08-Apr-2022

ପଦ୍ମପୁର:(ନିରଞ୍ଜନ ତ୍ରିପାଠୀ)-ପଦ୍ମପୁର ଉପଖଣ୍ଡ ଟାଲ ଠାରେ ଶ୍ରୀ ଶ୍ରୀ ଶିରିଡ଼ି ସାଇ ମନ୍ଦିର ପ୍ରତିଷ୍ଠା ଉତ୍ସବ ଆରମ୍ଭ ହୋଇଯାଇଛି । ପ୍ରଶାସନିକ ଅଧିକାରୀ ଶ୍ରୀଯୁକ୍ତ ମହେନ୍ଦ୍ର ବଢେଇଙ୍କ ପ୍ରଚେଷ୍ଟାରେ ନିର୍ମିତ ସାଇ ମନ୍ଦିର ପ୍ରତିଷ୍ଠା ଉତ୍ସବ ଗୁରୁବାର ସନ୍ଧ୍ୟାରେ କଲସ ଯାତ୍ରା ସହ ଆରମ୍ଭ ହୋଇଯାଇଛି। ଅଚ୍ୟୁତାନନ୍ଦ ହୋତା, ବିଜୟ କୁମାର ହୋତା, ଦଧିବାବନ ମିଶ୍ର, ଶଶିଭୂଷଣ ମିଶ୍ର, ହିମାଂଶୁ ପଣ୍ଡା, ସଚିପତି ହୋତା, ଦଶରଥ ହୋତା ପ୍ରମୁଖ ପଣ୍ଡିତଙ୍କ ମନ୍ତ୍ରଚାରଣରେ ଟାଲ, ଜ୍ଞାନ, ମେଲଛାମୁଣ୍ଡା, ସର୍ଗିବାହାଲ ଆଦି ପଞ୍ଚାୟତ ର ଶତାଧିକ ମହିଳାଙ୍କ ଦ୍ବାରା ୫୦୧ ପୂର୍ଣ୍ଣ କଳସ ନିକଟସ୍ଥ ବଡବନ୍ଧରୁ ଏକ ବର୍ଣ୍ଣାଢ଼୍ୟ ଶୋଭାଯାତ୍ରାରେ ଗ୍ରାମ ପରିକ୍ରମା କରି ମଣ୍ଡପରେ ସ୍ଥାପନା କଲାପରେ ପୂଜାକାର୍ଯ୍ୟ ଆରମ୍ଭ ହୋଇଥିଲା। ପୂଜା କାର୍ଯ୍ୟରେ ମହେନ୍ଦ୍ର ବଢେଇ ଓ ତାଙ୍କ ପତ୍ନୀ ମଞ୍ଜୁଲତା ବଢେଇ ମୂଖ୍ୟ କର୍ତ୍ତା ଦାୟିତ୍ଵ ତୁଲାଇଥିବା ବେଳେ ଉମେଶ ବଢେଇ ଓ ଆନୁସୟା ବଢେଇ, ସହଦେବ ବିଶ୍ବାଲ ଓ ଅହଲ୍ୟା ବିଶ୍ବାଲ, ରଞ୍ଜିତ ଭୋଇ ଓ ଲୋଚନା ଭୋଇ, ଶିବ ସାହୁ ଓ ବିମଲା ସାହୁ, ଦିନମଣି ବିଶ୍ବାଲ ଓ ଅରୁଣା ବିଶ୍ବାଳ, ଡୋଲାମଣୀ ପଧାନ ଓ ପଦ୍ମିନୀ ପଧାନ ପ୍ରମୁଖ ସହଯୋଗୀ କର୍ତ୍ତା ଦାୟିତ୍ଵ ତୁଲାଉଛନ୍ତି। କଲସ ଶୋଭାଯାତ୍ରାରେ ରେଙ୍ଗାଲିର ଘଣ୍ଟବାଦ୍ୟ, ବ୍ରହ୍ମପୁର ର ବ୍ୟାଣ୍ଡ, ଝରର ଆଦିବାସୀ ନୃତ୍ୟ, ତେଲମହୁଲ ର ଦୁଲଦୁଲି, ଗଞ୍ଜାଗୁଡାର କଲଙ୍ଗିନାଚ, ବ୍ରହ୍ମପୁର ର ଶଂଖ ଓ ଟାଲର ସଂକିର୍ତ୍ତନ ଦଳ ପ୍ରମୁଖ ସାମିଲ ହୋଇଥିଲେ। କଲସ ଶୋଭାଯାତ୍ରାକୁ ଗ୍ରାମର ପ୍ରତ୍ୟେକ ଘର ସମ୍ମୁଖରେ ଦୀପ କଳସ ଦେଇ ସ୍ବାଗତ କରାଯାଇଥିଲା। ପ୍ରତିଷ୍ଠା ଉତ୍ସବ ର ସାଂସ୍କୃତିକ କାର୍ଯ୍ୟକ୍ରମ ମଣ୍ଡପକୁ ଗ୍ରାମର ୧୦୩ ବର୍ଷରେ ପଦାର୍ପଣ କରିଥିବା ଶତାୟୁ ପୁରୁଷ ଶ୍ରୀନିବାସ ପଣ୍ଡାଙ୍କ ଦ୍ଵାରା ଶୁଭ ଉଦଘାଟନ କରାଯାଇଥିବାବେଳେ କଂସ ଦରବାରକୁ ପରିଚାଳନା କମିଟି ସଭାପତି ଚନ୍ଦ୍ରମଣି ସାହୁ ଉଦଘାଟନ କରିଥିଲେ। ପୂଜା କମିଟି ତରଫରୁ ଭକ୍ତମାନଙ୍କ ପାଇଁ ଅନ୍ନଛତ୍ର ସହ କଂସ ଦରବାର, ସଂଗୀତ ସନ୍ଧ୍ୟା, ମିନାବଜାର ଆଦି ମନୋରଞ୍ଜନ କାର୍ଯ୍ୟକ୍ରମ ବ୍ୟବସ୍ଥା କରାଯାଇଛି । ଉତ୍ସବଟି ଆସନ୍ତା ୧୦ ତାରିଖ ପର୍ଯ୍ୟନ୍ତ ଚାଲିବାକୁ ଥିବା ବେଳେ ଆଜି ପ୍ରଥମ ଦିନରେ ଅଞ୍ଚଳର ବିଭିନ୍ନ ପଞ୍ଚାୟତ ର ସରପଞ୍ଚ ଓ ସମିତି ସଭ୍ୟ ମାନେ ଯୋଗ ଦେଇଥିଲେ। ଟାଲ ତଥା ଆଖପାଖ ଅଂଚଳର ସ୍ବେଚ୍ଛାସେବୀ ମାନେ ସହଯୋଗ କରିଥିଲେ।