17-Jun-2026

ଅତାବିରା(ଆକାଶ ମିଶ୍ର): ପାଖାପାଖି ୩୦ ପ୍ରତିଶତ ଟୋକନ ନ ଆସିବା ନେଇ ମଙ୍ଗଳବାର ହେବାକୁ ଥିବା ରାସ୍ତାରୋକ ପ୍ରଶାସନ ଓ ଚାଷୀଙ୍କ ମଧ୍ୟରେ ଆଲୋଚନା ପରେ ସ୍ଥଗିତ ହୋଇଛି।  ଆସନ୍ତା ୨୧ ତାରିଖ ମଧ୍ୟରେ ବାକିତକ ଟୋକନ ନ ଆସିଲେ ୨୨ ତାରିଖ ଦିନ ରାସ୍ତାରୋକ ହେବ ବୋଲି ଚାଷୀ ଓ ପ୍ରଶାସନିକ ଅଧିକାରୀ ମଧ୍ୟରେ ଲିଖିତ ରାଜିନାମା ହୋଇଛି। ପ୍ରକାଶ ଯେ, ଚାଷୀ ପଂଜୀକରଣ ସମୟରେ ଦିଆଯାଇଥିବା ଜମି ପରିମାଣ ଅନୁପାତରେ ବହୁ କମ୍ ପରିମାଣର ଟୋକନ ଆସିଛି। ବହୁ ଚାଷୀଙ୍କ ଦ୍ବିତୀୟ ଓ ତୃତୀୟ ଟୋକନ ଆସେ ନୁହେଁ।  ଜୁନ ମାସ ପର୍ଯ୍ୟନ୍ତ ସରକାର ଧାନ କିଣିବା ଲକ୍ଷ୍ୟ ରଖିଥିବା ବେଳେ ହାତରେ ମାତ୍ର ୧୫ ଦିନ ଥିବାରୁ ଓଡ଼ିଶା ରାଜ୍ୟ କୃଷକ ସଂଗଠନର ନେତୃତ୍ବରେ ଚାଷୀ ମଙ୍ଗଳବାର ରାସ୍ତାରୋକ କରିବାର ନିଷ୍ପତ୍ତି ନେଇଥିଲା। ଏନେଇ ଜୁନ ୧ ତାରିଖ ଅତାବିରା ପଂଚାୟତ ସମିତିରେ ଜିଲ୍ଲାସ୍ତରୀୟ ଯୁଗ୍ମ ଶୁଣାଣି ଶିବିରରେ ଜିଲ୍ଲାପାଳଙ୍କୁ ଲିଖିତ ଅଭିଯୋଗ ଦେଇଥିଲେ। ଇତି ମଧ୍ୟରେ ୫ ଥର ଆଲୋଚନା ସରିଥିଲା। ଆସନ୍ତା କାଲି ସମ୍ଭାବ୍ୟ ରାସ୍ତାରୋକ ପୂର୍ବରୁ ରବିବାର ସଂଧ୍ୟାରେ ଗୋଡ଼ଭଗା ମାର୍କେଟ୍ ୟାର୍ଡରେ ପ୍ରଶାସନ ଓ କୃଷକ ସଂଗଠନ ସହ ଚାଷୀଙ୍କ ଆଲୋଚନା ହୋଇଥିଲା। ଏଥିରେ ଡ଼ିଆର୍ସିଏସ୍  ଯୁଗଳ କୁଶୋର ଦାଶ, ଏସିଏସ୍ଓ ବ୍ୟାମାକେଶ ମାଝୀ, ଏକ୍ଜିକ୍ୟୁଟିଭ ମାଜିଷ୍ଟ୍ରେଟ୍ ଅଙ୍କିତ ପଣ୍ଡା, ଏଏସ୍ଓ ପଦାରବିନ୍ଦ ତ୍ରିପାଠୀ, ଥାନାଧିକାରୀ ପ୍ରକାଶ କର୍ଣ୍ଣ ସହ କୃଷକ ସଂଗଠନର ସଭାପତି ଭୁବନ ପ୍ରଧାନ, ଚାଷୀନେତା ବୀରେନ୍ଦ୍ର କର, ଟିକେଲାଲ ମିଶ୍ର, ସୁବାଷ ବିଶ୍ବାଲ, ବୃଦ୍ଧଦେବ ନନ୍ଦ, ବି ପାପାରାଓ, ସଂକ୍ରାନ୍ତି ଭେଙ୍କଟେଶ୍ବର ରାଓ, ଭି କ୍ରିଷ୍ଣ ମୂର୍ତ୍ତି, ଏମ୍ ସତ୍ୟ ପ୍ରକାଶ, ଜେ ସୂର୍ଯ୍ୟପ୍ରକାଶ, କେ ରାମ ବାବୁ, ମୂରଲି କ୍ରିଷ୍ଣା, ସୁରେଶ କର୍ଣ୍ଣ ପ୍ରମୁଖ ଶତାଧିକ ଚାଷୀ ଉପସ୍ଥିତ ରହି ଆଲୋଚନା କରିଥିଲେ। ଉପକୂଳ ଅଂଚଳରେ ରଜ ଛୁଟି ଥିବାରୁ ଛୁଟି ପରେ ୨୦ ତାରିଖ ମଧ୍ୟରେ ସମସ୍ତ ଟୋକନ ଆସିବାକୁ ପ୍ରଶାସନ ପ୍ରତିଶ୍ରୁତି ହୋଇଥିଲା। ୨୧ ତାରିଖ ମଧ୍ୟରେ ଟୋକନ ନ ଆସିଲେ ୨୨ ତାରଖି ରାସ୍ତରୋକ କରିବାକୁ ଚାଷୀମାନେ ଚରଣବାଣୀ ଶୁଣାଇଥିଲେ।