13-Mar-2026

ଡୁଙ୍ଗୁରିପାଲି(ଆରବିନ୍ଦ ମିଶ୍ର):  ଶବକୁ ସମସ୍ତେ ସମ୍ମାନ କରିଥାନ୍ତି।
ସମ୍ମାନର ସହିତ ଶବଦାହ କରାଯାଇଥାଏ। ଶତୃ ହେଲେ ମଧ୍ୟ ଶବକୁ ନେଇ କୌଣସି ନକରାତ୍ମକ ମତ ମନ୍ତବ୍ୟ ପ୍ରକାଶ କରନ୍ତି ନାହିଁ । ଶବ ଦାହ ବେଳେ ଗ୍ରାମାଞ୍ଚଳର ଲୋକେ ପ୍ରତ୍ୟେକ ଘରୁ ଖଣ୍ଡେ ଲେଖାଏଁ କାଠ ଦେଇଥାନ୍ତି। ଯାହାର କାଠର ଅଭାବ ଥାଏ କିମ୍ବା କିଣିବାକୁ ସମ୍ଭବ ନଥାଏ ଗାଁ ଲୋକଙ୍କ ଦାନ କାଠରେ ଶବ ଦାହ କରାଯାଇଥାଏ। ଯିଏ କାଠ ଦେଇଥାଏ ନିଜକୁ ଧନ୍ୟ ମନେ କରୁଥିବା ବେଳେ କାଠ ନେଇଥିବା ଲୋକ ମଧ୍ୟ ତା' ଉପରେ କୃତଜ୍ଞତା ଦେଖାଇଥାଏ। ବର୍ତ୍ତମାନ ଅନେକ ଅଞ୍ଚଳରେ ଶବ ଦାହ ପାଇଁ କାଠ ମିଳୁ ନାହିଁ । ତତ୍କାଳୀନ ଗତ ସରକାର ୨୦୧୩ ଅଗଷ୍ଟ ୧୫ରେ ହରିଶ୍ଚନ୍ଦ୍ର ଯୋଜନାରେ ଗ୍ରାମାଞ୍ଚଳର ଲୋକଙ୍କ ପାଇଁ ୨ହଜାର ଏବଂ ସହରାଞ୍ଚଳର ଲୋକଙ୍କ ଶବଦାହ ପାଇଁ ୩ହଜାର ଟଙ୍କା,
ସହାୟତା ପ୍ରଦାନ ବ୍ୟବସ୍ଥା କରିଥିଲେ । ଶବ ଦାହ ସମୟରେ ସହାୟତା ଯୋଗାଇ ଦେଲେ କାଠ କିଣାଯାଇ ପାରିବ। ଯଦ୍ବାରା ସମ୍ମାନର ସହିତ ଶବ ଦାହ ହୋଇ ପାରିବ।  ଆଗ କାଳେରେ ଲୋକେ ନଦୀ ପଠାରେ ନାଳ 
ନିଜ ଜମିରେ ଖଣ୍ଡି ରେ ଶବ ପୋତି ଦେଉଥିଲେ। ଅନେକ ସମୟରେ ଶବକୁ ବିଲୁଆ, ହେଟାବାଘ ଭଳି ବନ୍ୟଜନ୍ତୁ କାଢ଼ି ନେଇ ଖାଇ ଯାଉଥିଲେ। ବର୍ତ୍ତମାନ ଲୋକେ ଶବ ଦାହ କରୁଥିବାରୁ ହରିଶ୍ଚନ୍ଦ୍ର ଯୋଜନାରେ ସହାୟତା ପ୍ରଦାନ ବ୍ୟବସ୍ଥା କରାଯାଇଛି । ପ୍ରତ୍ୟେକ ପଞ୍ଚାୟତର ସରପଞ୍ଚ ମାନଙ୍କୁ ଏଥିପାଇଁ ଗୁରୁ ଦାୟିତ୍ବ ପ୍ରଦାନ କରାଯାଇଛି I ପଞ୍ଚାୟତର ଯେ କୌଣସି ପାଣ୍ଠିରୁ ତ୍ବରିତ ଅର୍ଥ ପ୍ରଦାନ କରାଯିବ। କିନ୍ତୁ ଅନଲାଇନ ମାଧ୍ଯମରେ
ସହାୟତା ପାଇବାରେ ଅନେକ ଦିନ ବିତି ଯାଉଛି । କେତେକ ପଞ୍ଚାୟତରେ ଅଧିକାରୀ ଟଙ୍କା ନାହିଁ କହୁଛନ୍ତି । ଅର୍ଥ ଆସିଲେ ସହାୟତା ପ୍ରଦାନ କରାଯିବ କହି ଫେରାଇ ଦିଆଯାଉଛି। କିନ୍ତୁ କେତେକ ପଞ୍ଚାୟତର ସରପଞ୍ଚ ନିଜ ପକେଟରୁ ମଧ୍ଯ ଟଙ୍କା ପ୍ରଦାନ କରିଥାନ୍ତି। । ହରିଶ୍ଚନ୍ଦ୍ର ଯୋଜନାରେ କେତେ ଜଣ ସହାୟତା ପାଇଁ ଆବେଦନ କରିଛନ୍ତି, କେତେ ଜଣ ପାଇଛନ୍ତି ଓ କେତେ ଜଣ ସହାୟତା ପାଇବାକୁ ଅପେକ୍ଷା କରିଛନ୍ତି ଏହାର ତଦନ୍ତ କରାଗଲେ ଅନିୟମିତତାର ଗୁମର ଖୋଲିବ। ସରକାର ତୁରନ୍ତ ଅନିୟମିତତା ଅଭିଯୋଗର ତଦନ୍ତ କରି ଦୋଷୀ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି ହେଉଛି। ଏହା ସହିତ ଗରିବ ପରିବାରକୁ ତୁରନ୍ତ ସହାୟତା ପ୍ରଦାନ ନେଇ ବ୍ୟବସ୍ଥା କରିବାକୁ ମତ ପ୍ରକାଶ ପାଉଛି।