20-Jul-2026

ସୁବର୍ଣ୍ଣପୁର (ମନୋରଞ୍ଜନ ତ୍ରିପାଠୀ )
ପବିତ୍ର ଦେବଭୂମି ତଥା ଦ୍ୱିତୀୟ ବାରାଣସୀ ଭାବେ ପରିଚିତ ସୁବର୍ଣ୍ଣପୁରର ଶ୍ରୀଶ୍ରୀ ଗୁଣ୍ଡିଚା ମନ୍ଦିର ଆଡ଼ପ ମଣ୍ଡପରେ ଆଜି ହେରା ପଞ୍ଚମୀ ଅବସରରେ ଚତୁର୍ଦ୍ଧାମୂର୍ତ୍ତି ରାମ-ଲକ୍ଷ୍ମଣ ଅବତାର ବେଶ ଧାରଣ କରି ଭକ୍ତବୃନ୍ଦଙ୍କୁ ଦିବ୍ୟ ଦର୍ଶନ ପ୍ରଦାନ କରିଥିଲେ। ପ୍ରଭୁଙ୍କ ଏହି ମନୋରମ ଓ ଆକର୍ଷଣୀୟ ବେଶ ଦର୍ଶନ କରିବା ପାଇଁ ସକାଳୁ ରାତି ପର୍ଯ୍ୟନ୍ତ ମନ୍ଦିର ପରିସରରେ ଶ୍ରଦ୍ଧାଳୁମାନଙ୍କର ଅପାର ଭିଡ଼ ଲାଗି ରହିଥିଲା।
ରାମାୟଣର ଆଦର୍ଶ, ଧର୍ମନିଷ୍ଠା, ଭ୍ରାତୃପ୍ରେମ ଓ ତ୍ୟାଗର ବାର୍ତ୍ତା ବହନ କରୁଥିବା ଏହି ରାମ-ଲକ୍ଷ୍ମଣ ଅବତାର ବେଶ ଭକ୍ତମାନଙ୍କ ମନରେ ଭକ୍ତି ଓ ଆଧ୍ୟାତ୍ମିକ ଚେତନା ସଞ୍ଚାର କରିଥିଲା। ପାରମ୍ପରିକ ନୀତିକାନ୍ତି ଅନୁଯାୟୀ ସେବାୟତମାନେ ପ୍ରଭୁଙ୍କ ବିଶେଷ ବେଶ ଓ ପୂଜାର୍ଚ୍ଚନା ସମ୍ପନ୍ନ କରିଥିଲେ।
ଆଡ଼ପ ମଣ୍ଡପରେ ଚାଲିଥିବା ଏହି ଅବତାର ବେଶ ପରମ୍ପରା ସୁବର୍ଣ୍ଣପୁରର ଜଗନ୍ନାଥ ସଂସ୍କୃତିର ଏକ ଅନନ୍ୟ ବୈଶିଷ୍ଟ୍ୟ ଭାବେ ପରିଗଣିତ। କେବଳ ଗୁଣ୍ଡିଚା ମନ୍ଦିର ନୁହେଁ, ସହରର ଶ୍ରୀଶ୍ରୀ ବୃନ୍ଦାବନ ବିହାରୀ ମନ୍ଦିର, ମଝିପଡ଼ାସ୍ଥିତ ରାମଧୁନ ଆଡ଼ପ ମଣ୍ଡପ ଏବଂ ଥନାପତିପଡ଼ା ଆଡ଼ପ ମଣ୍ଡପରେ ମଧ୍ୟ ପ୍ରଭୁଙ୍କ ବିଭିନ୍ନ ଅବତାର ବେଶ ଦର୍ଶନ ପାଇଁ ବ୍ୟାପକ ଜନସମାଗମ ହେଉଛି। ରଥଯାତ୍ରା ଅବସରରେ ସମଗ୍ର ସୁବର୍ଣ୍ଣପୁର ଏବେ ଭକ୍ତି, ଆଧ୍ୟାତ୍ମିକତା ଓ ଜଗନ୍ନାଥ ସଂସ୍କୃତିର ମହିମାରେ ଉତ୍ସବମୁଖର ହୋଇଉଠିଛି।
ପ୍ରଭୁଙ୍କ ଦିବ୍ୟ ରୂପ ଦର୍ଶନ କରି ଭକ୍ତମାନେ ଆତ୍ମବିଭୋର ହୋଇଥିବା ବେଳେ ସମଗ୍ର ଦେବଭୂମି ଭକ୍ତିମୟ ପରିବେଶରେ ମୁଖରିତ ହୋଇଉଠିଥିଲା। ଆଡ଼ପ ମଣ୍ଡପରେ ଚାଲିଥିବା ଏହି ଅବତାର ବେଶ ପରମ୍ପରା ଜଗନ୍ନାଥ ସଂସ୍କୃତିର ଗୌରବମୟ ଐତିହ୍ୟକୁ ଆଜି ମଧ୍ୟ ସଜୀବ ରଖିଥିବା ବେଳେ ଭକ୍ତମାନଙ୍କୁ ଧର୍ମ, ଭକ୍ତି ଓ ଆଧ୍ୟାତ୍ମିକତାର ବାର୍ତ୍ତା ପ୍ରଦାନ କରୁଛି।