24-Mar-2021

ବଲାଙ୍ଗିର,(ପ୍ରେରଣା ଖବର ବ୍ୟୁରୋ) : ନ୍ୟୁୟର୍କବାସୀ ଶୁଣିବେ ବଲାଙ୍ଗିରର ପୁଅ ପ୍ରିୟବ୍ରତ ପାଣିଗ୍ରାହୀଙ୍କ ସଙ୍ଗୀତ। ଫିଲ୍ମ ନିର୍ଦ୍ଦେଶକ ତଥା ଷ୍ଟାର୍‌ସେଫ ବିକାଶ ଖନ୍ନାଙ୍କ ସାଂସ୍କୃତିକ ଅନୁଷ୍ଠାନ ‘ବାଇଣ୍ଡର’ ତରଫରୁ ଆୟୋଜିତ ହେବାକୁ ଯାଉଥିବା ‘ଟ୍ରିବ୍ୟୁଟ ଟୁ ଲତା ମଙ୍ଗେସକ୍‌ର’ ସଂଗୀତ କାର୍ଯ୍ୟକ୍ରମରେ ଆନ୍ତର୍ଜାତିକ ସଂଗୀତ ନିର୍ଦ୍ଦେଶକ ପ୍ରିୟବ୍ରତ ସାମିଲ ହେବାର ସୁଯୋଗ ପାଇଛନ୍ତି । କାର୍ଯ୍ୟକ୍ରମରେ ଭାରତ ସମେତ ୟୁକେ, ୟୁଏସ, ୟୁରୋପ ଏବଂ ଆଫ୍ରିକାର ପ୍ରସନ୍ନ ଦେ, ଏବି ଭି, ସ୍ପାର୍ସ ସ, ବୈଜୁ ମଙ୍ଗେସକରଙ୍କ ଭଳି ୫୦ରୁ ଉର୍ଦ୍ଧ୍ଵ ଆନ୍ତର୍ଜାତିକ ସଂଗୀତ କଳାକାରମାନେ ଭାଗନେବେ । ଏଭଳି ବିଶ୍ୱସ୍ତରୀୟ କାର୍ଯ୍ୟକ୍ରମରେ ବଲାଙ୍ଗିରର ପୁଅ ପ୍ରିୟବ୍ରତ ସାମିଲ ହେବା ଜଣାପଡ଼ିବା ପରେ ବିଭିନ୍ନ ମହଲରେ ଖୁସିର ଲହରୀ ଖେଳିଯାଇଛି ।

ସୂଚନା ଅନୁସାରେ, ବଲାଙ୍ଗିର ଜିଲ୍ଲା ତୁଷୁରା ସହରର ଅବସରପ୍ରାପ୍ତ ଇଞ୍ଜିନିୟର ସୁଧୀର ପାଣିଗ୍ରାହୀ ଏବଂ କଳ୍ପନା ପାଣିଗ୍ରାହୀଙ୍କ ପୁଅ ପ୍ରିୟବ୍ରତ ସମ୍ବଲପୁରର ଏକ ଘରୋଇ ସ୍କୁଲରେ ଶିକ୍ଷା ଜୀବନ ଆରମ୍ଭ କରି ଜିଏମ କଲେଜରୁ ଯୁକ୍ତ ୨ଶିକ୍ଷା ହାସଲ କରିଥିଲେ । ପରେ ଇଲେକ୍ଟ୍ରୋନିକ୍ସ ଏବଂ ଟେଲିକମ୍ୟୁନିକେସନରେ ବିଟେକ ଡିଗ୍ରୀ ହାସଲ କରି ଯାଜପୁରର ଏକ ଫେରୋକ୍ରମ କମ୍ପାନିରେ ଇଞ୍ଜିନିୟର ନିଯୁକ୍ତି ପାଇଥିଲେ । ପିଲାଟିଦିନରୁ ସଂଗୀତ ପ୍ରତି ଥିବା ଇଚ୍ଛା ତାଙ୍କୁ ବେଶି ଦିନ ବାନ୍ଧିରଖି ପାରିଲାନାହିଁ । ୨୦୧୧ ମସିହାରେ ଚାକିରି ଛାଡ଼ି ସେ ପୁନେସ୍ଥିତ ଫିଲ୍ମ ଆଣ୍ଡ ଟେଲିଭିଜନ ଇନଷ୍ଟିଚ୍ୟୁଟ (ଏଫଟିଟିଆଇ)ରେ ସାଉଣ୍ଡ ରେକର୍ଡ଼ିଂ ଏବଂ ଡିଜାଇନିଂ ବିଷୟରେ ଶିକ୍ଷା ଗ୍ରହଣ କଲେ ।

ଶିକ୍ଷାଗ୍ରହଣ ପରେ ଲତା ମଙ୍ଗେସକରଙ୍କ ସ୍ୱରଲତା ଷ୍ଟୁଡିଓରେ କିଛି ଦିନ କାମ କରିଥିଲେ । ପରେ ସଞ୍ଜୟ ପଟ୍ଟନାୟକଙ୍କ ନିର୍ଦ୍ଦେଶନାରେ ୨୦୧୩ ମସିହାରେ ପ୍ରସ୍ତୁତ ହୋଇଥିବା ‘ଶୁଖା ଆସୁଛି’ ଫିଲ୍ମରେ ସଙ୍ଗୀତ ନିର୍ଦ୍ଦେଶନା ଦେଇଥିଲେ । ତାପରଠୁ ଦ ଲାଷ୍ଟ ରାଇଟ, ୱାର୍କ ଫ୍ରମ ହୋମ, ଦ ସନ ରାଇଜେସ ଇନ ଦ ଇଷ୍ଟ ଭଳି ଅନେକ ଆନ୍ତର୍ଜାତିକ ଫିଲ୍ମରେ ସଂଗୀତ ନିର୍ଦ୍ଦେଶନା ଦେଇଥିଲେ । ଏଥିପାଇଁ ତାଙ୍କୁ ପରବର୍ତ୍ତି ସମୟରେ ଅନେକ ଆନ୍ତର୍ଜାତିକ ସମ୍ମାନ ମିଳିଥିଲା । ୨୦୨୦ ମସିହାରେ ଫିଲ୍ମ ନିର୍ଦ୍ଦେଶକ ବିକାଶ ଖନ୍ନାଙ୍କ ଆନ୍ତର୍ଜାତିକ ଫିଲ୍ମ ‘ଦ ଲାଷ୍ଟ କଲର’ରେ ସେ ପ୍ରଚ୍ଛଦ ସଂଗୀତ ଦେଇଥିଲେ । ଯାହା ପରବର୍ତ୍ତି ସମୟରେ ଓସ୍କାର ପାଇଁ ମନୋନୀତ ହୋଇଥିଲା । ଅଦ୍ୟାବଧି ପ୍ରିୟବ୍ରତ ମୁମ୍ବାଇରେ ରହିବା ସହ ୫ରୁ ଊଦ୍ଧ୍ୱର୍ ହିନ୍ଦୀ(ବଲିଉଡ) ଏବଂ ଓଡ଼ିଆ (ଓଲିଉଡ) ଫିଲ୍ମରେ ସଂଗୀତ ନିର୍ଦ୍ଦେଶକ ଭାବରେ କାମ କରିସାରିଛନ୍ତି । ଯାହା କରୋନା ପାଇଁ ମୁକ୍ତିଲାଭ ଅପେକ୍ଷାରେ ରହିଛି । ‘ଟ୍ରିବ୍ୟୁଟ ଟୁ ଲତା ମଙ୍ଗେସକର’ ପାଇଁ ନ୍ୟୁୟର୍କ ସିଟିର ବ୍ୟସ୍ତବହୁଳ ସହର ଟାଇମ୍ସ ସ୍କୋଏରଠାରେ ଡିଜିଟାଲ ପ୍ଲାଟଫର୍ମରେ ପ୍ରଚାରପ୍ରସାର ଚାଲିଛି । ଯେଉଁଥିରେ ଆନ୍ତର୍ଜାତିକ କଳାକାରମାନଙ୍କ ସହ ବଲାଙ୍ଗିର ପୁଅ ପ୍ରିୟବ୍ରତଙ୍କ ସମ୍ପର୍କରେ ମଧ୍ୟ ପ୍ରଚାର କରାଯାଉଛି।