06-Apr-2026

ଅତାବିରା(ଆକାଶ ମିଶ୍ର) ଓଡ଼ିଶା ରାଜ୍ୟ କୃଷକ ସଂଗଠନ ଅତାବିରାର ବାର୍ଷିକ ସାଧାରଣ ସଭା ଆସନ୍ତା ୭ ତାରିଖ ଲାଦରପାଲିସ୍ଥିତ ରାମଚଣ୍ଡୀ ମନ୍ଦିର କଲ୍ୟାଣ ମଣ୍ଡପରେ ଅନୁଷ୍ଠିତ ହେବ। ଏଥିରେ ବରଗଡ଼, ସମ୍ବଲପୁଲ ଓ ସୋନପୁର ଜିଲ୍ଲାର ବିଭିନ୍ନ ଚାଷୀ ସଂଗଠନର ସଦସ୍ୟ, ନେତା ଯୋଗ ଦେବାର କାର୍ଯ୍ୟକ୍ରମ ରହିଛି। ଏଥିରେ କୃଷକର ଉନ୍ନତି  ସକାଶେ ସଂଗଠିତ ଲଢ଼େଇ କରିବା, ଧାନ ବିକ୍ରିରେ ହେଉଥିବା ସମସ୍ୟା ଓ ତା’ର ସମାଧାନ, ସମସ୍ତ କୃଷକଙ୍କୁ ପେନସନ ପ୍ରଦାନ, କୃଷି କ୍ଷେତ୍ରରେ ବିଦ୍ୟୁତ ସଂପୂର୍ଣ୍ଣ ମାଗଣା ଆଦି ବିଷୟ ଆଲୋଚନାର ପ୍ରସଙ୍ଗ ରହିବ ବୋଲି ସଂଗଠନ ପକ୍ଷରୁ ଆହୁତ ସାମ୍ବାଦିକ ସମ୍ମିଳନୀରେ ସଂଗଠନର ସଭାପତି ବୀରେନ୍ଦ୍ର କର ସୂଚନା ଦେଇଛନ୍ତି। ସାମ୍ବାଦିକ ସମ୍ମିଳନୀରେ ଅନ୍ୟମାନଙ୍କ ମଧ୍ୟରେ କାର୍ଯ୍ୟକାରୀ ସଭାପତି ଟିକେଲାଲ ମିଶ୍ର, ଭୁବନ ପ୍ରଧାନ, କୁବେର ପ୍ରଧାନ ଯୋଗ ଦେଇଥିଲେ। ସମାବେଶ ପରେ ସରକାର ଉପରେ ଚାପ ପ୍ରୟୋଗ କରିବା ପାଇଁ ଆଲୋଚନା ହେବ। ଚାଷ ଓ ଚାଷୀ ସମାସ୍ୟା ନେଇ କେହିଁ ଚାଷୀ ସଂଗଠନ ବା ବ୍ୟକ୍ତିଗତ ଭାବେ ଲଢ଼େଇ କରିଲେ ସରକାର କେସ, ଗିରଫ, ଜେଲ ଦେବା ଭଲି କାର୍ଯ୍ୟାନୁଷ୍ଠାନ ଗ୍ରହଣ କରୁଛନ୍ତି। କିଛି ଦିନ ତଳେ ନବ ନିର୍ମାଣ କୃଷକ ସଂଗଠନର ଅନ୍ୟତମ ଯୁବ ଚାଷୀ ନେତା ପ୍ରଦ୍ୟୁମ୍ନ ପାଢ଼ୀଙ୍କୁ ଗିରଫ କରି ଜେଲ ଦଣ୍ଡ ଭଲି ପରିସ୍ଥିତି ଦେଖିବାକୁ ମିଳିଲା। ଏ ସମସ୍ୟା ନେଇ ସଂଗଠିତ ହୋଇ ଲଢ଼େଇ କରିବାକୁ ଆହ୍ବାନ କରିବା ପାଇଁ ଉଦ୍ୟମ କରାଯିବ ବୋଲି ଜଣାଇଥିଲେ। ଏହି ସମାବେଶରେ ବହୁ ସଂଖ୍ୟାରେ ଚାଷୀ ଯୋଗ ଦେବାକୁ ଅନୁରୋଧ କରାଯାଇଥିଲା।