09-May-2026

ଲୋଇସିଂହା, (ପ୍ରେରଣା ଖବର) ସରକାରଙ୍କ ପକ୍ଷରୁ ଲୋକଙ୍କ ଯାତାୟାତ ସୁବିଧା ପାଇଁ ପ୍ରତି ବ୍ଲକକୁ ଯୋଗାଇ ଦିଆ ଯାଇଛି ଲକ୍ଷୀବସ୍ ସେବା l ଉକ୍ତ ବସ୍ ତଥା ବସ୍ ରହଣି ଓ ଯାତ୍ରୀ ମାନଙ୍କ ସୁବିଧା ପାଇଁ କୋଟି କୋଟି ଟଙ୍କାରେ ନିର୍ମିତ ହୋଇଛି ବସଷ୍ଟାଣ୍ଡ l ହେଲେ ଲୋଇସିଂହା ବ୍ଲକରେ ନିର୍ମିତ ବସଷ୍ଟାଣ୍ଡ ରେ ମାତ୍ର ତିନୋଟି ଲକ୍ଷୀବସ୍ ଛଡ଼ା ଆଉ କୌଣସି ସରକାରୀ ଅଥବା ବେସରକାରୀ ବସ୍ ବସଷ୍ଟାଣ୍ଡକୁ ଯାଉ ନାହିଁ । ତିନୋଟି ବସ୍ ଯିବା ଆସିବାରେ ସୀମିତ ରହିଛି ବସଷ୍ଟାଣ୍ଡ l ଗୋଟିଏ ବସ୍ ବ୍ଲକ ନିକଟସ୍ଥ ପାଖାପାଖି ଅଞ୍ଚଳରେ ଯିବା ଆସିବା କରୁଥିବା ବେଳେ ଆଉ ଗୋଟିଏ ବସ୍ ଝାରମୁଣ୍ଡା, କୁଶଙ୍ଗ, ସରଗାଡ, ତଳିଉଡାର, ରତାଖଣ୍ଡି ପଟେ ଯିବା ଆସିବା କରୁଛି l ହେଲେ ଆଉ ଗୋଟିଏ ବସ୍ ଉକ୍ତ ରାସ୍ତା ଦେଇ  ଲୋଇସିଂହା ବ୍ଲକର ଲୁଚକିବାହାଲ, ମାହାରପାଲି ଛକ, ବବଜା, ବାନିପାଲି ଘୁଙ୍ଗି, ଗେର୍ଡି ଦେଇ ଯାତାୟାତ କରିବା କଥା । ହେଲେ କାହା ନିର୍ଦ୍ଦେଶରେ ଗୋଟିଏ ବସ୍ ଲୋଇସିଂହାରୁ ବାହାରି ବଲାଙ୍ଗିର ବ୍ଲକର ଫାସଡ ସକମା, ରାଣୀପାଲି, କିରାବାହାଲ ଦେଇ ଲୋଇସିଂହା ବ୍ଲକର କୁଶମେଲକୁ ଯାଉଛି l ପୁଣି କୁଶମେଲରୁ  ତାହା ଫେରୁଛି ବିନା ପାସେଞ୍ଜରରେ l ଅଥଚ ଲୋଇସିଂହା ବ୍ଲକର ଆଭ୍ୟନ୍ତରୀଣ ଅଞ୍ଚଳ ରତାଖଣ୍ଡି, ମାହାରପାଲି ଛକ, ବବଜା, ବାନିପାଲି ଜି.ଏସ ଡୁଙ୍ଗୁରିପାଲି ଅଞ୍ଚଳର ଲୋକେ ତଥା କଲେଜ ଛାତ୍ରଛାତ୍ରୀ ନାହିଁ ନ ଥିବା ଅସୁବିଧାର ସମ୍ମୁଖୀନ ହେବାକୁ ପଡୁଥିବା ବେଳେ ଗୋଟିଏ ବସ କୁ ବଲାଙ୍ଗିର ବ୍ଲକ ଏରିଆକୁ କାହା ସ୍ୱାର୍ଥରେ ଯାଉଛି l ଏ ନେଇ ଅଞ୍ଚଳର ଲୋକେ ଲୋଇସିଂହା ବ୍ଲକରେ ଅନେକ ଥର ଅଭିଯୋଗ କରିଥିଲେ ମଧ୍ୟ କୌଣସି ସୁଫଳ ମିଳି ନାହିଁ l ଏହାର ସୁବିଧା ପାଇଁ ଜିଲ୍ଲା ପ୍ରଶାସନ ଧ୍ୟାନ ଦେବାକୁ ଅଞ୍ଚଳ ବାସୀ  ଦାବି କରିଛନ୍ତି l