17-Nov-2021

ବିନିକା(ହିମାଂଶୁ ଶେଖର ପୁଟେଲ) କେତେବେଳେ ରାସ୍ତାରେ ବନ୍ଧୁକ,ଭୁଜାଲି ଦେଖାଇ ଲୁଟ ତ ଆଉ କେତେବେଳେ ଡିକି ଭାଙ୍ଗି ଲୁଟ ହେଉଥିବାରୁ ଲୋକେ ଭୟଭୀତ ହୋଇପଡିଲେନି l ଯିବା ଆସିବା ନେଇ ମଧ୍ୟ ନିଜକୁ ସୁରକ୍ଷିତ ମନୁ ନାହାନ୍ତି l ଲୁଟେରାଙ୍କ କବଜାରେ ସୁବର୍ଣ୍ଣପୁର-ବିନିକା-ଏସ ରାମପୁର ରାଜପଥ ଏବେ ସମସ୍ତଙ୍କ ପାଇଁ ଅସୁରକ୍ଷିତ ହୋଇପଡ଼ିଛି l ଗତ ଏକ ମାସ ତଳେ ରାମପୁର ରାସ୍ତାର ବିଶାଳପାଲି ଛକ ଠାରେ ସନ୍ଧ୍ୟା ସମୟରେ ଦୁର୍ବୃତ୍ତ ମାନେ ବନ୍ଧୁକ ଦେଖାଇ ସୁନାହାର ଓ ଟଙ୍କା ଲୁଟି ନେଇଥିଲେ l ପୁଣି ତାର କିଛିଦିନ ପରେ ଜନଗହଳିପୂର୍ଣ୍ଣ ବିନିକା ବସଷ୍ଟାଣ୍ଡ ଛକ କଦଳୀ ଦୋକାନ ସମ୍ଭୁଖରେ ଅଟକି ଥିବା କାରର କବାଟ ଖୋଲି ବ୍ୟାଗରେ ଥିବା

ସୁନା, ରୂପା ଓ ନଗଦ ଟଙ୍କା ଆଖି ପିଛୁଲାକେ ଦୁର୍ବୃତ୍ତ ମାନେ ନେଇ ଯାଇଥିଲେ l ଏହିଭଲି ଘଟଣା ପ୍ରାୟ ଦିନ ମାନଙ୍କରେ ଘଟୁ ଥିବାବେଳେ ଲୁଟ ସାମଗ୍ରୀ ମିଳିବା ତ ଦୂରର କଥା ଲୁଟେରା ମାନେ ମଧ୍ୟ ଧରା ନ ପଡ଼ିବା ପୋଲିସର କାର୍ଯ୍ୟଦକ୍ଷତାକୁ ନେଇ ସାଧାରଣରେ ଚର୍ଚ୍ଚା ହେଉଛି l ଏହି ଘଟଣା ବିନିକା ଅଞ୍ଚଳର ଜନସାଧାରଣଙ୍କ ମନରୁ ଲିଭି ନଥିବା ବେଳେ ଗତକାଲି ବିଳମ୍ବିତ ରାତିରେ ପୁଣି ବିନିକା-ଏସ ରାମପୁର ରାସ୍ତା ଦେଇ ଯାଉଥବା ଏକ କାରକୁ ଵିଶାଲପାଲି ନିକଟରେ କେତେକ ଦୁର୍ବୃତ୍ତ ଅଟକାଇ ଉଭୟଙ୍କୁ ଧାରୁଆ ଅସ୍ତ୍ରରେ ଆକ୍ରମଣ କରି ତାଙ୍କଠାରୁ ୩.୫୦ ଲକ୍ଷ ଟଙ୍କା ଲୁଟି ଫେରାର ହୋଇଯିବା ଘଟଣା ଯାଆ ଆସ କରୁଥିବା ଲୋକଙ୍କ ଜୀବନ ପ୍ରତି ରାସ୍ତା ସମ୍ପୁର୍ଣ୍ଣ ଅସୁରକ୍ଷିତ ହୋଇ ପଡ଼ିଥିବା ବେଳେ ପୋଲିସକୁ ଚ୍ୟାଲେଞ୍ଜ କରି ନିଜର କାର୍ଯ୍ୟକୁ ସଫଳ କରୁଥିବା ଦୁର୍ବୃତ୍ତ ମାନଙ୍କ ପତିଆରାକୁ ନେଇ ସାଧାରଣ ଲୋକେ ଭୟଭୀତ ହୋଇ ପଡିଲେଣି l ଘଟଣାରୁ ପ୍ରକାଶ ଯେ ଗତକାଲି ରାତିରେ ଆସ୍କାରୁ ଏକ ମେକସ ପିକପ ଯୋଗେ ଦୁଇଜଣ

ବରଗଡ଼ ଯାଉଥିବା ବେଳେ ବିନିକା ରାମପୁର ରାସ୍ତାର ବିଶାଳପାଲି ଛକ ନିକଟରେ ୬ଜଣ ଦୁର୍ବୃତ୍ତ ବାଇକ ଯୋଗେ ଆସି ଗାଡ଼ିକୁ ଅଟକାଇ ଡ୍ରାଇଭର ଓ ଗାଡି ମାଲିକଙ୍କୁ ମରଣାତ୍ମକ ଆକ୍ରମଣ କରି ତାଙ୍କ ପାଖରେ ଥିବା ୩.୫୦ଲକ୍ଷ ଟଙ୍କା ଓ ମୋବାଇଲ ଲୁଟି ନେଇଥିଲେ l କୌଣସି ମତେ ଉଭୟେ ଉଦ୍ଧାର ପାଇ ବିନିକା ଥାନାକୁ ଆସି ଅଭିଯୋଗ କରିବା ପରେ ପୋଲିସ ଘଟଣାସ୍ଥଳକୁ ପହଞ୍ଚି ତଦନ୍ତ ଆରମ୍ଭ କରିଛି l ତେବେ ମେକସ ପିକଅପ ଗାଡ଼ିର ମାଲିକ ବରଗଡ଼ର ସୁରେଶ ଠାକୁର ଓ ଡ୍ରାଇଭର ଜୟପାଳ ମହାନନ୍ଦ ବୋଲି ଜଣାପଡିଛି l ଦୁର୍ବୃତ୍ତ ମାନେ ଧାରୁଆ ଅସ୍ତ୍ରରେ ଆକ୍ରମଣ କରିଥିବାରୁ ଉଭୟଙ୍କ ବେକ,ହାତ,ଗୋଡ଼ କ୍ଷତ ହୋଇଛି l ଫଳରେ ଉଭୟେ ବିନିକା ଡାକ୍ତରଖାନାରେ ଚିକିତ୍ସାଧୀନ ଥିବା ଜଣାପଡିଛି l