31-Jul-2022

ବଲାଙ୍ଗିର,(ପ୍ରେରଣା ଖବର) -ସ୍ଥାନୀୟ ମାଲପଡା ସ୍ଥିତ ବଲାଙ୍ଗିର ରେଳ ଉପଭୋକ୍ତା ସଂଘର କାର୍ଯ୍ୟାଳୟ ଠାରେ ସମ୍ବଲପୁର ରେଳ ମଣ୍ଡଳ ଅଧିନସ୍ଥ ବିଭିନ୍ନ ଜିଲାର ରେଳ ଉପଭୋକ୍ତା ସଂଘର ସଭାପତି ଓ ସଂପାଦକମାନଙ୍କୁ ନେଇ ଆଜି ଏକ ବୈଠକ ଅନୁଷ୍ଠିତ ହୋଇଥିଲା । ବଲାଙ୍ଗିର ଜିଲ୍ଲା ରେଳ ଉପଭୋକ୍ତା ସଂଘର ସଭାପତି ପ୍ରଫେସର ତରୁଣ କୁମାର ମିଶ୍ରଙ୍କ ସଭାପତିତ୍ୱରେ ଅନୁଷ୍ଠିତ ବୈଠକରେ ବଲାଙ୍ଗିର-ଖୋର୍ଦ୍ଧା ରେଳ ଲାଇନ କିପରି ଶିଘ୍ର ହୋଇପାରିବ, ପୁରୀ-ସମ୍ବଲପରୁ ଇଣ୍ଟରସିଟି କୁ ବଲାଙ୍ଗିର ପର୍ଯ୍ୟନ୍ତ ସଂପ୍ରସାରଣ, ହୀରାକୁଦ-ବିଶାଖାପାଟଣା ଏକ୍ସପ୍ରେସକୁ ୩ଦିନ ବଲାଙ୍ଗିର ଦେଇ ଦିଲ୍ଲୀ ଜିବା ଆସିବା କରିବା, ଜମ୍ମୁ-ତାୱି ଏକ୍ସପ୍ରେସକୁ ବଲାଙ୍ଗିର ଦେଇ ଚଳାଚଳ କରିବା, ବଲାଙ୍ଗିର ରେଳ ଷ୍ଟେସନ ଠାରେ ଏକ ୱାସିଙ୍ଗ ସେଣ୍ଟର ସ୍ଥାପନ କରିବା ଆଦି ଦାବି ସହ ବିଭିନ୍ନ ବିଷୟରେ ଆଲୋଚନ ହୋଇଥିଲା । ରେଳ ବିଭାଗ ପକ୍ଷରୁ ପଶ୍ଚିମ ଓଡିଶାକୁ ସବୁ କ୍ଷେତ୍ରରେ ଅବହେଳା କରାଯାଉଛି ବୋଲି ଉପସ୍ଥିତ ସମସ୍ତ ଜିଲାର ପ୍ରତିନିଧିମାନେ ଉଦ୍‌ବେଗ ପ୍ରକାଶ କରିଥିଲେ ।  ତେଣୁ ପଶ୍ଚିମ ଓଡିଶାର ସମସ୍ତ ଜିଲ୍ଲାମାନଙ୍କୁ ନେଇ ଏକ ଜଏଣ୍ଟ କୋଡିନେସନ କମିଟି ଗଠନ କରାଯିବାକୁ ବୈଠକରେ ପ୍ରସ୍ତାବ ପାରିତ କରାଯାଇଥିଲା । ପରେ ଏହି ସମସ୍ତ ଦାବି ଗୁଡିକ ଉପସ୍ଥାପନ କରିବା ପାଇଁ ଉପସ୍ଥିତ ସମସ୍ତ ଜିଲାକୁ ନେଇ ଏକ କୋଡିନେସନ କମିଟି ଗଠନ କରାଯାଇଥିଲା । ତା’ର ନାଁ ପଶ୍ଚିମ ଓଡିଶା ରେଳ ଉପଭୋକ୍ତା ସଂଘ ସମ୍ମନ୍ୱୟ ସମିତି ନାମରେ ନାମିତ କରାଯିବ ସହ ସର୍ବସମ୍ମତି କ୍ରମେ ବଲାଙ୍ଗିର ଜିଲା ରେଳ ଉପଭୋକ୍ତା ସଂଘର ସଭାପତି ପ୍ରଫେସର ତରୁଣ କୁମାର ମିଶ୍ରଙ୍କୁ ଏହି କମିଟିର କନ୍‌ଭେନର ଭାବେ ମନୋନିତ ଯାଇଥିଲା । ଜଏଣ୍ଟ କନଭେନର ଭାବେ ବଲାଙ୍ଗିର ଜିଳ୍ଲା ରେଳ ଉପଭୋକ୍ତା ସଂଘର ସାଧାରଣ ସଂପାଦକ ନାରାୟଣ ପାଢୀ ଓ ବରଗଡ ରେଳ ଉପଭୋକ୍ତ ସଂଘର କୃଷ୍ଣଚନ୍ଦ୍ର ପଣ୍ଡା, ଏବଂ କମଳ ଯୋଶୀ(ବରଗଡ)ଙ୍କୁ କଷୋଧକ୍ଷ୍ୟ ଭାବେ ମନୋନିତ କରାଯାଇଥିଲା । ସଦସ୍ୟ ଭାବେ ଗୋରଖନାଥ ସାହୁ(ସୋନପୁର), ବରଗଡ ଜିଲାରୁ କିଶୋର କୁମାର ରଥ ଓ  ବୌଦ୍ଧ ଜିଲାରୁ ଦେବାଶିଷ ପୁରୋହିତ, ବଲାଙ୍ଗିର ଜିଲାରୁ ଅଶୋକ କୁମାର ମିଶ୍ର, ପ୍ରଭାକର ମିଶ୍ର, ଦିବାକାର ହୋତା ଓ ରୁତୁରାଜ ସିଂହଙ୍କୁ ମନୋନିତ କରାଯାଇଥିଲା । ଆଗାମୀ

ଦିନରେ ଏହି କମିଟିକୁ ବ୍ୟାପକ କରାଯିବା ସହ ସମସ୍ତ ଜିଲାରୁ ଯେପରି ପ୍ରତିନିଧିତ୍ୱ କରିବେ ସେ ନେଇ ଚେଷ୍ଟା କରାଯିବ ଏବଂ ପଶ୍ଚିମ ଓଡିଶାର ସମସ୍ତ ଜିଲା ପ୍ରତିନିଧିତ୍ୱ କଲେ ଏକ ନୂଆଁ କମିଟ ଗଠନ କରି ସଭାପତି ଓ ସଂପାଦକ ଚୟନ କରାଯିବ । ପୂର୍ଣ୍ଣାଙ୍ଗ କମିଟି ଗଠନ ନହେବା ପର୍ଯ୍ୟନ୍ତ ଏହି କମିଟି କାର୍ଯ୍ୟ କରିବ ବୋଲି ସର୍ବସମ୍ମତିକ୍ରମେ ଗୃହିତ ହୋଇଥିଲା । ଏହି କମିଟି ଆଗାମୀ ଦିନରେ ଜି.ଏମ୍ ଭୂବନେଶ୍ୱର, ରେଳମନ୍ତ୍ରୀ, ପ୍ରଧାନମନ୍ତ୍ରୀ ଓ ରାଷ୍ଟ୍ରପତିଙ୍କୁ ସାକ୍ଷାତ କରି ପଶ୍ଚିମ ଓଡିଶାରେ ଥିବା ରେଳ ଷ୍ଟେସନମାନଙ୍କର ଉନ୍ନତି କରଣ, ବଲାଙ୍ଗିର-ଖୋର୍ଦ୍ଧା ରେଳ ଲାଇନର ବଲାଙ୍ଗିର ପଟରୁ ଚାଲିଥିବା କାମ ଶିଘ୍ର ତ୍ୱାରାନ୍ୱିତ କରିବା, ନୂତନ ରେଳ ଲାଇନ ଗୁଡିକର ଶିଘ୍ର ସର୍ଭେକାମ ସାରି ରେଳ ଲାଇନ ପକାଇବା, ରେଳ ଉପଭୋକ୍ତମାନଙ୍କ ମୌଳିକ ସୁବିଧା ସୁଯୋଗ କରିବା ଆଦି ଦାବି ଗୁଡିକୁ ଉପସ୍ଥାପନ କରିବ ବୋଲି ପ୍ରସ୍ତାବ ଗୃହିତ ହୋଇଥିଲା । ଶେଷରେ ବଲାଙ୍ଗିର ରେଳ ଉପଭୋକ୍ତା ସଂଘର ସାଧାରଣ ସଂପାଦକ ନାରାୟଣ ପାଢୀ ଧନ୍ୟବାଦ ଦେଇଥିଲେ ।