ବିଧାୟକ ମହାଲିଙ୍ଗ ଡିଜିଟାଲ ଯୁଗର ଅନ୍ୟତମ ଗୁରୁ ଟେକ୍ନୋଲୋଜି ବ୍ୟବହାର କରି କ୍ୟାରିଅର ଗଠନ ପାଇଁ ଛାତ୍ରଛାତ୍ରୀଙ୍କୁ ପରାମର୍ଶ ଦେଇଥିଲେ। ଅଧ୍ୟକ୍ଷ ପଧାନ ବାର୍ଷିକୋତ୍ସବର ଲକ୍ଷ୍ୟ ଉଦ୍ଦେଶ୍ଯ ବିଷୟରେ ମତାମତ ରଖି ଦେଶ ଗଠନ ଉଦ୍ଦେଶ୍ଯରେ ଛାତ୍ରଛାତ୍ରୀଙ୍କୁ ଶପଥପାଠ କରାଇଥିଲେ। ପ୍ରାରମ୍ଭରେ ଏହି ବିଦ୍ୟାଳୟ ଆରମ୍ଭରୁ ଶିକ୍ଷକତା ଆରମ୍ଭ କରି ଏହିଠାରେ ଅବସର ଗ୍ରହଣ କରିଥିବା ଶିକ୍ଷକ ଅଶୋକ କୁମାର ମିଶ୍ରଙ୍କୁ ସମ୍ବର୍ଦ୍ଧିତ କରାଯାଇଥିଲା। ସେ ବିଦ୍ୟାଳୟ ଆରମ୍ଭ ସମୟର ସଂଘର୍ଷର କିଛି ଅନୁଭୂତି କହିବା ସହ ଦିବଙ୍ଗତ ପ୍ରତିଷ୍ଠାତା ସଦସ୍ଯଙ୍କ ତ୍ଯାଗ,ନିଷ୍ଠା ଓ ଉଦ୍ୟମର ସ୍ମୃତିଚାରଣ କରିଥିଲେ। ଅବସରପ୍ରାପ୍ତ ଶିକ୍ଷକ ଭଗବାନ ମିଶ୍ର ଚାଳ ଛପର ଘରୁ ଆରମ୍ଭ ହୋଇଥିବା ଶିକ୍ଷାନୁଷ୍ଠାନ ଆଜି ଏ ଅଞ୍ଚଳର ପ୍ରଗତିର ମାଇଲଖୁଣ୍ଟ। ଏହାର ବିକାଶ ପାଇଁ ସମସ୍ତଙ୍କ ଗଠନମୂଳକ ସହଯୋଗ ଆବଶ୍ୟକ ବୋଲି କହିଥିଲେ। ପୂର୍ବରୁ

ଆୟୋଜିତ ବିଭିନ୍ନ ପ୍ରତିଯୋଗିତାର କୃତୀ ଛାତ୍ରଛାତ୍ରୀଙ୍କୁ ଅତିଥିମାନଙ୍କ ଦ୍ବାରା ପୁରସ୍କୃତ କରାଯିବା ସହ ଛାତ୍ରଛାତ୍ରୀମାନେ ନାଚ ଗୀତ ଇତ୍ୟାଦି ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରିଥିଲେ। ଏସଏମସି ସଭାପତି ଜୟଦେବ ନାଏକ, ଅବସରପ୍ରାପ୍ତ ଶିକ୍ଷକ ସୁରୁ ବାଗ, ପ୍ରତିଷ୍ଠାତା ସଦସ୍ଯ ବୀରସିଂହ ଦୀପ ମଞାସୀନ ଥିଲେ। କାର୍ଯ୍ୟକ୍ରମ ଆୟୋଜନରେ ବିଦ୍ୟାଳୟର ଶିକ୍ଷକ ଶିକ୍ଷୟିତ୍ରୀ ଓ ଏସଏମସି ସଦସ୍ଯ ସଦସ୍ୟା ସହଯୋଗ କରି ବିଭିନ୍ନ ଦାୟିତ୍ବ ନିର୍ବାହ କରିଥିଲେ।