31-Jul-2022

ବଲାଙ୍ଗୀର,(ପ୍ରେରଣା ଖବର)-ଗତକାଲି ସଂଧ୍ୟାରେ ବଲାଙ୍ଗୀର ନାଗରିକ କମିଟିର ଏକ ପ୍ରତିନିଧି ଦଳ ବିଭିନ୍ନ ସମସ୍ୟାକୁ ନେଇ ବଲାଙ୍ଗୀର ଜିଲ୍ଲାପାଳ ଶ୍ରୀ ଚଂଚଳ ରାଣାଙ୍କୁ ସାକ୍ଷାତ କରି ଏକ ସୌହାଦ୍ଦ୍ୟପୂର୍ଣ୍ଣ ବାତାବରଣ ମଧ୍ୟରେ ଆଲୋଚନା ହୋଇଥିଲା । ବିଭିନ୍ନ ସମସ୍ୟା ମୁଖ୍ୟତଃ ୨୩ ତାରିଖରୁ ବନ୍ଦ ପଡିଥିବା ସ୍ଥାନୀୟ ମହିଳା ମହାବିଦ୍ୟାଳୟର ଛାତ୍ରୀ ନିବାସକୁ ଶୀଘ୍ର ଖୋଲିବା ପାଇଁ ବ୍ୟବସ୍ଥା କରିବା, ପାଟଣେଶ୍ୱରୀ ମନ୍ଦିରର ରକ୍ଷଣାବେକ୍ଷଣ, ରାଜେନ୍ଦ୍ର ବିଶ୍ୱବିଦ୍ୟାଳୟ ଓ ବିଇଡି କଲେଜ ର ନିଜସ୍ୱ ପଟ୍ଟା ତିଆରି କରିବା ତଥା ଲୋୟର ସୁକତେଲ ପ୍ରକଳ୍ପର ଅଗ୍ରଗତି ସମ୍ବନ୍ଧରେ ଆଲୋଚନା ହୋଇଥିଲା । ଜିଲ୍ଲାପାଳ ଶ୍ରୀ ରାଣା ସମସ୍ତ ସମସ୍ୟାର ଶୀଘ୍ର ସମାଧାନ ପାଇଁ କମିଟି ର ପ୍ରତିନିଧି ଦଳକୁ ଆଶ୍ୱସନା ଦେଇଥିଲେ । ପ୍ରତିନିଧି ଦଳରେ ସଭାପତି ବେଲା ସିଂ ଭୋଇ, ସାଧାରଣ ସଂପାଦକ ମନୋରଂଜନ ସାହୁ, ସହସଂପାଦକ ଚକ୍ରପାଣି ଦାଶ, ବରିଷ୍ଠ ସଭ୍ୟ ଅଶୋକ ମିଶ୍ର ପ୍ରମୁଖ ଅଂଶଗ୍ରହଣ କରିଥିଲେ । ପରେ ପରେ ଏ ସମସ୍ତ ବିଷୟ ବ୍ୟତିତ ରେଲୱେ ଓ ଅନ୍ୟାନ୍ୟ ବିଷୟକୁ ନେଇ କାର୍ଯ୍ୟକାରୀ କମିଟିର ବୈଠକ ସ୍ଥାନୀୟ ଜେଏସ୍‌ଏମ୍ କଲେଜ ଠାରେ ଅନୁଷ୍ଠିତ ହୋଇଥିଲା । ଏଥିରେ ଉପସଭାପତି ନିତ୍ୟାନନ୍ଦ ମିଶ୍ର, ସଭ୍ୟା ପଙ୍କଜିନୀ ପଣ୍ଡା, ସଭ୍ୟ ଜୟରାମ ମିଶ୍ର, ଦିବାକର ହୋତା ଓ ବ୍ରଜରାଜ ପୁରୋହିତ ପ୍ରମୁଖ ଅଂଶଗ୍ରହଣ କରିଥିଲେ ।