31-Oct-2020

ପାଟଣାଗଡ଼(ପ୍ରେରଣା ଖବର)- ଉଭୟ କେନ୍ଦ୍ର ଓ ରାଜ୍ୟ ସରକାର ଗ୍ରାମାଞ୍ଚଳରେ ଗମନାଗମନର ସୁବିଧା ପାଇଁ କୋଟି କୋଟି ଟଙ୍କା ଖର୍ଚ୍ଚ କରୁଛନ୍ତି । କିନ୍ତୁ ଖପ୍ରାଖୋଲ ବ୍ଲକର ବଡଗୁର୍ଜିଭଟା-ଘୁନସର ରାସ୍ତାର ଏହି ଶୋଚନୀୟ ଅବସ୍ଥାକୁ ଦେଖିଲେ ଜଣାପଡିବ ସରକାରଙ୍କ ଅନୁଦାନ କେଉଁ ପ୍ରକାରରେ ଖର୍ଚ୍ଚ ହେଉଛି । ଏହି ରାସ୍ତାର ମରାମତି ଦିଗରେ କୌଣସି ସରକାରୀ ରତ୍ପରତା ପ୍ରକାଶ ପାଉନଥିବାରୁ  ଏବେ ଏହା ଲୋକଙ୍କ ପାଇଁ ମରଣଯନ୍ତା ପାଲଟି ଯାଇଛି । ଏହି ରାସ୍ତା ଜାମସେଠକୁ ସଂଯୋଗ ହୋଇଥିବା ବେଳେ ନୂଆପଡା, ପାଇକମାଲ ଓ ପର୍ଯ୍ୟଟନ କ୍ଷେତ୍ର ନୃସିଂହନାଥକୁ ଯିବା ପାଇଁ ଜନସାଧାରଣ ଏହି ରାସ୍ତା ଉପରେ ନିର୍ଭର କରିଥାନ୍ତି । ପ୍ରତିଦିନ ସ୍କୁଲ କଲେଜ ଛାତ୍ରଛାତ୍ରୀଙ୍କ ଠାରୁ ଆରମ୍ଭ କରି ସାଧାରଣ ଜନତା ଏହି  ରାସ୍ତା ଦେଇ ଯିବା ଆସିବା କରିଥାନ୍ତି । ବଡଗୁର୍ଜିଭଟା ଠାରୁ ଘୁନସରକୁ ଯାଇ ଥିବା ଏହି ୨କିଲୋମିଟର ରାସ୍ତା ଏବେ ଆଉ ଚାଲିବା ଉପଯୋଗୀ ହୋଇ ରହି ନାହିଁ ।   ରାସ୍ତାର ଠାଏ ଠାଏ ଆଣଣ୍ଠୁଏ ପାଣି ପୁଣି ଅନେକ ସ୍ଥାନରେ ଗର୍ତ୍ତ ମାନ ସୃଷ୍ଟି ହୋଇଛି । ଅନେକ ସମୟରେ ଏହି ରାସ୍ତାରେ ଛୋଟମୋଟ ଦୁର୍ଘଟଣା ମାନ ମଧ୍ୟ ଘଟୁଛି । ଆମ୍ବୁଲେନ୍ସ କିମ୍ବା ଦମକଳବାହିନୀ ଗାଡି ଏହି ରାସ୍ତା ଦେଇ ଯାଇପାରୁ ନଥିବାରୁ ଲୋକେ ଜରୁରୀକାଳୀନ ସେବା ପାଇବାରୁ ବଞ୍ଚିତ ହେଉଛନ୍ତି । ସ୍ଥାନୀୟ ଅଧିବାସୀ ମାନେ ବାରମ୍ବାର ବ୍ଲକ ପ୍ରଶାସନ ଠାରେ ହାରିଗୁହାରୀ କରିଥିଲେ ମଧ୍ୟ ଫଳ କିଛି ହୋଇ ନାହିଁ । ଲୋକଙ୍କ ଗମନାଗମନ ସୁବିଧା ପାଇଁ ପ୍ରଶାସନ ତରଫରୁ ତୁରନ୍ତ ଏହି ରାସ୍ତାର ମରାମତି ପାଇଁ ଗୋପାଳ ସାହୁ, ନୀଳକଣ୍ଠ ବରିହା, ବିଭୀଷଣ ରଣା, ସୁପାଳ ନିଆଲ, ଅଶ୍ୱିନୀ ସାହୁ, ବୃହଷ୍ପତ୍ତି ଭୋଇ, ତେଜରାମ ଠାକୁର, ଭୁବନ ବାରିକ, ରୂଦ୍ର ବାରିକ ପ୍ରମୁଖ ଗ୍ରମବାସୀ ଦାବି କରିବା ସହିତ ମରାମତି ନହେଲେ ଆନ୍ଦୋଳନକୁ ଓହ୍ଲାଇବେ ବୋଲି ପ୍ରଶାସନକୁ ଚେତାବନୀ ଦେଇଛନ୍ତି ।