03-Aug-2021

ବଲାଙ୍ଗୀର(ପ୍ରେରଣା ଖବର) : ସରକାର ରାସ୍ତା ସଂଯୋଗିକରଣ ଯୋଜନାରେ ସହର ଠାରୁ ଆରମ୍ଭ କରି ଗ୍ରାମାଞ୍ଚଳ ପର୍ଯ୍ୟନ୍ତ ପକ୍କା ରାସ୍ତା ନିର୍ମାଣ କରି ଲୋକଙ୍କ ଯାତାୟାତ ର ସୁବିଧା କରୁଛନ୍ତି । ସରକାର ଯେତେ ଯୋଜନା କଲେ ମଧ୍ୟ ରାଜନେତା ମାନଙ୍କ ଦୃଢ଼ ଇଚ୍ଛାଶକ୍ତି ର ଅଭାବ ଯୋଗୁ ଲୋକଙ୍କୁ ଅନେକ ଅସୁବିଧାର ସମ୍ମୁଖୀନ ହେବାକୁ ପଡୁଛି । ପ୍ରଧାନମନ୍ତ୍ରୀ ସଡ଼କ ଯୋଜନାରେ ଗ୍ରାମାଞ୍ଚଳ କୁ ପକ୍କା ରାସ୍ତା ନିର୍ମାଣ କରାଯାଉଥିବା ବେଳେ କୋଉ ଆବହମାନ କାଳରୁ ଥିବା କଚ୍ଚା ରାସ୍ତା ଲସ୍ତଲା ଆମପାଳି ଗ୍ରାମବାସୀ ବ୍ୟବହାର କରୁଥିବା ଦେଖିବାକୁ ମିଳିଛି । ବଲାଙ୍ଗୀର ସାଉନ୍ତପୁର ପଞ୍ଚାୟତ ଅନ୍ତର୍ଗତ ଲେତିପାଲି ଛକରୁ ଲସ୍ତଲା ଆମପାଲି  ପଡ଼ା ରାସ୍ତା ଲସ୍ତଲା ପର୍ଯ୍ୟନ୍ତ ପ୍ରାୟ ୩ କିଲୋମିଟର ରାସ୍ତା ମାଟି କାଦୁଅ ଯୋଗୁ ଯାତାୟାତ କରିବା କଷ୍ଟକର ହୋଇପଡିଛି । ମରଣଯନ୍ତା ପାଲଟିଛି ଏହି ରାସ୍ତା । ବର୍ଷା ଯୋଗୁଁ ରାସ୍ତା ମଝିରେ ଖାଲ ଭିତରେ ପାଣି ଜମି ରହିଥିବାରୁ ଅନେକ ଲୋକ ରାସ୍ତାରେ ପଡ଼ି ଖଣ୍ଡିଆ ଖାବରା ହେଉଛନ୍ତି । ଏହି ଗ୍ରାମ ରାସ୍ତା ନିର୍ମାଣ ହେଲେ ଉମରିଆ, ଜାମଗାଁ, କଙ୍କରିଆ, ଅଙ୍କରିଆପଦର୍, କେଶେରକେଲା, ମୋତି ଝରିଆ ହୋଇ ସାତ ମାଇଲ ଛକ ମୁଖ୍ୟ ସୋନପୁର ରାସ୍ତା କୁ ସଂଯୋଗ କରିବ । 
   ଉପରୋକ୍ତ ବିଷୟ କୁ ନେଇ ସ୍ଥାନୀୟ ଲୋକେ ବିଧାୟକ ଡ଼. ମୁକେଶ ମହଲିଙ୍ଗ ଙ୍କୁ ବହୁବାର ଜଣାଇଥିଲେ । ବିଧାୟକ ମଧ୍ୟ ଏହି ରାସ୍ତା ର ଉନ୍ନତି ପାଇଁ ପୁଇନ୍ତଲା ବ୍ଲକ୍ ବିଡ଼ିଓ ଙ୍କୁ ମଧ୍ୟ କହିଥିଲେ । ଜିଲ୍ଲାପାଳ ଙ୍କ ଠୁଁ ଆରମ୍ଭ କରି ସରପଞ୍ଚ ପର୍ଯ୍ୟନ୍ତ ସମସ୍ତଙ୍କୁ ଗୁହାରି କରି ଗ୍ରାମବାସୀ ମାନେ ନିରାଶ ହୋଇ ଭାଗ୍ୟକୁ ଆଦରି ପଡ଼ି ରହିଛନ୍ତି । ଲସ୍ତଲା ଆମପାଲି ପଡ଼ା ରୁ ଲସ୍ତଲା କୁ ଯିବା ପାଇଁ ରାସ୍ତାରେ ଅଙ୍ଗିରା ଜୋର୍ ପଡେ । ଏହି ଜୋର୍ ରେ ପୋଲ ନ ଥିବାରୁ ଏ ଅଞ୍ଚଳର ପ୍ରାୟ ୪୦ ଜଣ ଛାତ୍ର ଛାତ୍ରୀ କୂଳ ଲଂଘି ଲସ୍ତଲା ୟୁ ପି ସ୍କୁଲ କୁ ପଢିବାକୁ ଯାଆନ୍ତି । ସରପଞ୍ଚ ଙ୍କୁ ଗ୍ରାମବାସୀ ଅଭିଯୋଗ କରିଥିଲେ ମଧ୍ୟ ତାଙ୍କର କୌଣସି ପ୍ରତିକ୍ରିୟା ନାହିଁ । 
 

   ପୂର୍ବରୁ ସଂଗୀତା ସିଂଦେଓ, ସାଂସଦ ଥିବା ବେଳେ ସେ ସମୟରେ ଲେତିପାଲି ଛକ ରୁ ଲସ୍ତଲା ଆମାପାଲି ପଡ଼ା ରାସ୍ତା ନିର୍ମାଣ ପାଇଁ ଏମ ପି ଫଣ୍ଡ ରୁ ୭ ଲକ୍ଷ ଏବଂ ବିଜୁ କେବିକେ ରୁ ୧୦ ଲକ୍ଷ ୫୦ହଜାର ଟଙ୍କା ଅନୁଦାନ ମିଳିଥିବା ଗ୍ରାମବାସୀ ମାନେ ପ୍ରକାଶ କରିଥିଲେ । ରାସ୍ତା ନିର୍ମାଣ ପାଇଁ ସାଂସଦ ଶୁଭ ଦେଇଥିବା ବେଳେ ମିଳିଥିବା ଅନୁଦାନ ରାଶି ଗଲା କୁଆଡେ ବୋଲି ସ୍ଥାନୀୟ ଗ୍ରାମବାସୀ ମାନେ ଜିଲ୍ଲା ପ୍ରଶାସନ କୁ ପ୍ରଶ୍ନ କରିଛନ୍ତି । ପୁଇନ୍ତଳା ବିଡ଼ିଓ ଙ୍କୁ ରାସ୍ତା ନିର୍ମାଣ ସମ୍ପର୍କରେ ପଚାରିବାରୁ ସେ ପ୍ରତ୍ୟୁତ୍ତର ରେ ବିଧାୟକ ତାଙ୍କୁ କହିଥିବା ପ୍ରକାଶ କରିଥିଲେ । ହେଲେ ବ୍ଲକ୍ ରେ ଟଙ୍କା ନ ଥିବାରୁ କିଛି କରି ପାରୁନାହାନ୍ତି ବୋଲି କହିଥିଲେ । ଯଦି ବ୍ଲକ୍ ରେ ଟଙ୍କା ନାହିଁ ତେବେ ବିଡ଼ିଓ ଜଣ ତାଙ୍କ ପାକେଟ ରୁ ଟଙ୍କା ଦେବେକି ବୋଲି ସ୍ଥାନୀୟ ବାସିନ୍ଦା ବିଡ଼ିଓ ଙ୍କୁ ପ୍ରଶ୍ନ କରିଛନ୍ତି । ଯଦି ଫଣ୍ଡ ନାହିଁ ତେବେ କେବେ ଜିଲ୍ଲାପାଳ ଙ୍କୁ ଜଣାଇଛନ୍ତି କି? ଯଦି ଜଣାଇ ନାହାନ୍ତି ତେବେ ବ୍ଲକ୍ ଅଧିନସ୍ଥ ଗ୍ରାମାଞ୍ଚଳ ରେ ବସବାସ କରୁଥିବା ବାସିନ୍ଦା ଗୁହାରି କରିବେ କାହାକୁ । ଏ ବିଷୟ ପ୍ରତି ଗୁରୁତ୍ଵ ର ସହ ଜିଲ୍ଲାପାଳ ଦୃଷ୍ଟିଦେବେ ବୋଲି ସ୍ଥାନୀୟ ଗ୍ରାମବାସୀ ନେପାଲ ବରାଡ,ପୂର୍ଣ୍ଣଚନ୍ଦ୍ର ବରାଡ, ପ୍ରୁଥିରାଜ୍ ବରାଡ, ଅକ୍ରୁର ଜେନା, ସୁରେନ୍ଦ୍ର ବରାଡ, ବାଳୀ ଦଳାଇ, ଅରକ୍ଷିତ ବରାଡ, ବ୍ରହ୍ମା ବରାଡ, ପୁରନ୍ଦର ଜେନା ଓ ରାଧାକାନ୍ତ ବରାଡ ପ୍ରମୁଖ ଅନୁରୋଧ କରିଛନ୍ତି ।