04-Jan-2026

ବଲାଙ୍ଗୀର(ପ୍ରେରଣା ଖବର): ବଲାଙ୍ଗିର ସଦର ବ୍ଲକ ଅର୍ନ୍ତଗତ ବାନ୍ଧନଘୋର ଗ୍ରାମ ଠାରେ ଥିବା ଶ୍ରୀରାମ ମନ୍ଦିରରେ ପୌଷ ପୂର୍ଣ୍ଣିମା ଅବସରରେ ସପ୍ତମ ପୁଷ୍ୟାଭିଷେକ ଉତ୍ସବ ମହା ସମାରୋହରେ ଅନୁଷ୍ଠିତ ହୋଇଯାଇଛି। ଶ୍ରୀରାମ ମନ୍ଦିର ପରିଚାଳନା କମିଟି ଟ୍ରଷ୍ଟ ଓ ଓଡିଶା ସରକାରଙ୍କର ଓଡିଆ ଭାଷା,ସାହିତ୍ୟ ଓ ସଂସ୍କୃତି ବିଭାଗର ସହଯୋଗରେ ଅନୁଷ୍ଠିତ ଏହି ଉତ୍ସବରେ ସହସ୍ରାଧିକ ଭକ୍ତଙ୍କର ସମାବେଶ ହୋଇଥିଲା । ପୂର୍ବାହ୍ନରେ ନନ୍ଦି ଗ୍ରାମ ଠାରେ ଶ୍ରୀରାମ ଭରତ ମିଳନ ହୋଇ ଥିଲା। ପ୍ରତିବର୍ଷ ପରି ଏ ବର୍ଷ ମଧ୍ୟ ସୁବଳ ଚନ୍ଦ୍ର ଗୁରହାଣ୍ଡି ଭରତ ଭୂମିକା ଗ୍ରହଣ କରିଥିଲେ। ପରେ ପ୍ରଭୁ ଶ୍ରୀରାମ, ମାତା ସୀତା ଓ ବୀର ଲକ୍ଷ୍ମଣ ସୁସଜ୍ଜିତ ରଥରେ ନଗର ପରିକ୍ରମା କରିଥିଲେ। ଗ୍ରାମରେ ପ୍ରତ୍ୟେକ ଘର ଦୁଆରେ ଝୋଟି,ଚିତା କାଟି ପୂଜା କରିବା ସହିତ ପ୍ରଭୁଙ୍କର ଦର୍ଶନ କରିଥିଲେ। ପରିକ୍ରମାରେ ଶ୍ରୀରାମ ମନ୍ଦିର ମହିଳା ସଂକୀର୍ତନ ଦଳ, ଭଗବତ ମଣ୍ଡଳୀ ଓ ହରିପାଲି ସଂକୀର୍ତନ ଦଳ ଭାଗ ନେଇଥିଲେ। ଏହା ସହିତ ମାଗୁରବେଡା ସମ୍ପ୍ରଦା ଦଳ, ନୂଆପଡା ମାନ୍ଦଲ ଦଳ ଓ ଜଗତସିଂହପୁରର ଘୋଡାନାଚ ଦଳ, କଅଗାଁର ବୀଣାକାର ଦଳ ମଧ୍ୟ ସାମିଲ ହୋଇଥିଲେ । ବୀର ସାହୁ -ପର୍ଶୁରାମ, ସନ୍ତୋଷ ବାଗ-ହନୁମାନ ହୋଇ ନିଜର କଳା ପ୍ରଦର୍ଶନ କରିଥିଲେ। ରଥରେ ସାରଥୀ ହୋଇଥିଲେ ମାଗୁରବେଡାର ହାଡୁ ବିଶି। ଶ୍ରୀରାମ କଲଚରାଲ ଗ୍ରୁପର ସଭାପତି ମନ୍ମୟ ତ୍ରିପାଠୀ ଏହାକୁ ପରିଚାଳନା କରିଥିଲେ। 

ନଗର ପରିକ୍ରମା ଶେଷରେ ଶ୍ରୀରାମ ମନ୍ଦିର ଠାରେ ପୁଷ୍ୟାଭିଷେକ ହୋମ କରିଥିଲେ ମନ୍ଦିର ପୂଜକ ହିମାଂଶୁ ମିଶ୍ର । କର୍ତ୍ତା ହୋଇଥିଲେ ସପତ୍ନୀକ ଶ୍ରୀ ଅଚ୍ୟୁତାନନ୍ଦ ମିଶ୍ର । ପରେ ପରେ ପ୍ରସାଦ ସେବନ କରାଯାଇଥିଲା । ଅପରାହ୍ନରେ ଭକ୍ତ ସମାବେଶ ଅନୁଷ୍ଠିତ ହୋଇଥିଲା । ଏହି ଅବସରରେ ଧର୍ମପ୍ରାଣ ବ୍ୟକ୍ତିତ୍ୱ ତରୁଣ କୁମାର ପରିଛାଙ୍କୁ ସମ୍ବର୍ଦ୍ଧିତ କରାଯାଇଥିଲା। ଅନ୍ୟମାନଙ୍କ ମଧ୍ୟରେ ଅଧ୍ୟାପକ ସନ୍ଦୀପ କୁଅଁର, ରିଷିକେଶରୁ ଆସିଥିବା ବାବା ଏସ.ଏସ. ଗିରି ମଧ୍ୟ ଉପସ୍ଥିତ ଥିଲେ। ସମସ୍ତ କାର୍ଯ୍ୟକ୍ରମ ଟ୍ରଷ୍ଟର ଚେୟାରମେନ ମଳୟ ଆନନ୍ଦ କୁମାର ତ୍ରିପାଠୀଙ୍କ ତତ୍ୱାବଧାନରେ ଅନୁଷ୍ଠିତ ହୋଇଥିଲା। ପରିଚାଳନାରେ ସହଯୋଗ କରିଥିଲେ ଚିଙ୍କୁ ପ୍ରଧାନ, ସତ୍ୟନାରାୟଣ ଗହିର, ଗଣ୍ଡାରାମ ଗହିର, ଶ୍ରୀମୟ ତ୍ରିପାଠୀ ଓ ସର୍ବଜିତ ତ୍ରିପାଠୀ। ପ୍ରକାଶ ଥାଉକି ଶ୍ରୀରାମ ମନ୍ଦିର ପ୍ରତିଷ୍ଠା ହେବା ଦିନ ଠାରୁ ପୌଷ ପୂର୍ଣ୍ଣିମା ଦିନ ଗ୍ରାମବାସୀମାନେ ଆମିଷ ବର୍ଜନ ପୂର୍ବକ ଏହି ସାମିଲ ହୋଇ ଅଂଚଳରେ ଉଦାହରଣ ସୃଷ୍ଟି କରିଛନ୍ତି ।