15-Dec-2022

ବରଗଡ଼: ବିକାଶ ଡିଗ୍ରୀ କଲେଜ ଏବଂ ଏନ୍‌ଏସ୍‌ଏସ୍ ବ୍ୟୁରୋ ସମ୍ବଲପୁର ବିଶ୍ୱବିଦ୍ୟାଳୟର ମିଳିତ ଆନୁକୁଲ୍ୟରେ ଏନ୍‌ଏସ୍‌ଏସ୍ ଲିଡର୍‌ସିପ୍ ଟ୍ରେନିଂ ପ୍ରୋଗ୍ରାମ୍ ୨୦୨୨, ୧୬ ରୁ ୧୮ ଡିସେମ୍ବର ୨୦୨୨ ପର୍ଯ୍ୟନ୍ତ ଆୟୋଜିତ ହେବାକୁ ଯାଉଛି । ଉକ୍ତ କାର୍ଯ୍ୟକ୍ରମରେ ବରଗଡ଼, ସୁନ୍ଦରଗଡ଼, ବଲାଙ୍ଗୀର ଏବଂ ସୋନପୁର ଜିଲ୍ଲାର ୨୦ରୁ ଉର୍ଦ୍ଧ୍ୱ ମହାବିଦ୍ୟାଳୟ ତଥା ସମ୍ବଲପୁର ବିଶ୍ୱବିଦ୍ୟାଳୟର ସ୍ନାତକୋତ୍‌ତର ବିଭାଗରୁ ୨୦୦ରୁ ଉର୍ଦ୍ଧ୍ୱ ଏନ୍‌ଏସ୍‌ଏସ୍ ସ୍ୱେଚ୍ଛାସେବୀ ଯୋଗ ଦେବାକୁ ଯାଉଛନ୍ତି ବୋଲି ବିକାଶ ଗ୍ରୁପ୍‌ର ଏକ୍‌ଜିକ୍ୟୁଟିଭ୍ ଡାଇରେକ୍ଟର ଶ୍ରୀ ଡି.ନାଗେଶ୍ୱର ରାଓ ସୂଚନା ଦେଇଛନ୍ତି । ବିକାଶ ଗ୍ରୁପ୍ ଅଫ୍ ଇନ୍‌ଷ୍ଟିଚ୍ୟୁସନ୍‌ସ୍‌ର ଡାଇରେକ୍ଟର ଡ.ସମରେନ୍ଦ୍ର ନାଥ ପଣ୍ଡା ପ୍ରକାଶ କରିଛନ୍ତି ଯେ, ଉଦ୍‌ଘାଟନୀ ଉତ୍ସବରେ ସମ୍ବଲପୁର ବିଶ୍ୱବିଦ୍ୟାଳୟର ଭାରପ୍ରାପ୍ତ କୁଳପତି ପ୍ରଫେସର୍ ସଂଯୁକ୍ତା ଦାଶଙ୍କ ସମେତ ପ୍ରମୁଖ ଏନ୍‌ଏସ୍‌ଏସ୍ ଉଚ୍ଚପଦାଧିକାରୀ ଯୋଗଦେବେ । ବିକାଶ ଗ୍ରୁପ୍‌ର ଚେୟାର୍‌ମେନ୍ ଶ୍ରୀ ଡି.ମୂରଲୀ କ୍ରୀଷ୍ଣା ଏପରି ବ୍ୟକ୍ତିତ୍ୱର ବିକାଶ କାର୍ଯ୍ୟକ୍ରମ ଏକ ସାମାଜିକ ଆବଶ୍ୟକତା ଏବଂ ବିକାଶ ଡିଗ୍ରୀ କଲେଜର ଏହି ପ୍ରୟାସ ବିକାଶ ଗ୍ରୁପ୍‌ର ସାମଗ୍ରିକ ଦୃଷ୍ଟିଭଙ୍ଗୀର ପରିପ୍ରକାଶ ବୋଲି ପ୍ରକାଶ କରିଛନ୍ତି ।  ତିନିଦିନ ବ୍ୟାପୀ ହେବାକୁ ଥିବା ଏହି ଲିଡର୍‌ସିପ୍ କ୍ୟାମ୍ପ୍‌ରେ ଛାତ୍ରୀଛାତ୍ରଙ୍କୁ ଏକ ବଳିଷ୍ଠ ସମାଜ ପାଇଁ ଆବଶ୍ୟକ ହେଉଥିବା ବଳିଷ୍ଠ ବ୍ୟକ୍ତିତ୍ୱ ନିର୍ମାଣ ଉଦ୍ଦେଶ୍ୟରେ ବିଭିନ୍ନ ଶିକ୍ଷଣୀୟ ବିଷୟବସ୍ତୁ ଉପରେ ସଂଗୋଷ୍ଠୀ ଏବଂ ବ୍ୟବହାରିକ ଶୈଳୀରେ ଉପାଦେୟ ଲାଇଫ୍ ସ୍କିଲ୍‌ସ୍ ସମ୍ବନ୍ଧୀୟ ତାଲିମ କାର୍ଯ୍ୟକ୍ରମର ଯୋଜନା ହୋଇଛି ବୋଲି ଏନ୍‌ଏସ୍‌ଏସ୍ ବ୍ୟୁରୋ, ସମ୍ବଲପୁର ବିଶ୍ୱବିଦ୍ୟାଳୟ ତରଫରୁ ପ୍ରକାଶ କରାଯାଇଛି ।  ଏଣ୍ଟର୍‌ପ୍ରିନ୍ୟୁୟର୍‌ସିପ୍ ଇନ୍ ଦି ମେକିଂ, ଲିଡର୍‌ସିପ୍ ଟ୍ରେନିଂ ଏବଂ ବ୍ୟକ୍ତିତ୍ୱ ବିକାଶ ସଂଗୋଷ୍ଠୀ ସମେତ ସମାଜୋନ୍ମୁଖୀ ଏବଂ ପରିବେଶଧର୍ମୀ ଅନେକ କାର୍ଯ୍ୟକ୍ରମ ନେଇ ଏହି ଟ୍ରେନିଂ କ୍ୟାମ୍ପ୍‌ର ରୂପକଳ୍ପନା କରାଯାଇଛି ବୋଲି ବରଗଡ଼ ଜିଲ୍ଲା ଏନ୍‌ଏସ୍‌ଏସ୍ ପ୍ରୋଗ୍ରାମ୍ ଅଫିସର୍ ଡ.ବବିତା ଷଡ଼ଙ୍ଗୀ ମତପ୍ରକାଶ କରିଛନ୍ତି । ଉକ୍ତ କାର୍ଯ୍ୟକ୍ରମରେ ଏନ୍‌ଏସ୍‌ଏସ୍ ଓଡ଼ିଶାର ଆଂଚଳିକ ନିର୍ଦ୍ଦେଶକ କୁମାରୀ ସରିତା ପଟେଲ୍‌ଙ୍କ ସମେତ ସମ୍ବଲପୁର ବିଶ୍ୱବିଦ୍ୟାଳୟର ରେଜିଷ୍ଟ୍ରାର୍ ଡ.ନୃପରାଜ ସାହୁ ଏବଂ ଏନ୍‌ଏସ୍‌ଏସ୍‌, ଭୁବନେଶ୍ୱର କାର୍ଯ୍ୟାଳୟରୁ ଏସ୍‌.ଏନ୍‌.ଓ. ଡ.ରମେଶ ଚନ୍ଦ୍ର ବେହେରା ଯୋଗ ଦେବେ ବୋଲି ବିକାଶ ଡିଗ୍ରୀ କଲେଜର ଉପାଧ୍ୟକ୍ଷ ଶ୍ରୀ ଆର୍‌.ଏସ୍‌.ଭି. କ୍ରୀଷ୍ଣା ସୂଚନା ଦେଇଛନ୍ତି । ୧୭ ଡିସେମ୍ବର ଦିନ ବରଗଡ଼ ଏବଂ ସୋନ୍‌ପୁର ଜିଲ୍ଲା ଅନ୍ତର୍ଗତ ସମସ୍ତ ମହାବିଦ୍ୟାଳୟ ଅନ୍ତର୍ଗତ ଏନ୍‌ଏସ୍‌ଏସ୍ ପ୍ରୋଗ୍ରାମ୍ ଅଫିସର୍ ମାନଙ୍କ ବିଧିବଦ୍ଧ ଆଲୋଚନା ଶିବିର ମଧ୍ୟ ଆୟୋଜିତ ହେବ ବୋଲି ବିକାଶ ଡିଗ୍ରୀ କଲେଜର ଏନ୍‌ଏସ୍‌ଏସ୍ ପ୍ରୋଗ୍ରାମ୍ ଅଫିସର୍ ଶ୍ରୀ ରଜତ ପାଣିଗ୍ରାହୀ ପ୍ରକାଶ କରିଛନ୍ତି ।