31-May-2021

କଣ୍ଟାବାଞ୍ଜି ( ଆନନ୍ଦ ମୋଟେ ):  ସୋମବାର ଅପରାହ୍ନ ସମୟରେ ବଲାଙ୍ଗିର ଜିଲ୍ଲା ବଙ୍ଗୋମୁଣ୍ଡା ସହରରେ କାଳବୈଶାଖୀର ତାଣ୍ଡବ ଦେଖିବାକୁ ମିଳିଥିଲା । କୁଆପଥର ବର୍ଷା ହେବା ସହ ଜୋରରେ ପବନ ହେବା ଯୋଗୁଁ ବ୍ୟାପକ କ୍ଷୟକ୍ଷତି ହୋଇଛି । କାହା ଘରର ଛପର ଉଡିଯାଇଛି ତ ଆଉ କାହା ଘର ଉପରେ ଗଛ ପଡିଯାଇଛି । କାଳବୈଶାଖୀ ତାଣ୍ଡବରେ ବଙ୍ଗୋମୁଣ୍ଡାରୁ କଣ୍ଟାବାଞ୍ଜି ଯାଉଥିବା ୪୨ ନମ୍ବର ରାଜ୍ୟ ରାଜପଥ ଏବଂ ୫୯ ଜାତୀୟ ରାଜପଥ ରାସ୍ତା ପାର୍ଶ୍ବରେ ବଡ ବଡ ଗଛ ସବୁ ଉପୁଡି ରାସ୍ତା ଉପରେ ପଡି ରହିଥିଲା  । ଯାହା ଫଳରେ ରାସ୍ତା ଅବରୋଧ ହୋଇଛି । ବିଦ୍ୟୁତ ଖୁଣ୍ଟ ମଧ୍ୟ ଉପୁଡିଯାଇଛି । ବିଦ୍ୟୁତ ସରବରାହ ବିଚ୍ଛିନ୍ନ ହୋଇଯାଇଛି  ।

ତେବେ ଏ ଖବର କଣ୍ଟାବାଞ୍ଜି ବିଧାୟକ ପାଇବା ପରେ ବଙ୍ଗୋମୁଣ୍ଡାରେ ପହଞ୍ଚି ସମୀକ୍ଷା କରିଛନ୍ତି । ବିଧାୟକ ତାଙ୍କ ସମର୍ଥକମାନଙ୍କ ସହ ବଙ୍ଗୋମୁଣ୍ଡା ସହର ବୁଲି କାଳବୈଶାଖୀର ସମୀକ୍ଷା କରିଛନ୍ତି । ଯେଉଁ ଲୋକଙ୍କ ଘର ଉପରେ ଗଛ ପଡିଛି ତାହା ତୁରନ୍ତ ହଟାଇବା ସହ କ୍ଷତିପୂରଣ ଦେବାକୁ  ରାଜ୍ୟ ସରକାର ଏବଂ କେନ୍ଦ୍ର ସରକାରଙ୍କ ନିକଟରେ ଦାବି  କରିଛନ୍ତି ।