13-Dec-2022

ବଲାଙ୍ଗୀର(ପ୍ରେରଣା ଖବର) ରାଜ୍ୟର ଜଣାଶୁଣା ସୂଚନା ଅଧିକାର କର୍ମି ତଥା ସ୍ତମକାର ହେମନ୍ତ ପଣ୍ଡା ଓଡ଼ିଶା ସରକାରୀ ଆଉଟସୋର୍ସିଂ କର୍ମଚରୀ ମହାସଂଘ ବଲାଙ୍ଗୀର ଶାଖାର ଉପଦେଷ୍ଟା ଭାବେ ଦାୟିତ୍ୱ ଗ୍ରହଣ କରିଛନ୍ତି । ଏହି ଅବସରରେ ଅନୁଷ୍ଠିତ ଏକ ସଭାରେ ରାଜ୍ୟ ସରକାରଙ୍କ ଦ୍ଵାରା ଜାରି ରହିଥିବା ଆଉଟସୋର୍ସିଂ ଭଳି ଅମାନବୀୟ ତଥା କ୍ରିତଦାସ ପ୍ରଥାକୁ ଉଚ୍ଛେଦ କରାଯିବା ଆବଶ୍ୟକତା ରହିଛି ଏବଂ ଏଥିପାଇଁ ରାଜ୍ୟ ସ୍ତରରେ ଦୁର୍ବାର ଆନ୍ଦୋଳନ ପାଇଁ ବଲାଙ୍ଗୀର ଜିଲ୍ଲାର ସମସ୍ତ ଆଉଟସୋର୍ସିଂ କର୍ମଚାରୀ ଏକତ୍ରିତ ହେବା ପାଇଁ ପଣ୍ଡା ଆହ୍ଵାନ ଦେଇଥିଲେ । ଶ୍ରୀପଣ୍ଡାଙ୍କ ମାର୍ଗଦର୍ଶନରେ ଉବିଷ୍ୟତ ନ୍ୟାୟପୂର୍ଣ୍ଣ ଆନ୍ଦୋଳନାତ୍ମକ କାର୍ଯ୍ୟକ୍ରମ ସ୍ଥିରୀକୃତ ହେବ ବୋଲି ମହାସଂଘ ଜିଲ୍ଲା ସଭାପତି ରାଜେଶ ଝାଙ୍କର ମତ ପ୍ରକାଶ କରିଥିଲେ । ଜିଲ୍ଲା  ଉପସଭାପତି ଦିଲୀପ ସାହୁ, ସମ୍ପାଦକ ଚଞ୍ଚଳ ମିଶ୍ର ସଂଗଠନକୁ ଜିଲ୍ଲା ବ୍ୟାପୀ ଦୃଢ କରାଯିବା ପାଇଁ ମତ ପ୍ରକାଶ କରିଥିଲେ । ସାଧାରଣ ସମ୍ପାଦକ ଆର୍ତ୍ତତ୍ରାଣ ସାହୁ, ସାଂଗଠନିକ ସମ୍ପାଦକ ଆଶୁତୋଷ ବେହେରା, କାର୍ଯ୍ୟକାରୀ କମିଟୀର ମୁଖ୍ୟ ନିରୋଜ ମିଶ୍ର, ସହ  ସମ୍ପାଦକ ସୁନିଲ ମିଶ୍ର, କୋଷାଧ୍ୟକ୍ଷ ସତ୍ୟାନନ୍ଦ ସେଠଙ୍କ ସହ ଅନ୍ୟାନ୍ୟ ବହୁ କାର୍ଯ୍ୟକର୍ତ୍ତା ସଭାରେ ଉପସ୍ଥିତ ଥିଲେ । ସଭା ଶେଷରେ ସୁନିଲ ମିଶ୍ର ଧନ୍ୟବାଦ ଅର୍ପଣ କରି ପଣ୍ଡାଙ୍କ ମାର୍ଗଦର୍ଶନ ସଂଘକୁ ଆହୁରି ଶକ୍ତିଶାଳୀ କରିବ ବୋଲି ପ୍ରକାଶ କରିଥିଲେ ।