02-Mar-2026

ସିନାପାଲି (ଚିନ୍ତାମଣି ନେତାମ)  

ପୂର୍ଣ୍ଣାହୁତି ପରେ ଭବ୍ୟ ନଗର ପରିକ୍ରମା, ଦଧିହାଣ୍ଡି ଭଂଗାରେ ଭକ୍ତିମୟ ହେଲା ସାଲେବିହିଡି 
ନୂଆପଡା ଜିଲ୍ଲା ସିନାପାଲି ବ୍ଲକ ଖରସେଲ ପଞ୍ଚାୟତ ଅନ୍ତର୍ଗତ ସାଲେବିହିଡି ଗାଁରେ ଆୟୋଜିତ ଅଖଣ୍ଡ ଷୋହଳ ପ୍ରହରୀ ନାମଯଜ୍ଞର ପୂର୍ଣ୍ଣାହୁତି ଆଜି ଭକ୍ତି ଓ ଆଧ୍ୟାତ୍ମିକତାର ମଧ୍ୟରେ ସଫଳତାର ସହ ସମ୍ପନ୍ନ ହୋଇଛି। ପ୍ରଭାତରୁ ହରିନାମ ସଂକୀର୍ତ୍ତନ, ପୂଜାର୍ଚ୍ଚନା ଓ ହୋମଯଜ୍ଞରେ ଗାଁର ପରିବେଶ ପବିତ୍ର ହୋଇଯାଇଥିଲା।
ପୂର୍ଣ୍ଣାହୁତି ପରେ ଭବ୍ୟ ନଗର ପରିକ୍ରମା ଆୟୋଜିତ ହୋଇଥିଲା। ଭକ୍ତମାନେ ହରିନାମ ଗାଇ ଗାଁର ପ୍ରତ୍ୟେକ ରାସ୍ତା ଦେଇ ପରିକ୍ରମା କରିଥିଲେ। ମୃଦଙ୍ଗ, ଝାଞ୍ଜ ଓ କରତାଳର ଧ୍ୱନିରେ ସମଗ୍ର ଗାଁ ଭକ୍ତିରେ ମୁଗ୍ଧ ହୋଇଯାଇଥିଲା।
ନଗର ପରିକ୍ରମା ପରେ ଆୟୋଜିତ ଦଧିହାଣ୍ଡି ଉତ୍ସବ ମୁଖ୍ୟ ଆକର୍ଷଣ ଥିଲା। ଯୁବକମାନେ ଉତ୍ସାହ ଓ ଏକତାର ପ୍ରତୀକ ଭାବେ ଦଧିହାଣ୍ଡି ଭଂଗିଥିଲେ। “ହରିବୋଲ” ଓ “ଜୟ ଶ୍ରୀକୃଷ୍ଣ” ଧ୍ୱନିରେ ପରିବେଶ ଗୁଞ୍ଜିଉଠିଥିଲା ଓ ଭକ୍ତମାନଙ୍କ ମନରେ ଅପାର ଆନନ୍ଦ ସୃଷ୍ଟି ହୋଇଥିଲା।ଗାଁର ବୃଦ୍ଧ, ଯୁବକ, ମହିଳା ଓ ଶିଶୁମାନେ ଏହି ପବିତ୍ର କାର୍ଯ୍ୟକ୍ରମରେ ସମ୍ମିଳିତ ହୋଇ ଗାଁର ଏକତା, ଭକ୍ତି ଓ ସାମୁଦାୟିକ ଭାବନାର ଉଜ୍ଜ୍ୱଳ ଚିତ୍ର ପ୍ରଦର୍ଶନ କରିଥିଲେ। ଏହି ନାମଯଜ୍ଞ ଓ ଦଧିହାଣ୍ଡି ଉତ୍ସବ ସାଲେବିହିଡି ଗାଁରେ ଆଧ୍ୟାତ୍ମିକ ଜାଗରଣର ଏକ ସ୍ମରଣୀୟ ଅଧ୍ୟାୟ ହୋଇରହିଛି।