07-Feb-2022

କଳାହାଣ୍ଡି,ନର୍ଲା (ସଞ୍ଜିବ ଦାସ) କଳାହାଣ୍ଡି ଜିଲ୍ଲା ଉପାନ୍ତ ଅଞ୍ଚଳର ମଦନପୁର ରାମପୁର ଥାନା ଅନ୍ତର୍ଗତ ମୋହନଗିରି ଧରିତ୍ରୀ ଖବରକାଗଜର ସାମ୍ବାଦିକ ରୋହିତ ବିଶ୍ବାଳ ମାଓବାଦୀଙ୍କ ଦ୍ବାରା ଖଞ୍ଜା ଯାଇଥିବା ଲ୍ୟାଣ୍ଡ ମାଇନ ବିସ୍ଫୋରଣ ରେ ନିହତ ହେବା ଘଟଣା ଓଡିଶା ସାମ୍ବାଦିଙ୍କ ମହଲରେ ଗଭୀର ଆଲୋଡନ ସୃଷ୍ଟି କରିଛି। ଖବର ସଂଗ୍ରହ ଉଦ୍ଦେଶ୍ୟରେ ଯାଇ ନିଜେ ଖବର ହୋଇଯିବା ଘଟଣା ବର୍ତ୍ତମାନ ବିଭିନ୍ନ ମହଲରେ ଚାଂଚଲ୍ୟ ଖେଳାଇଦେଇଛି। ଏନେଇ ଆଜି ଓଡିଶା ସାମ୍ବାଦିକ ସଂଘ(ଓଜେୟୁ) କଳାହାଣ୍ଡି ଜିଲ୍ଲା ଶାଖା ପକ୍ଷରୁ ଏକ ଶ୍ରଦ୍ଧାଞ୍ଜଳି ସଭା ଓ ରୋହିତଙ୍କ ପରିବାରର ଉତ୍ତୋରତର ଉନ୍ନତି ତଥା କାର୍ଯ୍ୟରତ ସାମ୍ବାଦିକଙ୍କ ବିଭିନ୍ନ ସମସ୍ୟା କୁ ନେଇ ଏକ ସାମ୍ବାଦିକ ସମ୍ମିଳନୀ ର ଆୟୋଜନ କରାଯାଇଥିଲା।

ସଂଘର ସଭାପତି ନିରୋଜ କୁମାର ପଟ୍ଟନାୟକଙ୍କ ଅଧ୍ୟକ୍ଷତାରେ ଆୟୋଜିତ କାର୍ଯ୍ୟକ୍ରମ ରେ ଓଡିଶା ସାମ୍ବାଦିକ ସଙ୍ଘ(ଓଜେୟୁ)ର ରାଜ୍ୟ ସଭାପତି ଶଶୀଭୂଷଣ ପ୍ରହରାଜଙ୍କ ଉପସ୍ଥିତି ରେ ବରିଷ୍ଠ ସାମ୍ବାଦିକ ଉମାଶାଙ୍କର କର ଓ ସ୍ୱାଧୀନ ପାତ୍ର ମଞ୍ଚାସିନ ରହି ସହୀଦ ସାମ୍ବାଦିକଙ୍କ ପ୍ରତିକୃତିରେ ମାଲ୍ୟାର୍ପଣ, ଧୂପଦୀପ ଦେଇ ଆତ୍ମାର ସଦଗତି କାମନା କରି  ଦୁଇ ମିନିଟ ନିରବ ପ୍ରାର୍ଥନା କରିଥିଲେ। ଏହାପରେ ରୋହିତଙ୍କ ସ୍ମୃତି ଚାରଣ କରିବା ସହିତ ସାମ୍ବାଦିକ ମାନେ କିଭଳି ପ୍ରତିକୂଳ ପରିସ୍ଥିତି ରେ କାର୍ଯ୍ୟକାରୀ ବିଭିନ୍ନ ସମସ୍ୟା ର ସମ୍ମୁଖୀନ ହେଉଛନ୍ତି ସେସମ୍ପର୍କରେ ଆଲୋକପାତ କାରାଯାଇଥିଲା। ଏହାପରେ ଓଜେୟୁ ସଂଘର ରାଜ୍ୟ ସଭାପତି ଶଶୀଭୂଷଣ ପ୍ରହରାଜ ସାମ୍ବାଦିକ ସମ୍ମିଳନୀରେ ସ୍ବର୍ଗତ ରୋହିତ ବିଶ୍ବାଳଙ୍କ ପାରିବାର ବର୍ଗଙ୍କ ସ୍ୱାର୍ଥରେ ଓ ଓଡ଼ିଶାର ବିଭିନ୍ନ ଛପା, ବୈଦ୍ୟୁତିକ ତଥା ସାମାଜିକ ଗଣମାଧ୍ୟମରେ କାର୍ଯ୍ୟରତ ଥିବା ସାମ୍ବାଦିକଙ୍କ ସ୍ୱାର୍ଥକୁ ଦୃଷ୍ଟିରେ ରଖି ଏକ ୬ ଦଫା ବିଶିଷ୍ଟ ଦାବୀ ପତ୍ର ଉପସ୍ଥାପନା କରିଥିଲେ।

ସ୍ବର୍ଗତ ସାମ୍ବାଦିକ ରୋହିତ ବିଶ୍ବାଳଙ୍କୁ ସହିଦର ମାନ୍ୟତା ଦେବା, ତାଙ୍କ ପରିବାରର ଜଣେ ସଦସ୍ୟଙ୍କୁ ସରକାରୀ ଚାକିରୀ ରେ ନିଯୁକ୍ତି ଦେବା ସହିତ ଦୁଇ ଛୁଆଙ୍କ ପାଠ ପଢ଼ା ଦାଇତ୍ୱ ସରକାର ବହନ କରିବା ଅନ୍ୟଥା ତାଙ୍କ ସ୍ତ୍ରୀଙ୍କୁ ଆଜୀବନ ସ୍ୱତନ୍ତ୍ର ଭତ୍ତା ପ୍ରଦାନ କରାଯିବା, ଘଟଣାରେ ଆସୁଥିବା ଗଞ୍ଜେଇ ମାଫିଆ ଓ ଠିକାରଦାରଙ୍କୁ ତଦନ୍ତ ପରିଷର ଭୃକ୍ତ କରିବା,ସାମ୍ବାଦିକଙ୍କ ପରିବାରକୁ ଅନ୍ୟୁନ ୫୦ ଲକ୍ଷ ଟଙ୍କାର ଆର୍ଥିକ ସହାୟତା ପ୍ରଦାନ କରାଯିବା ନେଇ ଦାବୀ କରିଥିବା ବେଳେ ଓଡ଼ିଶାର କାର୍ଯ୍ୟରତ ସାମ୍ବାଦିକ ସମୂହ ପାଇଁ ପ୍ରଚଳିତ ଗୋପବନ୍ଧୁ ସ୍ବାସ୍ଥ୍ୟ ବିମାରାଶିକୁ ୧୦ ଲକ୍ଷକୁ ବୃଦ୍ଧି କରିବା ସହିତ ମୃତକ ପରିବାରକୁ ୪ ଲକ୍ଷ ଟଙ୍କାରୁ ବୃଦ୍ଧିକରି ୧୫ ଲକ୍ଷ ଟଙ୍କା ପ୍ରଦାନ କରିବା,ସାମ୍ବାଦିକଙ୍କ ପାଇଁ ସ୍ୱତନ୍ତ୍ର ସୁରକ୍ଷା ଆଇନ ପ୍ରଣୟନ କରିବା,ସମ୍ବେଦନଶୀଳ ଘଟଣା ଅନୁସନ୍ଧାନ ସମୟରେ ସାମ୍ବାଦିକମାନଙ୍କ କାର୍ଯ୍ୟବଳୀ ନେଇ ଆଦର୍ଶ ମାର୍ଗ ଦର୍ଶିକା କାର୍ଯ୍ୟବଳୀ(ଏସ ଓ ପି) ପ୍ରଣୟନ କରି ପ୍ରଶିକ୍ଷଣ ପ୍ରଦାନ କରିବା ଭଳି ଅନେକ ଦାବୀ ଉପସ୍ଥାପନା କରାଯାଇଥିଲା। ଏହି ସବୁ ଦାବୀ ପତ୍ରଗୁଡିକୁ ଆସନ୍ତା କାଲି ଜିଲ୍ଲାର ଜିଲ୍ଲାପାଳ ଓ ଏସପିଙ୍କ ଜରିୟାରେ ମୁଖ୍ୟମନ୍ତ୍ରୀ ଓ ମାନ୍ୟବର ରାଜ୍ୟପାଳଙ୍କ ଉଦ୍ଦେଶ୍ୟରେ ପ୍ରଦାନ କରାଯିବା ପାଇଁ ଓଜେୟୁ କଳାହାଣ୍ଡି ଶାଖା ପକ୍ଷରୁ ସ୍ଥିରୀକୃତ ହୋଇଛି। ଅନ୍ୟମାନଙ୍କ ମଧ୍ୟରେ ସଂଘର ସାଧାରଣ ସମ୍ପାଦକ ଲକ୍ଷ୍ମଣ ସ୍ବାଇଁ, କୋଷାଧ୍ୟକ୍ଷ ଅଭିରାମ ପ୍ରସାଦ ପଟ୍ଟନାୟକ, ନରେନ୍ଦ୍ର ଦାସ, ସଞ୍ଜୟ ବେହେରା, ଡୋଳାମଣି ସାହୁ,ଶରତ ଚନ୍ଦ୍ର ସାହୁ ଓ ଯୁବ ସାମ୍ବାଦିକ ଯଶୋବନ୍ତ ଧଙ୍ଗଡା ମାଝୀ, ରଜତ ପଟ୍ଟନାୟକ, ମଧୁସୂଦନ ମହାପାତ୍ର ପ୍ରମୁଖ ଉପସ୍ଥିତ ରହି ସହୀଦ ସାମ୍ବାଦିକଙ୍କୁ ଶ୍ରଦ୍ଧାଞ୍ଜଳି ଦେବା ସହ ସାମ୍ବାଦିକ ସମ୍ମିଳନୀ ରେ ଅଂଶଗ୍ରହଣ କରିଥିଲେ।