19-Jan-2023

ବଲାଙ୍ଗିର (ମଳୟ ମିଶ୍ରଙ୍କ ରିପୋର୍ଟ )  ଗତ କିଛି ବର୍ଷଧରି ବଲାଙ୍ଗୀର ଜିଲ୍ଲା ସମେତ ପଶ୍ଚିମଓଡିଶାରେ କପାଚାଷ ବୃଦ୍ଧି ପାଇଥିବା ସହ ଏହାର ବ୍ୟୟ ଓ ବିକ୍ରି ନିୟନ୍ତ୍ରଣ ହରାଇବସିଛି । ଏହି ବ୍ୟୟବହୁଳ ଚାଷ ପାଇଁ ମହାଜନୀସୁଧ କାରବାରରେ ଚାଷୀ ଶୋଷଣର ଶିକାର ହେଉଥିବାର ଜିଲ୍ଲାରେ ପୁରୁଣା ଅଭିଯୋଗ ରହିଛି । ଏପରିକି ପାଟଣାଗଡ ଅଞ୍ଚଳରେ କିଛିବର୍ଷତଳେ ଗଙ୍ଗାରାମ କପାଚାଷୀ ଆତ୍ମହତ୍ୟା ଘଟଣା ଚାଞ୍ଚଲ୍ଯ ସୃଷ୍ଟି କରିଥିଲା । ଆହୁରି ମଧ୍ୟ ବିଟିବିହନ ନିଷିଦ୍ଧ ନିୟମର ଉଲଙ୍ଘନ, ମଣ୍ଡିବ୍ୟବସ୍ଥାରେ ଅବ୍ୟବସ୍ଥା ଅଭିଯୋଗ , ସୁନ୍ଦରଗଡ - ଝାରସୁଗୁଡା ଅଞ୍ଚଳର ଜଣେ ଅଣଓଡିଆ ବ୍ୟବସାୟୀଙ୍କୁ କଣ୍ଟାବାଞ୍ଜିର ଜଣେ ମିଲର ଦ୍ବାରା ଅପହରଣ ମାମଲା ସହିତ ଉକ୍ତ କାରବାରରେ ଜଡିତ ଜଣେ ବାହାର ଗୁମାସ୍ତାଙ୍କର ଆତ୍ମହତ୍ୟା ଘଟଣା , ଗତବର୍ଷ ବେଲପଡାଥାନାରେ ବ୍ୟବସାୟୀଙ୍କୁ ଲକ୍ଷ ଲକ୍ଷ ବକେୟା ମାମଲାରେ ପୁଲିସ୍ ର ତଥାକଥିତ ସମାଧାନ ପାଇଁ ଅଭିଯୋଗ ଏବଂ ଏବେ ଗତକାଲି ଖପ୍ରାଖୋଲ ଅଞ୍ଚଳର କପସିପାଲି ଗ୍ରାମରେ ରିମୋଟ୍ ଡାଏରୀ ଦ୍ବାରା ମହାରାଷ୍ଟ୍ର ଓ କଣ୍ଟାବାଞ୍ଜିର ଦୁଇଜଣ କପାକିଣୁଥିବା ବେପାରୀ  କୁଇଣ୍ଟାଲ ପିଛା ୧୦ / ୧୨ କେଜି ଓଜନରେ କମ୍ କରୁଥିବା ଅଭିଯୋଗରେ ଧରାପଡିଥିବା ଘଟଣା ଚହଳ ପକାଇଛି ।  ଏସମ୍ପର୍କରେ ସ୍ଥାନୀୟ ଥାନା ପୁଲିସ୍ ବା ପ୍ରଶାସନ ବା ବିଭାଗୀୟ କାର୍ଯ୍ୟାନୁଷ୍ଠାନ ବିଷୟରେ ସବିଶେଷ ବିବରଣୀ ହସ୍ତଗତ ହୋଇପାରି ନଥିଲେ ହେଁ , ତଦନ୍ତ ଚାଲିଥିବା ପ୍ରକାଶ 

ଉଲ୍ଲେଖନୀୟ ଯେ କିଛିବର୍ଷ ତଳେ ଅବିଭକ୍ତ ବଲାଙ୍ଗୀର ଜିଲ୍ଲାରେ ମାତ୍ର ୫ ହେକ୍ଟରରୁ ଆରମ୍ଭ କରି କପାଚାଷ ସଂପ୍ରତି ଏହି ମରୁଡିପ୍ରବଣ ପଶ୍ଚିମଓଡିଶାରେ ମୁଖ୍ୟ ବିକଳ୍ପ ଫସଲ ବା ଧଳାସୁନାର ଆଖ୍ୟା ପାଇଛି । କିଛିବର୍ଷତଳର ସୋନପୁରର ବଡ କପାମିଲ୍ ପରବର୍ତ୍ତୀକାଳରେ ଉପଯୁକ୍ତ ସରକାରୀ ପ୍ରୋତ୍ସାହନ ଓ ଆଗ୍ରହ ଅଭାବରୁ କ୍ରମେ ଘରୋଇ ପରିଚାଳନାଗତ ବିଶୃଙ୍ଖଳାରେ ରୁଗ୍ଣଶିଳ୍ପରେ ପରିଣତ ହୋଇପଡିଥିବାବେଳେ,  ଜିଲ୍ଲାରେ ଏକାଧିକ କପାମିଲ୍ ଓ ଗ୍ରାମାଞ୍ଚଳରେ ୧୩ଟିରୁ ଅଧିକ ଜିନିଂମିଲ୍ ସ୍ଥାପିତ ହୋଇଛି । ତେବେ ଏହି ମିଲ୍, କଣ୍ଟାବାଞ୍ଜି ଓ ଯୋଗୀମୁଣ୍ଡା ଆଦି ନିୟନ୍ତ୍ରିତ ବଜାର କମିଟିର ମଣ୍ଡି ବ୍ୟବସ୍ଥା ଓ କଟନ୍ ଇଣ୍ଡିଆର କମ୍ ଦର ସହିତ ଗ୍ରାମାଞ୍ଚଳରେ ଛତୁଫୁଟିଲା ପରି କପାବେପାରୀଙ୍କ ଦ୍ବାରା ଚାଷୀ ଅଭାବୀବିକ୍ରିର ଶିକାର ହେଉଥିବା ଅଭିଯୋଗ ହୋଇଆସୁଛି ।  କିଛିଦିନତଳେ ମାଓବାଦୀଙ୍କ ଦ୍ବାରା କପାଦର ବୃଦ୍ଧି ପାଇଁ ଚେତାବନୀ ଦିଆଯାଇଥିବା ଦେଖାଯାଇଥିଲା ।  କପାଣି ଓ କେସିଙ୍ଗା ଆଦି ଅଞ୍ଚଳର ମିଲ୍ ଓ କପାକିଣୁଥିବା ଅଧିକାରୀଙ୍କ ମଧ୍ୟରେ ସମନ୍ବୟ ଅଭାବରୁ ଚାଷୀମାନେ ଶୋଷଣର ଶିକାର ହୋଇ ଧାରଣା ମଧ୍ୟ ଦେଇଥିଲେ । ତେବେ ଏବର ଏହି ଓଜନରେ ଠକେଇ ଘଟଣା ଧରାପଡିବା ପରେ ସମଗ୍ର ପଶ୍ଚିମଓଡିଶାରେ କପାଚାଷ ଓ କପାକିଣାଦି ପ୍ରତି ସରକାର ସଚେତନ ରହିବା ଜରୁରୀ ହୋଇପଡିଛି ।

କପସିପାଲି ଘଟଣାରେ କପସିପାଲି ଓ କଣ୍ଟାବାଞ୍ଜିର ୨ ଜଣଙ୍କୁ ଖପ୍ରାଖୋଲ ପୁଲିସ୍ ଗିରଫ କରି କୋର୍ଟଚାଲାଣ କରିଛି  ଓ ମହାରାଷ୍ଟ୍ରର ବେପାରୀଙ୍କୁ ଛାଡିଦେଇଥିବାରୁ ବିଭିନ୍ନ ଚର୍ଚ୍ଚା ହେଉଥିବା ସର୍ବଶେଷ ଖବରରୁ ପ୍ରକାଶ ।