11-Aug-2021

ବଲାଙ୍ଗିର,(ପ୍ରେରଣା ଖବର)- ଜିଲ୍ଲାର ଅନ୍ୟତମ ବରିଷ୍ଠ ସାମ୍ବାଦିକ ରାମକୁମାର ଅଗ୍ରୱାଲଙ୍କ ସ୍ୱାସ୍ଥ୍ୟବସ୍ଥା ବୁଝିବା ପାଇଁ ବଲାଙ୍ଗିର ବିଧାୟକ ନରସିଂହ ମିଶ୍ର ଆଜି ଶ୍ରୀ ଅଗ୍ରୱାଲଙ୍କ କଂସାରିପଡା ସ୍ଥିତ ବାସଭବନକୁ ଯାଇଥିଲେ । ସାମ୍ବାଦିକ ଶ୍ରୀ ଅଗ୍ରୱାଲ ଦିର୍ଘଦିନରୁ ହୃଦରୋଗ ଜନିତ ଅସୁସ୍ଥତା ଯୋଗୁଁ ରାଜ୍ୟ ବାହାରେ ଚିକିତ୍ସିତ ହେବା ପରେ ବର୍ତ୍ତମାନ ବଲାଙ୍ଗିରରେ ନିଜ ଘରେ ଚିକିତ୍ସିତ ହେଉଛନ୍ତି । ସାମ୍ବାଦିକ ଜଗତରେ ବେଶ ପରିଚିତ ଶ୍ରୀ ଅଗ୍ରୱାଲ ଜାତୀୟ ସ୍ତରର ଗଣମାଧ୍ୟମ ସଂସ୍ଥା ଅଲ୍ ଇଣ୍ଡିଆ ରେଡିଓ, ଇଷ୍ଟିଆନ୍ ଏକ୍ସପ୍ରେସ ସମେତ ଆହୁରି ଅନେକ ମୁଦ୍ରଣ ଗଣମାଧ୍ୟମରେ କାର୍ଯ୍ୟ କରି ନିଜକୁ ବେଶ୍ ପ୍ରତିଷ୍ଠିତ କରିପାରିଥିଲେ । ବିଧାୟକ ଶ୍ରୀ ମିଶ୍ର ତାଙ୍କ ଅସୁସ୍ଥତା ବିଷୟରେ ଜାଣିବା ପାଇଁ ତାଙ୍କ ସହିତ ତଥା ତାଙ୍କ ପରିବାର ସଦସ୍ୟଙ୍କ ସହ ଆଲୋଚନା କରିଥିଲେ । ସୂଚନାଯୋଗ୍ୟ ଯେ ଗତ ବର୍ଷ ଅକ୍ଟୋବର ମାସରେ

ସାମ୍ବାଦିକ ଶ୍ରୀ ଅଗ୍ରୱାଲଙ୍କ ଜ୍ୟେଷ୍ଠ ପୁତ୍ର ସଂଗୀତ ଅଗ୍ରୱାଲଙ୍କ କରୋନା ଜନିତ ମୃତ୍ୟୁ ହୋଇଯାଇଥିଲା । ସେ ବାବଦରେ ମଧ୍ୟ ବିଧାୟକ ଶ୍ରୀ ମିଶ୍ର ପରିବାର ବର୍ଗଙ୍କୁ ସାନ୍ତ୍ୱନା ଦେବା ସହ ତାଙ୍କ ଏକମାତ୍ର ପୁତ୍ର ଗିରିଶ ଅଗ୍ରୱାଲଙ୍କ ଭବିଷ୍ୟତ ନେଇ ଆଲୋଚନା କରିଥିଲେ । ଏହି ସମୟରେ ଅନ୍ୟମାନଙ୍କ ମଧ୍ୟରେ ସାମ୍ବାଦିକ ଶ୍ରୀ ଅଗ୍ରୱାଲଙ୍କ ପତ୍ନୀ ସନ୍ତୋଷ ଦେବୀ ଅଗ୍ରୱାଲ, ତାଙ୍କ ପୁତ୍ରବଧୁ ନୟନତାରା ଅଗ୍ରୱାଲ, ଝିଅ ସଂଯୁକ୍ତା ଅଗ୍ରୱାଲ, ସଂଗୀତା ଅଗ୍ରୱାଲ,  ଚନ୍ଦ୍ରଶେଖର ଅଗ୍ରୱାଲ, ଶୈଳନ୍ଦ୍ର ଅଗ୍ରୱାଲ ଏବଂ ଭାଇ ସୁରେଶ ଚନ୍ଦ୍ର ଅଗ୍ରୱାଲ ପ୍ରମୁଖ ଉପସ୍ଥିତ ଥିଲେ ।