19-Aug-2022

ବର୍ତ୍ତମାନ ସମୟରେ ଫଟୋ ଉଠେଇବା ପ୍ରାୟ ସମସ୍ତଙ୍କର ପସନ୍ଦ । ମୋବାଇଲ୍ ରେ କ୍ୟାମେରା ସୁବିଧା ଉପଲବ୍ଧ ହେବା ପରଠୁ ପ୍ରାୟ ସମସ୍ତଙ୍କର ଫଟୋ ଉଠେଇବା ଏକ ଦୁର୍ବଳତା ହୋଇଯାଇଛି କହିଲେ ଭୁଲ୍ ହେବନାହିଁ । ଅନେକ ଲୋକ ଅଛନ୍ତି ଯେଉଁମାନଙ୍କୁ ଫଟୋ ଉଠେଇବା କୁ ଖୁବ୍ ଭଲଲାଗେ । ଏମିତି କି ପ୍ରତ୍ୟେକ ଦିନ କିଛି ନା କିଛି ଫଟୋ ଉଠେଇ ସୃତି ଆକାରରେ ସାଇତି ରଖିବାକୁ ଅଭ୍ୟସ୍ତ ହୋଇଯାଇଛନ୍ତି । ଶେଯ ରୁ ଉଠିବା ଠାରୁ ଶୋଇବା ପର୍ଯ୍ୟନ୍ତ ଅନେକ ମୂହୁର୍ତ୍ତକୁ ଫଟୋ ହିସାବରେ କଏଦ୍ କରନ୍ତି । କିନ୍ତୁ ସମସ୍ତଙ୍କ ପାଖରେ କ୍ୟାମେରା ବା ମୋବାଇଲ୍ ଥିଲେ ସୁଦ୍ଧା, ବାହାଘର, ବ୍ରତ, ଜନ୍ମଦିନ, କିମ୍ବା ବିଭିନ୍ନ ଉତ୍ସବ ଆଦିକୁ ସ୍ବତନ୍ତ୍ର ଢଙ୍ଗରେ ଚିରଦିନ ପାଇଁ ସାଇତି ରଖିବାକୁ ପେଶାଦାର ଫଟୋଗ୍ରାଫର୍ ଲୋଡାପଡନ୍ତି ।

ଗୋଟିଏ ଫ୍ରେମ ଭିତରେ କାହାଣୀକୁ କଏଦ୍ କରିବାର କଳା ବେଶ୍ ଭଲ ଭାବରେ ଜଣେ ପେଶାଦାର ଫଟୋଗ୍ରାଫର୍ ଙ୍କୁ ଜଣା । ଯଦି ଅନ୍ୟ ଭାଷାରେ କହିବା, ଜଣେ ପେଶାଦାର ଫଟୋଗ୍ରାଫର୍ ହିଁ ଜଣେ କଳାକାର ।

ସ୍ବାଧୀନତା ପରେ ମଧ୍ୟ ଫଟୋଗ୍ରାଫି ସେତିକି ସମ୍ପ୍ରସାରିତ ହୋଇନଥିଲା । ସେତେ ମାତ୍ରାରେ ନାଥିଲେ ପେଶାଦାର ଫଟୋଗ୍ରାଫର୍, ନାଥିଲା ଫୋଟୋଗ୍ରାଫି ବିଷୟରେ ଶିକ୍ଷାଲାଭ କରିବାର ବ୍ୟବସ୍ଥା । ପଶ୍ଚିମ ଓଡ଼ିଶାରେ ଫଟୋଗ୍ରାଫ୍ରର୍ କହିଲେ ସୁଦୂର କଲିକତା, ବମ୍ବେ ଓ ମାଡ୍ରାସରୁ ଆସି ଏଠାରେ ଫଟୋ ଷ୍ଟୁଡିଓ ଖୋଲିଥିଲେ । ସେହି ସମୟରେ ଫଟୋଗ୍ରାଫି କହିଲେ ଅନ୍ଧାରୁଆ କୋଠରୀ ବା ଡାର୍କରୁମ୍ ଭିତରେ ସୀମିତ ଥିଲା । ଏବେ ସହଜରେ ଉପଲବ୍ଧ ଥିବା ଭଳି ଛୋଟିଆ କ୍ୟାମେରା ନଥିଲା। ବିରାଟକାୟ କ୍ୟାମେରା କୁ କଳା କପଡ଼ାରେ ଘରଟିଏ ପରି ଘୋଡେ଼ଇ ରଖି, ସେଥିରେ ଏକ ଛିଦ୍ର କରି ଅତି କଷ୍ଟରେ ଫଟୋ ଉତ୍ତୋଳନ କରାଯାଉଥିଲା ।
 ବରଗଡ ଜିଲ୍ଲା ବରପାଲି ରେ ଜନ୍ମିତ ବୀରବର ସାହୁ ହେଉଛନ୍ତି ସେ ସମୟର ବେଶ ଚର୍ଚ୍ଚିତ ଚେହେରା। ତାଙ୍କ ଜନ୍ମ ତା ୧୫.୦୭.୧୯୧୬ ରେ ହୋଇଥିବାବେଳେ, ତାଙ୍କ ତିରୋଧାନ ତା ୦୬.୧୧.୨୦୦୮ ରେ ହୋଇଥିଲା। 
ପଶ୍ଚିମ ଓଡ଼ିଶା ଏଇ  ପେଶାଦାର ଫଟୋଗ୍ରାଫର୍ ଙ୍କର ଗୋଟିଏ ରୋଚକ ତଥ୍ୟ ଅଛି । ଥରେ କିଛି ଆମେରିକୀୟ ଫଟୋଗ୍ରାଫର୍ ଏବେର ବରଗଡ ଜିଲ୍ଲାର ବରପାଲି ଅଞ୍ଚଳକୁ ଆସିଥିଲେ । ସେତେବେଳେ ସ୍ଥାନୀୟ ଅଞ୍ଚଳର ବିଶିଷ୍ଟ ଚିତ୍ର ଶିଳ୍ପୀ ବୀରବର ସାହୁ ସେମାନଙ୍କ ସହ ଭେଟ ହୁଅନ୍ତି । ସେ ଜଣେ ନିପୁଣ ଚିତ୍ରକର ଥିଲେ । ବିଭିନ୍ନ ନାଟକ ମାନଙ୍କରେ ମଞ୍ଚ ପଛପଟେ ଆବଶ୍ୟକତା ଅନୁସାରେ ବଡ଼ ପରଦାରେ ବିଭିନ୍ନ ଚିତ୍ର ଅଙ୍କନ କରିବାରେ ଥିଲେ ସିଦ୍ଧହସ୍ତ ‌। 

। ସେ ଆମେରିକୀୟ ମାନଙ୍କ ଠାରୁ ଫଟୋ ଉତ୍ତୋଳନ ଶୈଳୀ ଶିଖିବା ପରେ ବରଗଡ ସହରରେ ୧୯୫୮ ମସିହାରେ ପ୍ରଥମେ ପେଶାଦାର ଫଟୋଗ୍ରାଫର୍ ହିସାବରେ "ସାହୁ ଫଟୋ ଷ୍ଟୁଡିଓ" ଖୋଲିଥିଲେ । ସେ ହେଉଛନ୍ତି ପଶ୍ଚିମ ଓଡ଼ିଶା ମାଟିରେ ଜନ୍ମ ହୋଇଥିବା  ବରଗଡ ର ଜଣାଶୁଣା ଫଟୋଗ୍ରାଫର୍ । ସମୟକ୍ରମେ ଫଟୋଗ୍ରାଫି ପେଶା ବେଶ୍ ଲୋକପ୍ରିୟ ହେଲା ଏବଂ ଆର୍ଥିକ ସ୍ବଚ୍ଛଳ ଓ ସମୃଦ୍ଧ ହେବାରେ ସହାୟକ ହୋଇପାରିଥିଲା।

(ପ୍ରସ୍ତୁତି : ନିରଞ୍ଜନ ତ୍ରିପାଠୀ, ବରଗଡ଼ )