16-May-2022

ଟିଟିଲାଗଡ ଦେଇ ସମତା ଏକ୍ସପ୍ରେସ ରେ ଗଞ୍ଜେଇ ଚୋରା ଚାଲାଣ ହେଉଥିବା ସମ୍ପର୍କରେ ବିଶ୍ଵସ୍ତ ସୂତ୍ରରୁ ଖବର ପାଇ ରେଳବାଇ ସୁରକ୍ଷା ବଳ ଆଇଆଇସି ଧର୍ମେନ୍ଦ୍ର ମିଶ୍ର ସିଆଇବି,ଏସଆଇବି ଦଳ କୁ ଖବର ଦେଇ ସମତା ଏକ୍ସପ୍ରେସ ଷ୍ଟେସନ କୁ ଆସିବା ପୂର୍ବରୁ ମିଳିତ ଟିମ୍ ପ୍ଲାଟଫର୍ମ ରେ ଉପସ୍ଥିତ ଥିଲେ। ସମତା ଏକ୍ସପ୍ରେସ ପହଞ୍ଚିବା ପରେ ଏହି ସ୍ଵତନ୍ତ୍ର ଦଳ ପର୍ଯ୍ୟାୟକ୍ରମେ ସମସ୍ତ ବଗି ରେ ଛାନଭିନ କରିବା ସହ ଟ୍ରେନ ର ଶେଷ ଭାଗରେ ରହିଥିବା ସାଧାରଣ ଶ୍ରେଣୀ ବଗି ରେ ଦୁଇଜଣ ଯୁବକ ସନ୍ଦିଗ୍ଧ ଅବସ୍ଥାରେ ରହିଥିବା ଓ ସିଟ ତଳ ଭାଗରେ ଦୁଇଟି ଟ୍ରଲି ବ୍ୟାଗ୍ ରହିଥିବା ଦେଖିବାକୁ ପାଇ ସନ୍ଦେହ ରେ ଉକ୍ତ ଟ୍ରଲି ବ୍ୟାଗ୍ କୁ ଯାଞ୍ଚ କରିବା ରୁ ଗଞ୍ଜେଇ ଥିବା ଜଣା ପଡିଥିଲା। ଉଭୟ ଅଭିଯୁକ୍ତ ଙ୍କ ସହ ଗଞ୍ଜେଇ କୁ ଜବତ କରି ଆରପିଏଫ୍ କାର୍ଯ୍ୟାଳୟ କୁ ଆଣିଥିଲେ। ଜବତ

ଗଞ୍ଜେଇ କୁ ଓଜନ କରାଯାଇଥିବା ବେଳେ ତାହା ୩୪ କେଜି ଥିବା ଜଣା ପଡିଥିଲା। ଏଥି ସହ ଉକ୍ତ ଗଞ୍ଜେଇ ପାର୍ବତୀପୁର ରୁ ଦିଲ୍ଲୀ କୁ ଚାଲାଣ କରାଯାଉଥିବା ଏବଂ ଅଭିଯୁକ୍ତ ଯୁବକ ଦ୍ବୟ ଉତ୍ତରପ୍ରଦେଶ ଗଜିଆବାଦ ଜିଲ୍ଲା ନିବାସୀ ପୱନ ସିଂ (୨୪) ହିମାଂଶୁ ଶର୍ମା (୨୫) ବୋଲି ଜଣା ପଡିଥିଲା।ଉଭୟ ଅଭିଯୁକ୍ତ ଙ୍କୁ ଜି.ଆର.ପି କୁ ହସ୍ତାନ୍ତର କରାଯାଇଥିବା ବେଳେ ଜିଆରପି ପକ୍ଷରୁ ମାମଲା ରୁଜୁ କରାଯାଇ ଅଭିଯୁକ୍ତ ଙ୍କୁ କୋର୍ଟ ଚାଲାଣ କରାଯାଇଛି।ଏହି ଚଢାଉ ରେ ଆରପିଏଫ ଏସଆଇ ରମେଶ ଚନ୍ଦ୍ର ପାତ୍ର, କୁମାର ସତ୍ୟମ୍, ଚୈତନ୍ୟ ବାଗ, ପରମାନନ୍ଦ ଭାଟି, ଅଭୟ ସ୍ୱାଇଁ ପ୍ରମୁଖ ଉପସ୍ଥିତ ଥିଲେ।