17-Jun-2026

ବରପାଲି - (ସୁଦାମ ଦୀପ) ବରଗଡ ଜିଲ୍ଲା ବରପାଲିର ପ୍ରସିଦ୍ଧ ୧୪୯ ତମ ଶୀତଳ ଷଷ୍ଠୀ ଯାତ୍ରାର ତୃତୀୟ ସନ୍ଧ୍ୟା ଦିବସରେ ଶିବ ବିବାହ ମୋହତ୍ସବର ଏକ ମୁଖ୍ୟ ପାରମ୍ପରିକ ରୀତି ଭୈରବ ବାବାଙ୍କ ଗୁଆଗୁଣ୍ଡା ନୀଉତା ଭବ୍ୟ ଶୋଭା ଯାତ୍ରା ସହ ଅନୁଷ୍ଠିତ ହୋଇଯାଇଛି, ସ୍ଥାନୀୟ କପିଳେଶ୍ୱର ନଗରରୁ ଭୈରବ ବାବାଙ୍କ ପରଭା ବାହାରି ନଗର ପରିକ୍ରମା କରି ବିଭିନ୍ନ ଦେବଦେବୀ ଓ ଦେବ ମଣ୍ଡଳୀକୁ ଗୁଆଗୁଣ୍ଡା ବିତରଣ କରି ଶିବ ବିବାହ ପାଇଁ ନିମନ୍ତ୍ରଣ ପ୍ରଦାନ କରିଥିଲେ l ପୂର୍ବପୁରୁଷ ଅମଳରୁ ଚାଲିଆସୁଥିବା ପରମ୍ପରା ଅନୁଯାୟୀ ମିର୍ଦ୍ଧା ଓ କୁଡା ଆଦିବାସି ସମ୍ପ୍ରଦାୟର ଯୁବକମାନେ ଭୈରବ ବାବାଙ୍କ ପରଭାକୁ କାନ୍ଧରେ ବୋହି ନଗର ପରିକ୍ରମା କରିଥିଲେ l ସୁସଜ୍ଜିତ କାଠର ପାଲିଙ୍କି, ବାଜା ଘଣ୍ଟୁଆ ଦଳ, ଆତସ ବାଜି,ସହ କିନ୍ନର ସମ୍ପ୍ରଦାୟର ସଂସ୍କୃତିକ ପ୍ରଦର୍ଶନ ଓ ସଙ୍ଗୀତ କାର୍ଯ୍ୟକ୍ରମ ଆହୁରି ଆକର୍ଷଣ କରିଥିଲା l ଶୋଭାଯାତ୍ରା ବ୍ଲକ କଲୋନୀ, ରେଲୱେ ଷ୍ଟେସନ ଛକ, କଲେଜ ଛକ, ଶ୍ୱାମା ଛକ, ଗାନ୍ଧୀ ଛକ, ଡାକ୍ତରଖାନା ଛକ, ହାଟପଦା, ଗଣେଶ ମନ୍ଦିର, ଦୁର୍ଗା ମନ୍ଦିର, ଓ ତେଲିପଡ଼ା ଭାଗବତ ମନ୍ଦିର ରାସ୍ତା ଦେଇ ଭଣ୍ଡାର ଗୃହ ସମ୍ଭୁଖରେ ପଞ୍ଚିଥିଲା l ସେଠାରେ ପରମ୍ପରା ଅନୁଯାୟୀ ପରଭା ବୋହୁଥିବା ବିଗାଡିମାନେ ପରଭାକୁ କାନ୍ଧରେ ଅବତରଣ କରିଥିଲେ l ନଗର ପରିକ୍ରମା ସମୟରେ ଭୈରବ ବାବା କପିଳେଶ୍ୱର ବାବା ଓ ମାତା ପାର୍ବତୀଙ୍କ ଦିବ୍ୟ ବିବାହ ଉତ୍ସବ ପାଇଁ ବିଭିନ୍ନ ଦେବଦେବୀଙ୍କୁ ଗୁଆ ଗୁଣ୍ଡା ପ୍ରଦାନ କରି ନିମନ୍ତ୍ରଣ କରିଥିଲେ l ପରେ ବିଳମ୍ବିତ ରାତ୍ରିରେ ଶୀତଳ ଷଷ୍ଠୀ ମହୋତ୍ସବ କମିଟି ପକ୍ଷରୁ କୁକାବନ୍ଧସ୍ଥିତ ରାମେଶ୍ବର ଶିବ ମନ୍ଦିରରେ ମହାଦୀପ ସ୍ଥାପନ କାର୍ଯ୍ୟ ସମ୍ପନ୍ନ ହୋଇଥିଲା l ଏହି ଗୁଆଗୁଣ୍ଡା ନିଉତା କାର୍ଯ୍ୟକ୍ରମ ସହ ବରପାଲି ର ପ୍ରସିଦ୍ଧ ଶୀତଳ ଷଷ୍ଠୀ ଶିବ ବିବାହ ମହୋତ୍ସବର ଧାର୍ମିକ ଓ ପାରମ୍ପରିକ ମାହୋଲ ଆହୁରି ଉତ୍ସାହମୟ ହୋଇଉଠିଛି l