31-May-2026

କଟକ,(ତପନ ମହାନ୍ତି ): ବାଲିଯାତ୍ରା ପଡିଆରେ ଶନିବାର ରାତିରେ ଜଣେ ଯୁବତୀଙ୍କୁ ଅସଦାଚରଣ ଉଦ୍ୟମ ହୋଇଛି। ଏହି ଯୁବତୀଙ୍କ ପୁରୁଷ ବନ୍ଧୁଙ୍କ ମଧ୍ୟ ଆକ୍ରମଣ ଉଦ୍ୟମ ହୋଇଛି । ଜୀବନ ବଞ୍ଚାଇବା ପାଇଁ ଭୟରେ ଏହି ଦୁଇ ଜଣ ପଡିଆରେ ଗାଡି ଫୋପାଡ଼ି ଡିସିପିଙ୍କ କାର୍ଯ୍ୟାଳୟରେ ପଶିଯାଇଥିଲେ। ଏ ସମ୍ପର୍କରେ ଖବର ପାଇ କ୍ୟାଣ୍ଟନମେଣ୍ଡ ଥାନା ପୁଲିସ ପହଞ୍ଚି ଯୁବକ ଓ ଯୁବତୀଙ୍କୁ ଆଣିଥିବା ବେଳେ ଗାଡ଼ିକୁ ଜବତ କରିଛି। ଏହି ମାମଲାରେ ପୁଲିସ ଜଣେ ଅଭିଯୁକ୍ତକୁ ଅଟକ ରଖି ପଚରାଉଚୁରା କରୁଛି। ସନ୍ଧ୍ୟା ହେଲେ ତଳ ବାଲିଯାତ୍ରା ପଡିଆରେ ଶହ ଶହ ସଂଖ୍ୟାରେ ପ୍ରେମୀ ଯୁଗଳଙ୍କ ଭିଡ ଜମୁଛି। କମ ବୟସର ପ୍ରେମିକ ପ୍ରେମିକାମାନେ ଘରୁ ବିଭିନ୍ନ ପ୍ରକାର ଆଳ ଦେଖାଇ ବାଲିଯାତ୍ରା ପଡିଆରେ ଆଡା ଜମାଉଛନ୍ତି। ପଡିଆର ଅନ୍ଧାରୁଆ ସ୍ଥାନ ଦେଖି ବସିବା ଏବଂ ଗଛ ମୂଳରେ ପୁଅଝିଅ ମାନେ ଘଣ୍ଟା ଘଣ୍ଟା ଧରି ବସିରହିବାରୁ ସେମାନଙ୍କୁ ନିଶାଡିଆ ମଦୁଆ ମାନେ ପିଛାକରି ଅସଭ୍ୟ ଭାଷାରେ କମେଣ୍ଟ ମାରୁଥିବା ଅଭିଯୋଗ ହେଉଛି। କିଛି ଅଘଟଣ ଘଟିଲେ ସେଥିପାଇଁ ଦାଇ କିଏ ରହିବ? ତୁରନ୍ତ ପୋଲିସ ହସ୍ତକ୍ଷେପ କରି ସନ୍ଧ୍ୟା ହେଲେ ତଳ ବାଲିଯାତ୍ରା ପଡିଆରୁ ପ୍ରେମୀ ଯୁଗଳଙ୍କୁ ଘୋଉଡେଇବା ସହ  ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ କଟକ ମୁରବି ମାନଙ୍କ ପକ୍ଷରୁ ଦାବି ହେଉଛି।