02-Jan-2026

ବଲାଙ୍ଗିର(ପ୍ରେରଣା ଖବର)-ଟିଟିଲାଗଡ଼ ତହସିଲ ଅନ୍ତର୍ଗତ ଦିଗଶିରା ପଞ୍ଚାୟତ ନିମୁର୍ଲା ଗ୍ରାମରେ ବେଆଇନ ଭାବରେ ଦୀର୍ଘ ବର୍ଷ ଧରି ପଥର ଖାଦାନ ଚାଲିଛି l ଅନବରତ ପ୍ରଚୁର ମାତ୍ରାରେ ପାହାଡ଼ ବିସ୍ଫୋରଣ ସହ ବଡ଼ ବଡ଼ କ୍ରସର ମେସିନ ଲଗାଇ ପଥର ଖନନ ହେଉଥିବା ନେଇ  ଖବରକାଗଜ ମାନଙ୍କରେ ବାରମ୍ବାର ତଥ୍ୟ ଭିତ୍ତିକ ଖବର ପ୍ରକାଶିତ ହୋଇଥିଲା l ଏନେଇ ୨୦୨୧ରେ ତତ୍କାଳୀନ ଉପଜିଲାପାଳ ସୌମେଶ ଉପାଧ୍ୟାୟ, ଖଣି ବିଭାଗ ସହ ଉକ୍ତ କ୍ରସରରେ ଚଢ଼ାଉ କରି ୬ କୋଟି ୫୮ ଲକ୍ଷ ଟଙ୍କା କ୍ରସର ମାଲିକ ଏଆରଏସଏସ ଉପରେ ଜୋରିମାନା କରିଥିବା ଗଣମାଧ୍ୟମକୁ ସୂଚିତ କରିଥିଲେ l  ଉକ୍ତ ବେଆଇନ କ୍ରସର ନେଇ ଅଞ୍ଚଳର ପରିବେଶ ପ୍ରଦୂଷିତ ହେଉଥିବା, ପାହାଡ଼ରେ ବିସ୍ଫୋରଣ ନେଇ ଆଖପାଖ ଗ୍ରାମ ଗୁଡିକର ଘର ଦୋହଲି ଉଠୁଥିବା  ବିଷୟରେ ତତ୍କାଳୀନ ଦିଗଶିରା ସରପଞ୍ଚ ଗୋଲକ ବିହାରୀ ସିଂଭୋଇ, କୁଶକେଲା ସରପଞ୍ଚ ହରିନାରାୟଣ ମିଶ୍ର, ସମାଜସେବୀ ସଞ୍ଜୀବ ସାହୁ, ବର୍ତମାନର ରାଜ୍ୟ ସରପଞ୍ଚ ସଂଘ କାର୍ଯ୍ୟକାରୀ ସଭାପତି ବୀରବର ସାହୁ ଟିଟିଲାଗଡ଼ ଉପଜିଲାପାଳ ଏବଂ ତହସିଲଦାରଙ୍କ ଠାରେ ଏନେଇ ଲିଖିତ ଅଭିଯୋଗ ମଧ୍ୟ ଦାଖଲ କରିଥିଲେ l ହେଲେ ସୂଚନା ଅନୁଯାୟୀ ଉକ୍ତ କମ୍ପାନୀ ଜୋରିମାନା ଟଙ୍କା ଆଦୌ ଭରଣା କରିନଥିବା ଜଣାଯାଇଛି l ଅନ୍ୟପକ୍ଷରେ ଉକ୍ତ କ୍ରସର ବର୍ତ୍ତମାନ ପୁଣି ସକ୍ରିୟ ହୋଇ ବେଆଇନ ପଥର ବୁହା ଚାଲିଥିବା ପୂର୍ବତନ ସରପଞ୍ଚ ଶ୍ରୀ ସିଂଭୋଇ ତଥା ସ୍ଥାନୀୟ ଅଞ୍ଚଳବାସୀ ଦାବୀ କରିଛନ୍ତି l ଏନେଇ ଅଞ୍ଚଳର ଚାଷ ଜମି ପ୍ରଦୂଷିତ ହେଉଛି, ପଥର ଗୁଣ୍ଡ ବାୟୁରେ ମିଶି ଉଡୁଥିବା ନେଇ ଲୋକଙ୍କ ସ୍ୱାସ୍ଥ୍ୟ ଖରାପ ହେଉଥିବା ଅଭିଯୋଗ ହୋଇଛି l ଅନ୍ୟପକ୍ଷରେ ବେଆଇନ କ୍ରସର କରିଥିବା ମାଲିକଙ୍କ ଠାରୁ ଜୋରିମାନା ଟଙ୍କା ଅସୁଲ ବଦଳରେ ତତ୍କାଳୀନ ଉପଜିଲାପାଳ ଶ୍ରୀ ଉପାଧ୍ୟାୟ କମ୍ପାନୀ ଠାରୁ ସେ ସମୟରେ ଏକ ଶବ ବାହକ ଯାନ ଆଣି ନିଜ କାର୍ଯ୍ୟାଳୟ ସମ୍ମୁଖରେ ଗଣମାଧ୍ୟମ ପ୍ରତିନିଧିଙ୍କୁ ଡାକି ତତ୍କାଳୀନ ବଲାଙ୍ଗୀର ଜିଲାପାଳ ଚଞ୍ଚଳ ରାଣାଙ୍କ ହସ୍ତରେ ଉଦଘାଟନ କରିଵା ଚର୍ଚ୍ଚାର ବିଷୟ ପାଲଟିଥିଲା l ତେବେ ଉକ୍ତ ଶବ ବାହକ ଯାନ ଉଦଘାଟନ ପରେ ଟିଟିଲାଗଡ଼ ଉପଖଣ୍ଡ ଡାକ୍ତରଖାନାରେ ରହିବା ବଦଳରେ କୁଆଡେ ଗଲା ସେ ନେଇ ସ୍ଥାନୀୟ ଜନତା ଖୋଜଖବର ପାଉନାହାନ୍ତି l ଶବ ବାହକ ଯାନ ଆଣି ବେଆଇନ କ୍ରସର ମାଲିକକୁ ପ୍ରଶାସନ ହିରୋ କରିଦେଲା l ଜୋରିମାନା ଟଙ୍କା କୁଆଡେ ଗଲା ବୋଲି  ଜନସାଧାରଣ ରେ ପ୍ରଶ୍ନ ହୋଇଛି l ତେବେ ରାଜ୍ୟର ଜଣେ ବରିଷ୍ଠ ଅଧିକାରୀ ଙ୍କ ମଧ୍ୟସ୍ଥତା ରେ ଏକ ବଡ ଡିଲ ହୋଇଥିବା ଚର୍ଚା ହେଉଛି l କିଛି ଦିନ ବନ୍ଦ ପରେ ନିର୍ମୁଳl ର ଏହି ପଥର ଖାଦାନ ଓ କ୍ରସର୍ ଚାଲୁଥିବାରୁ ଏନେଇ ଜନଅସନ୍ତୋଷ ବଢୁଛି l ଏହି ଅଭିଯୋଗ ନେଇ ବଲାଙ୍ଗିର ଖଣି ଅଧିକାରୀ କିମ୍ବା ଟିଟିଲାଗଡ଼ ତହସିଲଦାର ମୁହଁ ଖୋଲିନାହାନ୍ତି l ବଲାଙ୍ଗିର ଖଣି ଅଧିକାରୀ ଚନ୍ଦ୍ରକାନ୍ତ ମହାନ୍ତ ଙ୍କୁ ପଚାରିବାରୁ କାଗଜପତ୍ର ଯାଞ୍ଚ କଲାପରେ ଏନେଇ କହିପାରିବି ବୋଲି କହିଛନ୍ତି l