18-May-2022

ଟିଟିଲାଗଡ ବ୍ଲକ ଶିହିନୀ ଗାଁ ରେ ପ୍ରବଳ ମାତ୍ରାରେ ମଦ ବିକ୍ରି ହେଉଥିବାରୁ ଏହାକୁ ବିରୋଧ କରିଛନ୍ତି ସ୍ଥାନୀୟ ଲୋକେ । ଶିହିନୀ ଗାଁ ରେ କିଛି କୁଚିଆ ମଦ ବ୍ୟବସାୟୀ ପ୍ରବଳ ମାତ୍ରା ରେ ମଦ ବିକ୍ରି କରୁଥିବାରୁ ଗାଁ ର ପରିବେଶ ନଷ୍ଟ ହେଉଛି ଓ ବୁଢା ଠୁ ଆରମ୍ଭ କରି ଛୋଟ ଛୋଟ ଛୁଆ ମାନେ ମଧ୍ୟ ମଦ ପିଇବା ଆରମ୍ଭ କରି ଦେଇଛନ୍ତି ବୋଲି ଅଭିଯୋଗ ହେଉଛି । ଶିହିନୀ ଗାଁ ର ଅଧିକାଂଶ ଲୋକେ କୁଲି ମଜୁରିଆ ହୋଇଥିବାରୁ ସହର କୁ କାମ ଧନ୍ଦା ପାଇଁ ଆସିଥାନ୍ତି ଓ ଯାହା କିଛି ରୋଜଗାର କରୁଛନ୍ତି ତାହା ମଦ ପିଇ ଖର୍ଚ୍ଚ କରିଦେଉଛନ୍ତି ଯାହା ଦ୍ବାରା ପରିବାର ଚଳାଇବାରେ ଭାରି କଷ୍ଟ ହେଉଛି , ଅନ୍ୟ ପଟେ ମଦ ବ୍ୟବସାୟୀ ଗାଁ ରେ କୁଚିଆ ବ୍ୟବସାୟୀ ଙ୍କୁ ପ୍ରୋତ୍ସାହିତ କରି ନିଜ ବ୍ୟବସାୟ ଜାରି ରଖିଛି ଯାହା ଦ୍ବାରା ବର୍ତ୍ତମାନ ଗାଁ ରେ ଘରେ ଘରେ କୁଚିଆ ମଦ ବ୍ୟବସାୟ ଚାଲୁ ରହିଛି । ଗାଁ ରେ ମଦ ବିକ୍ରି ବନ୍ଦ କରିବା ସହିତ କୁଚିଆ ବ୍ୟବସାୟୀଙ୍କୁ ଆୟତ୍ତ କରିବା ଦାବି ରେ ଆଜି ଶିହିନୀ ଗାଁ ର ସରପଞ୍ଚ ବିରବର ସାହୁ ଙ୍କ ସମେତ ଶତାଧିକ ପୁରୁଷ ଓ ମହିଳା ସ୍ବୟଂସହାୟକ ଗୋଷ୍ଠୀର ମାଁ ଗୌରୀ, ମମତା, ଶୀଖା, ବୀଣାପାଣି , ଘଣ୍ଟାସୁନୀ , ଇନ୍ଦିରା ନାରୀ ସଂଘ, ମାଁ ସିନ୍ଦୁରି , ମାଁ ଦୁର୍ଗା , ମାଁ ଧନଲକ୍ଷ୍ମି, ଡଙ୍ଗରବୁଢା, ସନ୍ତୋଷୀ, ଜାଗୃତି ସ୍ବୟଂସହାୟକ ଗୋଷ୍ଠୀ ଏମିତି ୩୫ ଟି ମହିଲା ସ୍ବୟଂସହାୟକ ଗୋଷ୍ଠୀ ର ମହିଳା ଟିଟିଲାଗଡ ଉପଜିଲ୍ଲାପାଳ ଙ୍କ କାର୍ୟାଳୟ ସମ୍ମୁଖରେ ଧାରଣ ଦେବା ସହିତ ବିକ୍ଷୋଭ ପ୍ରଦର୍ଶନ କରିଥିଲେ ଓ ଏ ସମ୍ପର୍କରେ ଟିଟିଲାଗଡ ଉପଜିଲ୍ଲାପାଳ ଙ୍କୁ ଏକ ଦାବି ପତ୍ର ପ୍ରଦାନ କରିଥିଲେ । ଉପଜିଲ୍ଲାପାଳ ଏ ସମ୍ପର୍କରେ ପଦକ୍ଷେପ ନେବେ ବୋଲି ପ୍ରତିଶ୍ରୁତି ଦେଇଥିଲେ ।