27-Apr-2026

ଯୋଗଦେଲେ ଜିଲ୍ଲା ସ୍ୱତନ୍ତ୍ର ଉନ୍ନୟନ ପରିଷଦ ଅଧ୍ୟକ୍ଷ 

କଣ୍ଟାମାଳ(ଜୟକୁମାର ମହାରଣା): କଣ୍ଟାମାଳ ବ୍ଲକ ଋଣ୍ଡିମହୁଲ ଗ୍ରାମରେ ଚାଲିଥିବା ଛପନ ପ୍ରହର ନାମଯଜ୍ଞର ଆଜି ସେମବାର ଚତୁର୍ଥ ଦିନ। ପ୍ରଚଣ୍ଡ ରୌଦ୍ରତାପକୁ ଦୃଷ୍ଟିରେ ରଖି ଆୟୋଜକ ପକ୍ଷରୁ ବିରାଟ ଛାମୁଣ୍ଡିଆ ଫ୍ୟାନ୍ କୁଲର୍ ସହ ପାନୀୟ ଜଳର ବ୍ୟାପକ ବ୍ୟବସ୍ଥା କରାଯାଇଛି। ଆଜି ନବନିଯୁକ୍ତ ଜିଲ୍ଲା ସ୍ୱତନ୍ତ୍ର ଉନ୍ନୟନ ପରିଷଦ ଅଧ୍ୟକ୍ଷ ଡ଼ମ୍ଭରୁଧର କହଁର ଉକ୍ତ ନାମଯଜ୍ଞରେ ଯୋଗ ଦେଇ ହରିନାମ ଗାନ କରିଥିଲେ।
ପରେ ସେ ଗ୍ରାମବାସୀଙ୍କ ସହ ଗ୍ରାମର ସମସ୍ୟା ସମ୍ପର୍କରେ ଆଲୋଚନା କରିଥିଲେ। ଋଣ୍ଡିମହୁଲ ଗ୍ରାମବାସୀଙ୍କ ଆନୁକୂଲ୍ୟ ରେ ଓ ଅଞ୍ଚଳବାସୀଙ୍କ ସହଯୋଗରେ ଗତ ୨୪ ତାରିଖରୁ ଚାଲିଥିବା ଏହି ୫୬ପ୍ରହର ନାମଯଜ୍ଞରେ ପ୍ରତିଦିନ ହଜାର ହଜାର ଭକ୍ତ ଓ ଶ୍ରଦ୍ଧାଳୁଙ୍କ ସମାଗମରେ ସମଗ୍ର ଋଣ୍ଡିମହୁଲ ଗ୍ରାମ ଲୋକାରଣ୍ୟ ହୋଇପଡୁଛି। ପୂଜକ ଭାବରେ ଅଶୋକ କୁମାର ଦାସ ପୂଜା କାର୍ଯ୍ୟ ତୁଲାଉଥିବା ବେଳେ ରାଜେଶ ବାରିକ ଓ ପତ୍ନୀ ରୁବି ବାରିକ କର୍ତ୍ତା ଦାୟିତ୍ୱ ତୁଲାଉଛନ୍ତି। ସେହିପରି ଆଜି ସ୍ୱନାମଧନ୍ୟା ସଂକୀର୍ତ୍ତନ୍ୟ ଗାୟିକା ଜ୍ୟୋତ୍ସ୍ନାମୟୀ ଦୀକ୍ଷିତଙ୍କ କଣ୍ଠରୁ ସୁମଧୁର ନାମ ସଂକୀର୍ତ୍ତନ ଶୁଣିବାକୁ ଦୂରଦୂରାନ୍ତରୁ ଲୋକମାନଙ୍କ ସମାଗମ ହୋଇଥିବା ଦେଖିବାକୁ ମିଳିଥିଲା।  

ଉକ୍ତ ନାମଯଜ୍ଞରେ ବିଭିନ୍ନ ସ୍ଥାନରୁ ଆସିଥିବା ମହିଳା ଓ ପୁରୁଷ ସଂକୀର୍ତ୍ତନଦଳ ହରିନାମ ନେଇଥିଲେ। ସନ୍ଧ୍ୟାରୁ ବିଳମ୍ବିତ ରାତି ପର୍ଯ୍ୟନ୍ତ ନାମଯଜ୍ଞରେ ଭକ୍ତ, ଶ୍ରଦ୍ଧାଳୁ ଓ ଗ୍ରାମବାସୀଙ୍କ ସମାଗମ ଦେଖିବାକୁ ମିଳିଛି। ଭକ୍ତ ଓ ଶ୍ରଦ୍ଧାଳୁଙ୍କ ଗହଳିରେ ଚଳଚଞ୍ଚଳ ହୋଇଛି ସମଗ୍ର ଋଣ୍ଡିମହୁଲ ଅଞ୍ଚଳ।