30-Mar-2026

ବରପାଲି (ସୁଦାମ ଦୀପ)
ବରଗଡ ଜିଲ୍ଲା ବରପାଲି ଶ୍ରୀରାମ ମନ୍ଦିରରେ ୧୩୭ ତମ ରାମ ନବମୀ ତଥା ସୀତା ବିବାହ ଉତ୍ସବ ଅନୁଷ୍ଠିତ ହୋଇଯାଇଛି । ଗତ ୨୬ ତାରିଖ ସନ୍ଧ୍ୟାରେ କଳସ ଶୋଭାଯାତ୍ରା ପରେ ୨୭ ତାରିଖରେ ରାମ ନବମୀ ପାଳିତ ହୋଇଥିଲା । ୨୮ ତାରିଖ ଶନିବାର ରାତ୍ରରେ ଶ୍ରୀରାମଙ୍କ ବରାନୁଗମନ ଶୋଭାଯାତ୍ରା ମନ୍ଦିରରୁ ବାହାରି ସହର ପରିକ୍ରମା ପୂର୍ବକ ରାମ ମନ୍ଦିରରେ ପହଞ୍ଚିବା ପରେ ସୀତା-ରାମଙ୍କ ବୈଦିକ ରୀତିରେ ବୈବାହିକ କାର୍ଯ୍ୟ ସମ୍ପନ୍ନ ହୋଇଥିଲା । ବରାନୁଗମନ ଶୋଭାଯାତ୍ରା ରେ ଦୁଲ୍‌ଦୁଲି ବାଦ୍ୟ, ଡିଜେ, ଘଣ୍ଟ ବାଦ୍ୟ ଆଦି ସାମିଲ ହୋଇଥିଲେ । ବରଯାତ୍ରୀ ରାମ ମନ୍ଦିରରେ ପହଞ୍ଚିବା ପରେ କନ୍ୟା ପକ୍ଷରୁ ବାଟ ବରଣ ଆଦି କାର୍ଯ୍ୟ ସମାପନ ପରେ ବିବାହ କାର୍ଯ୍ୟ ସମ୍ପନ୍ନ ହୋଇଥିଲା। ଚଳିତ ବର୍ଷ ସୁଧୀର ଦାଶ ଓ ବିଜୟ ଲକ୍ଷ୍ମୀ ଦାଶ କନ୍ୟା ପିତାମାତା ଦାୟିତ୍ଵ ନିର୍ବାହ କରିଥିବା ବେଳେ ସୁନିଲ ଦାଶ ଓ ସୁମତି ଦାଶ ବର ପିତାମାତା ଦାୟିତ୍ଵ ନିର୍ବାହ କରିଥିଲେ। ବାରାନୁଗମନ ଶୋଭାଯାତ୍ରା ରେ ବହୁ ଭକ୍ତ ସାମିଲ ହୋଇଥିଲେ। ବିବାହ ମଣ୍ଡପ ରେ ଶ୍ରୀରାମ ସୀତା ଭକ୍ତଙ୍କୁ ଦର୍ଶନ ଦେଇଥିଲେ । ଆସନ୍ତା ବୁଧବାର ଦେବ ଦମ୍ପତିଙ୍କ ମନ୍ଦିର ପ୍ରବେଶ ହେବାକୁ ସ୍ଥିରୀକୃତ ହୋଇଛି। ପ୍ରତ୍ୟହ ସନ୍ଧ୍ୟାରେ ଭଜନ, କୀର୍ତ୍ତନ, ପ୍ରବଚନ ଆଦି କାର୍ଯକ୍ରମ ଅନୁଷ୍ଠିତ ହେଉଛି। ଦର୍ଶନ ପାଇଁ ମନ୍ଦିରରେ ଭକ୍ତଙ୍କ ପ୍ରବଳ ଭିଡ ପରିଲକ୍ଷିତ ହୋଇଛି । ଏହି ସମସ୍ତ କାର୍ଯକ୍ରମକୁ ଶ୍ରୀରାମ ମନ୍ଦିରର ଶ୍ରୀରାମ ଯୁବକ ସଂଘର ସମସ୍ତ କର୍ମକର୍ତ୍ତା, ସଭ୍ୟ ତଥା ବରପାଲି ନଗରବାସୀ ପରିଚାଳନା କରୁଛନ୍ତି