04-Apr-2026

ବଲାଙ୍ଗୀର, ତା. ୦୪/୦୪(ପ୍ରେରଣା ଖବର ) :  ସଇଁତଲା ବ୍ଲକ ଅନ୍ତର୍ଗତ ଡେଙ୍ଗ ସରକାରୀ ଉନ୍ନୀତ ଉଚ୍ଚ ବିଦ୍ୟାଳୟରେ ଆଡମ୍ବରର ସହକାରେ ବିଦ୍ୟାଳୟରେ ପ୍ରବେଶ ଉତ୍ସବ  ତଥା ଖଡ଼ିଛୁଆଁ ଉତ୍ସବ ଆରମ୍ଭ ହୋଇଯାଇଛି।ବିଦ୍ୟାଳୟର ପ୍ରଧାନ ଶିକ୍ଷକ ରାମ ନାରାୟଣ ଦାଶଙ୍କ ତତ୍ତ୍ୱାବଧାନରେ ଏବଂ ଶିକ୍ଷୟିତ୍ରୀ କାନ୍ତି ଭୋଇଙ୍କ ପରିଚାଳନାରେ ଶ୍ରୀ ଗଣେଶ ବନ୍ଦନା ସହ ନୂତନ ଭାବେ ବିଦ୍ୟାଳୟରେ ପ୍ରବେଶିକା ଆରମ୍ଭ ସହ ପାରମ୍ପରିକ ଓଡ଼ିଆ ପଦ୍ଧତିରେ ଖଡ଼ି ଛୁଆଇଁ ବିଦ୍ୟାରମ୍ଭ କରାଯାଇଛି । ସର୍ବୋପରି ବିଦ୍ୟାଳୟରେ ଶିଶୁ ବାଟିକାରେ ପ୍ରବେଶ କରୁଥିବା ଛାତ୍ରଛାତ୍ରୀଙ୍କୁ  ଶିକ୍ଷକ, ଶିକ୍ଷୟିତ୍ରୀ ତଥା ବିଦ୍ୟାଳୟ ପରିଚାଳନା କମିଟିର ସଦସ୍ୟ ବୃନ୍ଦ ଘରକୁ ଘର ବୁଲି ପୂର୍ବରୁ ବିଦ୍ୟାଳୟକୁ ଆସିବା ପାଇଁ ନିମନ୍ତ୍ରଣ କାର୍ଡ ବଣ୍ଟନ କରିଥିଲେ । ପରେ ଏହି ଦିନ ଓଡିଶା ସରକାରଙ୍କ ବିଦ୍ୟାଳୟ ଓ ଗଣଶିକ୍ଷା ବିଭାଗ ଦ୍ୱାରା ସାରା ରାଜ୍ୟରେ ପ୍ରବେଶ ଉତ୍ସବ ପାଳନ କରାଯାଉଥିବା ବେଳେ ଏହି ଅବସରରେ ଶିକ୍ଷା ରଥକୁ ନେଇ ଆଞ୍ଚଳିକ ସାଧନ କେନ୍ଦ୍ର ସଂଯୋଜକ ପ୍ରମୋଦ କୁମାର ବୁଡେକ୍ ବିଦ୍ୟାଳୟରେ ପହଞ୍ଚିଥିଲେ , ଯାହାକୁ ଆଡମ୍ବର ଓ ଉତ୍ସାହ ଉଦ୍ଦୀପନା ମଧ୍ୟରେ ଡେଙ୍ଗ ସରକାରୀ ବିଦ୍ୟାଳୟରେ ସ୍ଵାଗତ ସମ୍ବର୍ଦ୍ଧନା କରିବା ସହ ବିଦ୍ୟାଳୟରେ ନୂତନ ଆଡମିଶନ୍ ଶୁଭାରମ୍ଭ ହୋଇଛି । କାର୍ଯ୍ୟକ୍ରମରେ ବିଦ୍ୟାଳୟର ଦ୍ରୌପଦୀ ଭୋଇ, ଜ୍ୟୋସ୍ନା ଝାଙ୍କର, ଗାୟତ୍ରୀ ବାରିକ, ତପସ୍ଵିନୀ ପଟେଲ, ଶିକ୍ଷକ ଲିଙ୍ଗରାଜ ନନ୍ଦ, ଦେବେଶ ହୋତା, ମନରଞ୍ଜନ ପରିଡ଼ା, ହିମାଂଶୁ ବିଶ୍ଵାଳ, କୃପାସିନ୍ଧୁ ମିଶ୍ର, ବୃନ୍ଦାବନ ଭୂଏ   ପ୍ରମୁଖ ଛାତ୍ରଛାତ୍ରୀଙ୍କ  ସମ୍ମୁଖରେ ନୂତନ ଶିକ୍ଷାର୍ଥୀଙ୍କୁ ଖଡ଼ି ଛୁଆଁଇ ସାମୂହିକ ଭାବେ ବିଦ୍ୟାରମ୍ଭ କରାଇଥିଲେ । ଏହି ଅବସରରେ ଶିଶୁ ବାଟିକାରେ ୧୦ ଜଣ ଶିଶୁ ନାମ ଲେଖାଇବା ସହ ଅନ୍ୟାନ୍ୟ ଶ୍ରେଣୀ ଯଥା ଷଷ୍ଠ , ନବମରେ ମଧ୍ୟ ନୂତନ ଶିକ୍ଷାର୍ଥୀ ନାମ ଲେଖାଇଛନ୍ତି।