09-May-2026

ବଲାଙ୍ଗୀର (ପ୍ରେରଣା ଖବର ): କୁଡ଼ସିଂହା ଅଞ୍ଚଳର ଗୋପାଳ ସାହୁ ଆଜି ଅତ୍ୟନ୍ତ ଦୁଃଖଦ ଓ ଅସହାୟ ପରିସ୍ଥିତି ମଧ୍ୟରେ ଜୀବନ କାଟୁଛନ୍ତି। ଚିକିତ୍ସାଜନିତ ସମସ୍ୟା କାରଣରୁ ପ୍ରଥମେ ପ୍ରାୟ ଦୁଇ ବର୍ଷ ପୂର୍ବେ ତାଙ୍କର ଗୋଟିଏ ଗୋଡ଼  କାଟିବାକୁ ପଡ଼ିଥିଲା। ପରେ ଶାରୀରିକ ଅବସ୍ଥା ଅଧିକ ଜଟିଳ ହେବାରୁ ସମ୍ପ୍ରତି ତାଙ୍କର ଆଉ ଗୋଟିଏ ଗୋଡ଼ ମଧ୍ୟ କାଟିବାକୁ ପଡ଼ିଛି।ପରିବାରର ଏକମାତ୍ର ଉପାର୍ଜନକାରୀ ଥିବା ଶ୍ରୀ ସାହୁ ବର୍ତ୍ତମାନ ସମ୍ପୂର୍ଣ୍ଣ ଭାବେ ଶଯ୍ୟାଶାୟୀ ଅବସ୍ଥାରେ ଅଛନ୍ତି। ଦୁଇଟି ଗୋଡ଼

ହରାଇବା ପରେ ତାଙ୍କ ପରିବାରର ଆର୍ଥିକ ସ୍ଥିତି ଭାଙ୍ଗି ପଡ଼ିଛି। ଦୈନନ୍ଦିନ ଖାଦ୍ୟ ଓ ଔଷଧ ଖର୍ଚ୍ଚ ଯୋଗାଡ଼ କରିବା ମଧ୍ୟ ପରିବାର ପାଇଁ କଷ୍ଟକର ହୋଇପଡ଼ିଛି। ପରିବାର ଚଲାଇବା ପାଇଁ ତାଙ୍କ ସ୍ତ୍ରୀ ଦିନମଜୁରିଆ ଭାବେ କାମ କରି ପରିବାରକୁ ସମ୍ଭାଳୁଥିବା ଜଣାପଡ଼ିଛି।ଏହି ଦୁଃଖଦ ପରିସ୍ଥିତି ବିଷୟରେ ଜାଣିବା ପରେ ମାହେଶ୍ୱରୀ ପକ୍ଷରୁ ସହଯୋଗ ରାଶି ତାଙ୍କ ଘରକୁ ପହଞ୍ଚି ପ୍ରଦାନ କରାଯାଇଛି। ସଙ୍ଗଠନର ସଭାପତି ଶୋଭନ କୁମାର ଅଗ୍ରୱାଲ, ସଦସ୍ୟ ସୂରଜ କୁମାର ପଟେଲ, ପଦ୍ମାଳୟା ବାରିକ, ମନୋରଞ୍ଜନ ଝଙ୍କାର, ଲୋକନାଥ ପଧାନ, ହିରନ୍ ମଲ୍ଲିକ, ଯୁଳିଏନା ରିଟଚେ ତାଙ୍କ ସହ ସାକ୍ଷାତ କରି ଆଗାମୀ ଚିକିତ୍ସା, ଔଷଧ, ଫିଜିଓଥେରାପି ଓ ପୁନର୍ବାସ ପାଇଁ ସମସ୍ତଙ୍କୁ

ସହଯୋଗର ହାତ ବଢ଼ାଇବାକୁ ଅନୁରୋଧ କରିଛନ୍ତି।

ମାହେଶ୍ୱରୀ ସଙ୍ଗଠନ ର ପରିଚାଳନା ନିର୍ଦ୍ଦେଶକ ଅଙ୍କୁଶ କୁମାର ପାଣ୍ଡିଆ କହିଛନ୍ତି ଯେ, ସମାଜର ଅସହାୟ ଓ ଆବଶ୍ୟକତାରେ ଥିବା ଲୋକଙ୍କ ପାଖରେ ଠିଆ ହେବା ହିଁ ସଂଗଠନର ମୂଳ ଉଦ୍ଦେଶ୍ୟ ଓ ଆଗାମୀ ଦିନରେ ମଧ୍ୟ ଏଭଳି ମାନବିକ କାର୍ଯ୍ୟ ଜାରି ରହିବ।