06-Apr-2022

ବଲାଙ୍ଗୀର,୬ା୪-ବଲାଙ୍ଗୀର ଜିଲ୍ଲାର ଦେଓଗାଁ ବ୍ଲକ ଭୀମଡୁଙ୍ଗୁରୀକୁ ଏକ ପର୍ଯ୍ୟଟନସ୍ଥଳିର ମାନ୍ୟତା ମିଳିଛି ଓ ଏହାର ବିକାଶ କାମ ଆଗେଇଚାଲିଛି । ଏଠାରେ ଥିବା ଭୀମକଟାରେ ବନବିଭାଗ ତରଫରୁ ପର୍ଯ୍ୟଟକଙ୍କ ସୁବିଧା ପାଇଁ ବୋଟିଂ ବ୍ୟବସ୍ଥା କରାଯାଇଛି । ତେବେ ଗତ ଦେଢମାସ ହେଲା ଏହି ପ୍ରକଲ୍ପର କାମ ସରିଥିଲେ ହେଁ ଉଦଘାଟନ ହୋଇପାରୁନଥିଲା । ନିର୍ବାଚନ ପାଇଁ ଥିବା କଟଜଣା ପାଇଁ ଏହାର ଉଦଘାଟନ ହୋଇପାରିନଥିବା ଜଣାଯାଇଛି । ତେବେ ଗତକିଛି ଦିନ ତଳେ ନିର୍ବାଚନ ସରୁ ସରୁ ଏହି ପ୍ରକଲ୍ପରୁ ଫାଇଦା ନେବାକୁ ବିଜେଡିଦଳ କସରତ ଆରମ୍ଭ କରିଥିଲା । ରାଜ୍ୟର ନବୀନ ସରକାର ଅନୁଦାନ ଦେଇଥିବା କହି ବିଜେଡିର ବରିଷ୍ଠନେତା ତଥା ପୂର୍ବତନ ରାଜ୍ୟସଭା ସାଂସଦ ଅନଙ୍ଗଉଦୟ ସିଂଦେଓ,ଦେଓଗାଁ ବ୍ଲକର ପୂର୍ବତନ ଅଧ୍ୟକ୍ଷ ଲକ୍ଷ୍ମଣକୁମାର ମେହେରଙ୍କ ଉପସ୍ଥିତିରେ ୧୩ନମ୍ବର ଜୋନର ଜିଲ୍ଲାପରିଷଦ ସଭ୍ୟା ସୁମତି ସେଠ ଓ ମକୁନ୍ଦପୁର ସମିତିସଭ୍ୟ ଅଭିମନ୍ୟୁ

ମାଝୀ ନଡିଆବାଡେଇ ଏହାର ଉଦଘାଟନ କରିଥିଲେ । ଲକ୍ଷ୍ମଣ ମେହେରଙ୍କ ସାଙ୍ଗରେ ଡଙ୍ଗାରେ ଅନଙ୍ଗଉଦୟ ସିଂଦେଓ ବସିଥିବା ଫଟୋ ସୋସିଆଲ ମିଡିଆରେ ବୁଲୁଥିଲା । ତେବେ ଏହିଦିନ ଜଙ୍ଗଲବିଭାଗର ଜଣେ ଫରେଷ୍ଟଗାର୍ଡ ଉପସ୍ଥିତ ଥିବା ବେଳେ ଅନ୍ୟକୌଣସି ଅଧିକାରୀ ଉପସ୍ଥିତ ନଥିଲେ । ଏହାସହିତ ବୋଟଗୁଡିକରେ ଲାଗିଥିବା ତାଲା ମଧ୍ୟ ପଡିଥିଲା । ଏହାର ପରଦିନ ବୋଟଗୁଡିକୁ ଖୋଲାଯିବା ବଦଳରେ ଏଠାରେ କଣ୍ଟାବାଡ ଦେଇ ଅବରୋଧ କରାଯାଇ ରଖାଯାଇଥିଲା । କୁଆଡେ ବିଧାୟକ ନରସିଂହଙ୍କ ଚାପରେ ଏଭଳି କରାଯାଇଥିବା କୁହାଯାଉଛି । ଏବେ ସେହି ପ୍ରକଲ୍ପକୁ ନରସିଂହ ଆଉଥରେ ଉଦଘାଟନ କରିଛନ୍ତି । ଆଜି ଏହି ଉଦଘାଟନୀ ପାଇଁ ଜଙ୍ଗଲବିଭାଗ ଉଦଘାଟନୀ ଫଳକ ମଧ୍ୟ ଲଗାଇଥିଲା । ଆଜି ବିଧାୟକ ନରସିଂହ ମିଶ୍ର ବଲାଙ୍ଗୀର ଡିଏଫଓ ନୀତିଶକୁମାର ଙ୍କ ଉପସ୍ଥିତିରେ ଏହାକୁ ଉଦଘାଟନ କରିଥିଲେ । ଏହା ସହିତ ବୋଟରେ ବସି ବିଧାୟକ ଶ୍ରୀ ମିଶ୍ରଙ୍କ ସହିତ ଡିଏଫଓ ନିତିଶକୁମାର,କଂଗ୍ରେସ ସେବାଦଳର ମୁଖ୍ୟ ଅସିତ ମିଶ୍ର ଓ ସୁରୁ ମଟାରୀ ଶୁଭାରମ୍ଭ କରିଥିଲେ । ଅନ୍ୟ କୌଣସି ସ୍ଥାନୀୟ ନିର୍ବାଚିତ ପ୍ରତିନିଧି ନଥିବା ଦେଖାଯାଇଥିଲା । ଫଳରେ ଭୀମଡୁଙ୍ଗୁରୀର ଏହି ବୋଟିଂ ପ୍ରକଲ୍ପ ଉଦଘାଟନକୁ ନେଇ ଜିଲ୍ଲାରେ ଚର୍ଚ୍ଚାର ବିଷୟ ହୋଇଛି । ଏହି ପ୍ରକଲ୍ପର ଶ୍ରେୟ ନେବ କିଏ? ନବୀନ ସରକାର ଅମଳରେ ହେଉଥିବା ପ୍ରକଲ୍ପର ଫାଇଦା ବିଜେଡିଦଳ ନେବ ନାଁ କଂଗ୍ରେସଦଳର ବିଧାୟକ ଥିବା ନରସିଂହ ନେବେ ?ପୂର୍ବରୁ ଅନେକଗୁଡିଏ ପ୍ରକଲ୍ପର ଫାଇଦା କଂଗ୍ରେସଦଳ ନେଇଛି । ପ୍ରଶାସନିକ ଅଧିକାରୀମାନଙ୍କୁ ଚାପଗ୍ରସ୍ତ କରାଯାଉଥିବା ମଧ୍ୟ ଆଲୋଚନା ହେଉଛି । ଅନେକ ସମୟରେ ବଲାଙ୍ଗୀର ବିକାଶକୁ ନେଇ ଅନେକ ବିତର୍କ ହେଉଛି । ରାସ୍ତାଘାଟ ଓ ଅନ୍ୟାନ୍ୟ ଉନ୍ନୟନ ପ୍ରକଲ୍ପ ସବୁ ନରସିଂହ ମିଶ୍ର କରାଉଥିବା କଂଗ୍ରେସଦଳର କର୍ମି କହୁଛନ୍ତି । କିନ୍ତୁ ନବିଣ ସରକାରରେ ମୁଖ୍ୟମନ୍ତ୍ରୀ ନବୀନ ହିଁ ବିକାଶପ୍ରକଲ୍ପ କରାଉଥିବା ବିଜେଡିକର୍ମି କହୁଛନ୍ତି ।