03-Mar-2022

ବରଗଡ(ନିରଞ୍ଜନ ତ୍ରିପାଠୀ) :-ବରଗଡ଼ ଜିଲ୍ଲା ଭଟଲି ବ୍ଳକ ଅନ୍ତର୍ଗତ ଖର୍ସଲ ଗ୍ରାମରେ ସହିଦ ଦିଆଲ ସିଂ ସର୍ଦ୍ଦାର ଙ୍କ ପ୍ରତିମୂର୍ତ୍ତି ମାନ୍ୟବର ଶ୍ରମମନ୍ତ୍ରୀ ଶ୍ରୀ ସୁଶାନ୍ତ ସିଂ ଙ୍କ  ହସ୍ତରେ ଉନ୍ମୋଚିତ ହୋଇଯାଇଛି।ଏ ପରିପ୍ରେକ୍ଷୀରେ ଗଣ୍ଡ ସମାଜ ପକ୍ଷରୁ ଆୟୋଜିତ ସଭାରେ ସମ୍ମାନିତ ଅତିଥି ଭାବେ କେନ୍ଦୁଝର ର ପୂର୍ବତନ ବିଧାୟକ ଶ୍ରୀମାନ ପ୍ରାଣବଲ୍ଲବ ନାଏକ,ଗଣ୍ଡ ସମାଜ ର ବରଗଡ ଜିଲ୍ଲା ସଭାପତି ଶ୍ରୀମାନ ଲକ୍ଷ୍ମୀନାରାୟଣ ସିଂ, ସମାଜର ଜଡ଼ିତ ସମସ୍ତ ସଦସ୍ୟ ତଥା ଅଞ୍ଚଳ ର ବହୁ ମାନ୍ୟଗଣ୍ୟ ବ୍ୟକ୍ତି ଙ୍କ ଉପସ୍ଥିତି ଦେଖିବାକୁ ମିଳିଥିଲା ।୧୮୫୭ ମସିହାରେ ମୁକ୍ତି ବିପ୍ଳବ ରେ ସମ୍ବଲପୁର ଉଲଗୁନା ର ଅନ୍ୟତମ ମହାରଥୀ ହେଉଛନ୍ତି ଖର୍ସଲ ଗ୍ରାମର ଜନ୍ମିତ ଜମିଦାର ଶହିଦ ଦିଆଲ ସିଂ ସର୍ଦ୍ଦାର । ବିଭିନ୍ନ ପ୍ରକାରର ଇଂରେଜ ମାନଙ୍କ ଅବରୋଧ ସତ୍ୱେ ସେ ସମୟର ପ୍ରଶାସନ କୁ ପଙ୍କୁ କରିବା ସହ ଏ ଅଞ୍ଚଳରୁ ବିତାଡିତ କରିବାପାଇଁ ବୀର ସୁରେନ୍ଦ୍ର ସାଏ ଏବଂ ମାଧୋ ସିଂ ଙ୍କ ଭଳି ବିପ୍ଳବୀ ମାନେ ପ୍ରସ୍ତୁତ କରିଥିବା ରଣନୀତି କୁ ଆପଣାଇ ଜଣେ ପ୍ରମୁଖ ଅଂଶୀଦାର ଥିଲେ ।ଦ୍ୱାରୀଘାଟି ଏବଂ ଦିଆଲ୍ ଖୋଲ୍ ପ୍ରଭୃତି ସ୍ଥାନ ମାନଙ୍କରେ ଇଂରେଜ ସୈନ୍ୟ ମାନଙ୍କ ସହିତ ତାଙ୍କର ମୁହାଁମୁହିଁ ସଂଘର୍ଷ ଘଟିଥିଲା ଯାହା ଇତିହାସ ସାକ୍ଷୀ ରହିଛି । ସମ୍ବଲପୁର ର ଡେପୁଟି କମିଶନର କର୍ଣ୍ଣେଲ ଫଷ୍ଟର୍ ଙ୍କ କଠୋର ଦମନଲିଳା ର ଶିକାର ହୋଇଥିଲେ ସହିଦ ଦିଆଲ୍ ସିଂ । କୁହାଯାଏ ସୁକୁଡା-କେଶେଇପାଲି ରାସ୍ତାରେ ଥିବା ଏକ ଅଶ୍ୱତ୍ଥ ବୃକ୍ଷ ରେ ତାଙ୍କୁ ଇଂରେଜ ମାନେ ହତ୍ୟା କରି ଟାଙ୍ଗି ହେଇଥିଲେ । ତ୍ୟାଗ ଓ ବଳିଦାନର ପବିତ୍ର ଅଞ୍ଚଳରେ ଶ୍ରମମନ୍ତ୍ରୀ ଶ୍ରୀ ସୁଶାନ୍ତ ସିଂ ପାଦ ପକାଇ ସଂଗ୍ରାମୀ ଦିଆଲ୍ ସିଂ ଙ୍କ ପ୍ରତିମୂର୍ତ୍ତି ଉନ୍ମୋଚିତ କରିଥିବାରୁ ମୁଁ ଗର୍ବିତ ଅନୁଭବ କରୁଛି ବୋଲି ମତବ୍ୟକ୍ତ କରିଛନ୍ତି ।