29-Dec-2025

ତୁଷୁରା  (ପଞ୍ଚାନନ ନାଏକ) ବଲାଙ୍ଗିର ଜିଲ୍ଲା ଗୁଡଭେଲା ବ୍ଲକ ଅନ୍ତର୍ଗତ ଘୁନା ମହୋତ୍ସବ ପଡିଆ ଏହି ସନ୍ଧ୍ୟାରେ ଏକ ଅପୂର୍ବ ସାଂସ୍କୃତିକ ଆବହାରେ ପରିଣତ ହୋଇଉଠିଥିଲା। ଓଡ଼ିଆ ଲୋକସଂସ୍କୃତିର ମହକ, ପାରମ୍ପରିକ କଳାର ଝଙ୍କାର ଓ ଲୋକକଳାକାରଙ୍କ ଉତ୍ସାହୀ ପ୍ରଦର୍ଶନ ମଧ୍ୟରେ ଶିକେରପାଟ୍ ମହୋତ୍ସବ ୨୦୨୫–୨୬ର ଚତୁର୍ଥ ସାଂସ୍କୃତିକ ସନ୍ଧ୍ୟା ଅତ୍ୟନ୍ତ ଗରିମାମୟ ଭାବେ ଅନୁଷ୍ଠିତ ହୋଇଯାଇଥିଲା।
ମହୋତ୍ସବ କମିଟିର  ସଭାପତି ଶ୍ରୀ ରୋହିତ ମାଝୀଙ୍କ ସଭାପତିତ୍ୱରେ ଆୟୋଜିତ ଏହି ଗମ୍ଭୀର ସଭାରେ ଟିଟଲାଗଡ ବିଧାୟକ ଶ୍ରୀ ନବୀନ ଜୈନ ମୁଖ୍ୟ ଅତିଥି ଭାବେ ଯୋଗଦେଇ ଶିକେରପାଟ୍ ମହୋତ୍ସବକୁ ଅଞ୍ଚଳୀୟ ସାଂସ୍କୃତିକ ବିକାଶର ଏକ ଶକ୍ତିଶାଳୀ ମାଧ୍ୟମ ଓ ସୂତ୍ରଧାର ବୋଲି ଅଭିହିତ କରିଥିଲେ।
ତାଙ୍କ ଉଦ୍ବୋଧନରେ ଶ୍ରୀ ଜୈନ କହିଥିଲେ ଯେ, ଏପରି ମହୋତ୍ସବ ମାଧ୍ୟମରେ ଗ୍ରାମୀଣ ଓ ଆଞ୍ଚଳିକ କଳାକାରମାନେ ନିଜ ପ୍ରତିଭା ପ୍ରଦର୍ଶନ କରିବାର ସୁଯୋଗ ପାଉଛନ୍ତି, ଯାହା ଓଡ଼ିଆ ସାହିତ୍ୟ, ସଂସ୍କୃତି ଓ ପାରମ୍ପରିକ କଳାର ସୁରକ୍ଷା ସହିତ ଏହାର ବିକାଶକୁ ମଧ୍ୟ ସୁନିଶ୍ଚିତ କରୁଛି। ଆଗାମୀ ଦିନରେ ଶିକେରପାଟ୍ ମହୋତ୍ସବ ଅନ୍ୟାନ୍ୟ ଅଞ୍ଚଳ ପାଇଁ ମଡେଲ ହେବ ବୋଲି ସେ ଆଶା ବ୍ୟକ୍ତ କରିଥିଲେ।
ବିକାଶ ପ୍ରସଙ୍ଗରେ କଥା ରଖି ଶ୍ରୀ ଜୈନ ଗତ ୨୬ ତାରିଖ ଏହି ମହୋତ୍ସବରେ ଯୋଗଦେଇଥିବା ପୂର୍ବତନ ମନ୍ତ୍ରୀ ଟୁକୁନି ସାହୁଙ୍କ ମନ୍ତବ୍ୟର ଜୋରଦାର ପ୍ରତିଉତ୍ତର ଦେଇଥିଲେ। ସେ କହିଥିଲେ ଯେ, ଖୋଦ୍ ଜଳସମ୍ପଦ ମନ୍ତ୍ରୀ ଥିବା ସମୟରେ ମଧ୍ୟ ସାଧାରଣ ଲୋକଙ୍କୁ ବୁନ୍ଦାଏ ପାନୀୟ ଜଳ ଯୋଗାଇ ପାରିନଥିବା ଲୋକ ଆଜି ବିକାଶକୁ ନେଇ କଥା କହୁଛନ୍ତି, ଯାହା ଅତ୍ୟନ୍ତ ଦୁଃଖଦ ଓ ବିରୋଧାଭାସପୂର୍ଣ୍ଣ। ବିନା ଡିପିଆର ଓ ବିନା ସଠିକ୍ ଇଷ୍ଟିମେଣ୍ଟରେ କେବଳ ନଡ଼ିଆ ବାଡେଇ ଉଦ୍‌ଘାଟନ କରିଲେ ଯେ ବିକାଶ ହୁଏ ନାହିଁ, ତାହା ଜନସାଧାରଣ ଭଲଭାବେ ବୁଝି ସାରିଛନ୍ତି ବୋଲି ସେ କଟାକ୍ଷ କରିଥିଲେ।
ଏହି ଗରିମାମୟ ସଭାରେ ପୂର୍ବତନ ଗୁଡଭେଲା ବ୍ଲକ ଅଧ୍ୟକ୍ଷ ଶ୍ରୀ ଅଶୋକ ଦୋରା, ଉପାଧ୍ୟକ୍ଷ ଶ୍ରୀ ଟୁକୁରାମ ପାଣିଗ୍ରାହୀ, ଘୁନା ସରପଞ୍ଚ ଶ୍ରୀମତୀ କବିତା ମହାନନ୍ଦ ପ୍ରମୁଖ ଅତିଥିମାନେ ମଧ୍ୟ ଯୋଗଦେଇ ଶିକେରପାଟ୍ ମହୋତ୍ସବ ଅଞ୍ଚଳୀୟ ଏକତା, ସଂସ୍କୃତି ଓ ସାମୁଦାୟିକ ସମ୍ପ୍ରୀତିର ଉତ୍ସବ ବୋଲି ମତ ପ୍ରକାଶ କରିଥିଲେ।
ମହୋତ୍ସବ କମିଟି ସଦସ୍ୟ ଶ୍ରୀ ଧୁବଳେଶ୍ୱର ସାହୁ ସୁସ୍ପଷ୍ଟ ଓ ସୁସଂଖ୍ୟଳିତ ଭାବେ ଅତିଥି ପରିଚୟ ପ୍ରଦାନ କରିଥିବା ବେଳେ ଶ୍ରୀ ଚକାନନ୍ଦ କମ୍ପ ମଞ୍ଚ ପରିଚାଳନା କରି ସମଗ୍ର କାର୍ଯ୍ୟକ୍ରମକୁ ଶୃଙ୍ଖଳାବଦ୍ଧ କରିଥିଲେ।
ଓଡ଼ିଆ ଭାଷା ସାହିତ୍ୟ, ସଂସ୍କୃତି ଓ ପର୍ଯ୍ୟଟନ ବିଭାଗ, ଓଡ଼ିଶା ସରକାର ଏବଂ ପୂର୍ବାଞ୍ଚଳ ସାଂସ୍କୃତିକ କେନ୍ଦ୍ର, ଭାରତ ସରକାରଙ୍କ ସହଯୋଗରେ ଆୟୋଜିତ ଏହି ସନ୍ଧ୍ୟାରେ ଘୋଡ଼ାନାଚ, ଘୁମରା, ଭଜନ-ଭକ୍ତି, ରାମଲୀଳା, ଏବଂ ଆଧୁନିକ ସଂଗୀତ ଓ ଲୋକନୃତ୍ୟର ସୁନ୍ଦର ସମନ୍ୱୟ ଦେଖିବାକୁ ମିଳିଥିଲା। ଇଣ୍ଡିଆନ ମ୍ୟୁଜିକ ଚେମ୍ବର, ଢେଙ୍କାନାଳ, ଭଜନ ଭକ୍ତି, ଖୋର୍ଦ୍ଧା, ଘୁମରା, ଜୁନାଗଡ, ମା ବୈଷ୍ଣଦେବୀ କଳା ପରିଷଦ, ଜାମୁଟ, ବୌଲି କଳା ପରିଷଦ, ବଉଦ ସହ ୨୦ରୁ ଅଧିକ ଆଞ୍ଚଳିକ କଳାକାର ନିଜ ନିଜ ପ୍ରତିଭାର ପ୍ରଦର୍ଶନ କରି ଦର୍ଶକମାନଙ୍କୁ ମନ୍ତ୍ରମୁଗ୍ଧ କରିଥିଲେ।
ସମସ୍ତ ସାଂସ୍କୃତିକ କାର୍ଯ୍ୟକ୍ରମର ସଫଳ ସଂଯୋଜନା ଶ୍ରୀ ସୁଧିର ନାୟକଙ୍କ ଦ୍ୱାରା କରାଯାଇଥିଲା, ଯାହା ପାଇଁ ସେ ସମସ୍ତଙ୍କର ପ୍ରଶଂସାର ପାତ୍ର ହୋଇଥିଲେ।