17-Jun-2021

କଣ୍ଟାମାଳ (ଅକୃର ସାହୁ) : ବର୍ଷା ଋତୁ ଆରମ୍ଭରୁ ଏହି ରାସ୍ତା ଉପରେ ପାଣି ଜମି ରହୁଛି  । ଟ୍ରାକ୍ଟର ଯାତାୟତ କରିବା ଯୋଗୁଁ ରାସ୍ତାରେ ଖାଲଖମା ହୋଇ ପାଣି ଜମି କାଦୁଅ ହୋଇପଡୁଛି । ଯାତାୟତ କରୁଥିବା ଲୋକ ମାନେ ବେଳେବେଳେ ଦୁର୍ଘଟଣାର ଶିକାର ହେଉଛନ୍ତି  ।  ରାସ୍ତାର ଅବସ୍ଥା ଏପରି ଯେ, ଗର୍ଭବତୀ ମହିଳା ଓ ରୋଗୀ ନେବା ପାଇଁ ଆମ୍ବୁଲାନ୍ସ ମଧ୍ୟ ଆସିପାରୁ ନାହିଁ  । ଏଥିପାଇଁ ଲୋକେ ରୋଗୀଙ୍କୁ ଖଟିଆରେ ଵୋହିବାକୁ ବାଧ୍ୟ ହେଉଛନ୍ତି ।ପ୍ରଶାସନକୁ ବାରମ୍ଵାର ଅଭିଯୋଗ କରାଗଲେ ମଧ୍ୟ କୌଣସି ପଦକ୍ଷେପ ନେଉନାହାନ୍ତି   । ବୌଦ୍ଧ ଜିଲ୍ଲାର କଣ୍ଟାମାଳ ବ୍ଳକ ବରଗାଁ ପଞ୍ଚାୟତ ମାତାକୁପା ୱାର୍ଡ଼  କୁମେଳବନ୍ଧ ଠାରୁ କାଣିସିମିଳି ରାସ୍ତାର ଅବସ୍ଥା ଶୋଚନୀୟ ହୋଇପଡିଥିବା ଗ୍ରାମବାସୀ ଅଭିଯୋଗ କରିଛନ୍ତି । ଏହି ରାସ୍ତା ଦେଇ ପ୍ରତିଦିନ ଲୋକ ଯାତାୟତ କରୁଥିବା ବେଳେ ଲୋକଙ୍କ ଅସୁବିଧାକୁ ଜିଲ୍ଲା ପ୍ରଶାସନ ଅଣଦେଖା କରିଥିବା ଅଭିଯୋଗ ହୋଇଛି । ଏହି ରାସ୍ତା ଉପରେ କଣ୍ଟାମାଳ ବ୍ଲକର କାଣିସିମିଳ, ଲବାରକାଣି, ଉର୍ତ୍ତୁଲ୍ଳା, ଚିଙ୍ଗିଯୋର ଡୁମାଳପଖାଳ, ଲମ୍ଵସର ପଞ୍ଚାୟତ ଓ ଦପଲା ପଞ୍ଚାୟତ ର ଲୋକେ ନିର୍ଭର କରୁ ଥିବା ବେଳେ ପ୍ରଶାସନର ଉଦାସୀନତା ମନୋଭାବ ଲୋକଙ୍କ ମଧ୍ୟରେ ଅସନ୍ତୋଷ ସ୍ରୁଷ୍ଟି କରିଛି ।  ବିପର୍ଯ୍ୟସ୍ତ ହୋଇପଡି ଥିବା ଏହି ରାସ୍ତାର ତୁରନ୍ତ ମରାମତି କରିବା ପାଇଁ ଗ୍ରାମବାସୀ ଦାବି କରିଛନ୍ତି  ।