04-Mar-2022

ନୟାଗଡ଼(ପ୍ରଦୀପ କୁମାର ପଣ୍ଡା) : ଆମେ ମରିଗଲେ ଦାୟୀ ହେବ କିଏ??  ଆମ ବାପା ମା ଙ୍କୁ ପିଲାଟିଏ  ଦେବେ କି ସରକାର?? ଏହିଭଳି ପ୍ରତିକ୍ରିୟା ରଖି ଛନ୍ତି ପ୍ରାଥମିକ ବିଦ୍ୟାଳୟ ର ଛାତ୍ରଛାତ୍ରୀ | ଏପରିକି ସେମାନେ କହୁଛନ୍ତି କରୋନା ରେ ଆମେ ମରିନୁ ବୋଲି କଣ ସରକାର ଆମକୁ ମାରିବା ପାଇଁ କରିଛନ୍ତି କି ଚକ୍ରାନ୍ତ | ଭଙ୍ଗା ଆଜବେଷ୍ଟ ଘର, ଉଇ ଖାଇ ଗଲେଣି କାଠ, କେତେବେଳେ ଯେ ଆମ ଉପରେ ମାଡିବସିବ କିଏ କହିବ??  କୋମଳମତି ଛାତ୍ରଛାତ୍ରୀ ଙ୍କ ଅଶ୍ରୁ ଛଳଛଳ ନୟନ ଏବଂ କୋହଭରା କଣ୍ଠ ରୁ ଏହିଭଳି ସବୁ କଥା ଶୁଣି ହଡ଼ବଡ ହୋଇ ଯାଇଥିଲେ ଆମ ଗଣମାଧ୍ୟମ ର ପ୍ରତିନିଧି | ଉକ୍ତ ଘଟଣା ଟି ହେଉଛି ନୟାଗଡ଼ ଜିଲ୍ଲା ଖଣ୍ଡପଡା ବ୍ଲକ କୁମ୍ଭାରପଡ଼ା ପ୍ରାଥମିକ ବିଦ୍ୟାଳୟ ର | ଦୀର୍ଘ ୨ ବର୍ଷ ପରେ ବିଦ୍ୟାଳୟ ଖୋଲି ଥିବାରୁ ଉକ୍ତ ବିଦ୍ୟାଳୟ ପରିଦର୍ଶନ ରେ ଯାଇଥିଲେ ଆମ ପ୍ରତିନିଧି | ବିଦ୍ୟାଳୟ ଟି ସମ୍ପୂର୍ଣ ଜରାଜୀର୍ଣ୍ଣ ଅବସ୍ଥାରେ ପଡ଼ିରହିଛି | ସ୍ଥାନୀୟ ତଥା ଜିଲ୍ଲା ପ୍ରଶାସନ ର ଦୃଷ୍ଟି ଆଢ଼ୁଆଳ ରେ ଅଛି କି ଏହି ବିଦ୍ୟାଳୟ ବୋଲି ସୃଷ୍ଟି ହେଉଛି ପ୍ରଶ୍ନବାଚୀ | ବିଦ୍ୟାଳୟ ପରିସରରେ ଅନେକ ବଡ଼ ନଡ଼ିଆ ଗଛ ଥିବାରୁ ଶୁଖିଲା ବାହୁଙ୍ଗା ଏବଂ ଶୁଖିଲା ନଡ଼ିଆ ପଡି ସମସ୍ତ ଶ୍ରେଣୀ ଗୃହ ର ଆଜବେଷ୍ଟ ଗୁଡିକ ଭାଙ୍ଗୁଛି ବୋଲି ଶୁଣିବାକୁ ମିଳିଛି | ତେବେ ଅନ୍ୟପଟେ ସମସ୍ତ ଶ୍ରେଣୀ ଗୃହ ର ରାପଟର, ବଟମ ଗୁଡିକ ଉଇ ଲାଗି ସମ୍ପୂର୍ଣ ନଷ୍ଟ ହୋଇ ଯାଇଛି | ତେଣୁ ବ୍ଲକ ତଥା ଜିଲ୍ଲା ପ୍ରଶାସନ ଯୁଦ୍ଧକାଳୀନ ଭିତ୍ତି ରେ ଉକ୍ତ ବିଦ୍ୟାଳୟ ପରିଦର୍ଶନ କରି ବିପଦ ମୁକ୍ତ ଶୈକ୍ଷିକ ପରିବେଶ ଗଠନ କରିବାର କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ଅବିଭାବକ ମହଲ ରେ  ଦାବୀ ହେଉଛି | ତେବେ ଶ୍ରେଣୀ ଗୃହ ଗୁଡିକ ଯଥା ଶୀଘ୍ର ମରାମତି କରାଗଲେ କୋମଳମତି ବିଦ୍ୟାର୍ଥୀ ମାନଙ୍କ ମନରୁ ଭୟ ନିଶ୍ଚିତ ଭାବେ ଦୂରୀଭୂତ ହେବ ବୋଲି ଉକ୍ତ ବିଦ୍ୟାଳୟ ର ଶିକ୍ଷକ ନିଜର ପ୍ରତିକ୍ରିୟା ରଖିଛନ୍ତି |