19-Nov-2020

ରେଢାଖୋଲ,(ଅନୀଲ କୁମାର ପୁଷ୍ଟି) - ସମ୍ବଲପୁର ଜିଲ୍ଲା ରେଢ଼ାଖୋଲ ଥାନା ଅନ୍ତର୍ଗତ ରାଞ୍ଚି-ବିଜୟୱାଡ଼ା  ଜାତୀୟ ରାଜପଥ ତଥା ନାକଟିଦେଉଳ -ରେଢାଖୋଲ ରାସ୍ତାର ଡିମିରିକୁଦା ଗ୍ରାମ ନିକଟସ୍ଥ ପୋଲଠାରେ ଏକ ମର୍ମନ୍ତୁଦ ସଡ଼କ ଦୁର୍ଘଟଣାରେ ୨ବାଇକ ଆରୋହୀଙ୍କ ମୃତ୍ୟୁ ଘଟିଛି। ମୃତ ଯୁବକ ଦ୍ବୟ  ହେଲେ ରେଢ଼ାଖୋଲ  ସହର ଏଲଆଇସି କଲୋନୀର ତଥା ଡିମିରିକୁଡ଼ା  ଗ୍ରାମର ମୂଳବାସିନ୍ଦା ସ୍ବର୍ଗତ ପ୍ରଭାତ ପାଣିଗ୍ରାହୀଙ୍କ ପୁଅ ଅଭିଜିତ ପାଣିଗ୍ରାହୀ(୨୭) ଓ  ରେଢାଖୋଲ ସହର ରଥସାହିର  ବୈକୁଣ୍ଠ ନାଥ ପ୍ରଧାନଙ୍କ ପୁଅ ରାମଚନ୍ଦ୍ର ପ୍ରଧାନ(୨୬) । ମୃତ ଖବର ପ୍ରଚାରିତ ହେବା ପରେ ରେଢାଖୋଲ ସହର ଅଞ୍ଚଳରେ ଶୋକର ଛାୟା ଖେଳିଯାଇଛି। ଶୁକ୍ରବାର ସକାଳେ ରେଢାଖୋଲ ପୋଲିସ ଖବର ପାଇ ଦୁର୍ଘଟଣା ସ୍ଥଳକୁ ଯାଇ ମୃତ ଦେହକୁ ଜବତ କରି  ଏ ସଂକ୍ରାନ୍ତରେ ଏକ ଅପମୃତ୍ୟୁ ମାମଲା ରୁଜୁ କରି ଶବକୁ ରେଢାଖୋଲ ଉପଖଣ୍ଡ ଡାକ୍ତରଖାନାକୁ ଆଣି ପୋଷ୍ଟ ମାର୍ଟମ କରି ମୁତ ଦେହକୁ ପରିବାର ବର୍ଗଙ୍କୁ ହସ୍ତାନ୍ତର କରିଛି।

ସୂଚନାଅନୁସାରେ, ବୁଧବାର ବିଳମ୍ବିତ ରାତିରେ ବାଇକ (ଓଡ଼ି ୧୫ଏନ ୫୪୨୧) ନମ୍ବର ବିଶିଷ୍ଟ ବାଇକରେ ଅଭିଜିତ  ଓ ରାମଚନ୍ଦ୍ର ନାକଟିଦେଉଳ ପଟୁ ରେଢ଼ାଖୋଲ ଅଭିମୁଖେ ଆସୁଥିବା ବେଳେ ଭାରସାମ୍ୟ ହରାଇ ଡିମିରିକୁଦା ଗ୍ରାମ ନିକଟସ୍ଥ ପୋଲ ବାଡ଼ରେ ବାଡ଼େଇ ହୋଇ ତଳେ ପଡ଼ିଯାଇଥିଲେ। ଏହା ଫଳରେ ଘଟଣାସ୍ଥଳରେ ଦୁହିଁଙ୍କ ମୃତ୍ୟୁ ହୋଇଥିବା ଅନୁମାନ କରାଯାଉଛି। ଆଜି  ଶୁକ୍ରବାର ସକାଳୁ ପ୍ରାତଃ ଭ୍ରମଣରେ ଯାଉଥିବା କିଛି ଲୋକ ଦୁହିଁଙ୍କୁ ତଳେ ପଡ଼ିଥିବାର ଦେଖି ପୁଲିସକୁ ସୂଚନା ଦେଇଥିଲେ। ପୁଲିସ ଘଟଣାସ୍ଥଳରେ ପହଞ୍ଚିବା ପରେ ସେମାନଙ୍କ ମୃତ୍ୟୁ ହୋଇସାରିଥିବା ଜାଣି ଶବ ଜବତ କରିବା ସହ ତଦନ୍ତ  କରିଛନ୍ତି।