09-Mar-2022

ନୟାଗଡ, (ପ୍ରଦୀପ କୁମାର ପଣ୍ଡା)/  ଶେଷରେ କଳ୍ପନାଜଳ୍ପନାର ଅନ୍ତ ଘଟିଛି। ବ୍ଲକ୍ ଅଧ୍ୟକ୍ଷ ପଦ ନେଇ ଚାଲିଥିବା ବାଦବିବାଦରୁ ଶିଖରପୁର ସରପଞ୍ଚ ଓ ସମିତିସଭ୍ୟ ପଦବିରେ ନିର୍ବାଚିତ ହୋଇଥିବା ସନ୍ନ୍ୟାସୀ ପ୍ରଧାନ ସମିତିସଭ୍ୟରୁ ଓହରି ଯାଇଛନ୍ତି। ଆଜି ସନ୍ୟାସୀ ନିଜ ଇସ୍ତଫା ପତ୍ରକୁ ଉପଜିଲ୍ଲାପାଳଙ୍କ ପାଖରେ ଦାଖଲ କରିଥିବା ବିଶ୍ୱସ୍ତ ସୂତ୍ରରୁ ଜଣାପଡ଼ିଛି। ସୂଚନାଯୋଗ୍ୟ, ଓଡ଼ଗାଁ ବ୍ଲକ୍ ଶିଖରପୁର ପଞ୍ଚାୟତରୁ ସରପଞ୍ଚ ଓ ସମିତିସଭ୍ୟ ପଦରେ ସନ୍ନ୍ୟାସୀ ପ୍ରଧାନ ସର୍ବାଧିକ ଭୋଟ୍‌ରେ ବିଜୟୀ ହୋଇଥିଲେ। ସେ ସରପଞ୍ଚ ଓ ସମିତିସଭ୍ୟ ପାଇଁ ଦୁଇଟି ପ୍ରାର୍ଥିପତ୍ର ଦାଖଲ କରିଥିଲେ। ସରପଞ୍ଚରେ ନିକଟତମ ପ୍ରତିଦ୍ବନ୍ଦୀଙ୍କୁ ୧୪୫୫ ଖଣ୍ଡ ଭୋଟ୍‌ରେ ହରାଇ ବିଜୟୀ ହୋଇଥିବା ବେଳେ ସମିତିସଭ୍ୟରେ ସର୍ବାଧିକ ୧୬୪୬ ଖଣ୍ଡ ଭୋଟ୍ ପାଇ ବିଜୟ ଲାଭ କରିଥିଲେ। ଅଧିକାଂଶ ସମିତିସଭ୍ୟ ସନ୍ନ୍ୟାସୀଙ୍କୁ ସମର୍ଥନ କରି ଆସୁଥିବାରୁ ସେ ବ୍ଲକ୍ ଅଧ୍ୟକ୍ଷ ପଦ ପାଇଁ ଆଶାୟୀ ଥିଲେ। ବ୍ଲକ୍ ଅଧ୍ୟକ୍ଷ ଦୌଡ଼ରେ ଦୁଇଜଣ ହେଭିୱେଟ୍ ନେତା ଥିବାରୁ କିଏ ଏହି ପଦ ହାସଲ କରିବ ଆଉ କାହା ମୁଣ୍ଡରେ ହାତୀ ସୁନା କଳସ ଢାଳିବ ତାକୁ ନେଇ ହଟଚମଟ ସୃଷ୍ଟି ହୋଇଥିଲା। ଗୋଟିଏ ପଟେ ସନ୍ନ୍ୟାସୀ ପ୍ରଧାନଙ୍କୁ କିଛି ସମିତିସଭ୍ୟ ପ୍ରାର୍ଥୀ ସମର୍ଥନ କରୁଥିବାରୁ ସେ ବ୍ଲକ୍ ଅଧ୍ୟକ୍ଷ ପାଇଁ ଆଶାୟୀ ଥିଲେ, ଆଉ ଗୋଟିଏ ପଟେ

କୋରପିଠା ସମିତିସଭ୍ଯ ପଦରୁ ବିଜୟଲାଭ କରିଥିବା ଲୋକନାଥ ସାହୁ ବ୍ଲକ୍ ଅଧ୍ୟକ୍ଷ ପାଇଁ ଗୋଟି ଚାଳନା କରୁଥିଲେ। ଆଜି ସେ ସବୁର ଅନ୍ତ ଘଟିଛି। ଶେଷରେ ଦୁଇଟି ପଦ ହାତେଇଥିବା ସନ୍ନ୍ୟାସୀ ପ୍ରଧାନ ଶିଖରପୁର ପଞ୍ଚାୟତ ସମିତିସଭ୍ୟ ପଦରୁ ଇସ୍ତଫା ଦେଇଛନ୍ତି। ସମିତିସଭ୍ୟ ପଦରୁ ସେ ଇସ୍ତଫା ଦେବା ପରେ ପୁଣି ଥରେ ଶିଖରପୁର ପଞ୍ଚାୟତରେ ନିର୍ବାଚନ ହେବା ନିଶ୍ଚିତ ହୋଇଯାଇଛି। ଏହା ବିଧିବଦ୍ଧ ଭାବେ ଘୋଷଣା ପରେ ଗ୍ରାମ ପଞ୍ଚାୟତ ନିୟମ ଅନୁଯାୟୀ ନିର୍ବାଚନ ହେବ ବୋଲି ଓଡ଼ଗାଁ ଗ୍ରାମ ପଞ୍ଚାୟତ ଅଧିକାରୀ ସୁବାସ ଚନ୍ଦ୍ର ସେଠୀ ସୂଚନା ଦେଇଛନ୍ତି।