07-Nov-2025

ବିନିକା(ହିମାଂଶୁ ଶେଖର ପୁଟେଲ)୧୭୮୩ମସିହାରେ ବିନିକାର ଦୟାନିଧି ସାହୁ ନାମକ ଜଣେ ବ୍ୟକ୍ତି କଂସାବାସନ ବ୍ୟବସାୟ ପାଇଁ ମହାନଦୀରେ ନୌକା ସହାୟତାରେ ସୁଦୂର କଟକ ଯାଉଥିଲେ।ସାତକୋସିଆ ଗଣ୍ଡ ଠାରେ ଏକ ବାଡ଼ି ପାଇଲେ ।ସେହି ବାଡିକୁ ନଦୀ ଗର୍ଭକୁ ଫିଙ୍ଗିଲେ ହେଲେ ତାହା ବୁଡିଲା ନାହିଁ ବରଂ ଭାସମାନ ଅବସ୍ଥାରେ ତାଙ୍କ ନିକଟକୁ ଚାଲି ଆସିଲା ।ଅନେକ ଥର ଫିଙ୍ଗିଲା ପରେ ବି ବାଡ଼ିଟି ପାଖକୁ ଆସୁଥିବାରୁ ବାଡ଼ିର କିଛି ମହତ୍ତ୍ଵ ରହିଛି ବୋଲି ଭାବି ସେହିଠାରୁ ଘରକୁ ଫେରି ଆସି ନିଜ ଚାଲ ଛପର ଘରେ ରଖି ପୂଜାର୍ଚ୍ଚନା କଲେ ।ପଡ଼ାବାସି ମଧ୍ୟ ସହଯୋଗ କଲେ ପରେ ତାଙ୍କର ପୁତ୍ର କୃଷ୍ଣଚନ୍ଦ୍ର ସାହୁ ବାଡ଼ିର ମହତ୍ତ୍ଵକୁ ନେଇ ବିଚାର ବିମର୍ଶ କରିବା ପରେ ସେହି ଦିନ ଠାରୁ ଗୋକୁଳାଷ୍ଟମୀ ନାଁରେ ଲୀଳା ନାଟକ ଆରମ୍ଭ କଲେ ଏଥିରେ ପଡ଼ାବାସୀ ସମ୍ପୂର୍ଣ୍ଣ ସହଯୋଗ କରି ବାଡିକୁ ମାନିଲେ ।ବାଡ଼ିକୁ ରୀତିନୀତି ଅନୁଯାୟୀ ପୂଜାର୍ଚ୍ଚନା ସହ ଏହାର ନିଷ୍ଟା,ତ୍ୟାଗ ପାଳନ  କଲେ ।ଲୀଳା ନାଟକ ମଧ୍ୟ ଧୀରେ ଧୀରେ ବଢି ଏବେ ତାହା ଗୋକୁଳାଷ୍ଟମୀ ମହୋତ୍ସବରେ ପରିଣତ ହୋଇଛି ବୋଲି ବିନିକା ସ୍ପୋର୍ଟସ କ୍ଲବ ଠାରେ ଶୁକ୍ରବାର ଅନୁଷ୍ଟିତ ସାମ୍ବାଦିକ ସମ୍ମିଳନୀରେ ଯାତ୍ରା କମିଟି ସଭାପତି ତଥା ଗୁରୁ ମନୋଜ ଦାସ ସୂଚନା ଦେଇଛନ୍ତି।ସେ ଆହୁରି କହିଥିଲେ ଯେ ବିନିକା କଂଶାରିପଡ଼ା ବ୍ରଜବିହାରୀ ନୃତ୍ୟ କଳାପରିଷଦ ଓ ପୁଣ୍ୟମାସୀ ଯୁବକ ସଂଘ ଆନୁକୂଲ୍ୟରେ ଅନୁଷ୍ଟିତ ଏହି ଯାତ୍ରା ଅର୍ଥାତ ମହୋତ୍ସବ ଏଥର ୨୪୨ବର୍ଷରେ ପଦାର୍ପଣ କରିଛି ।ଚଳିତ ମାସ ୯ତାରିଖରୁ ୧୬ତାରିଖ ପର୍ଯ୍ୟନ୍ତ ଏହି ମହୋତ୍ସବ ଅନୁଷ୍ଟିତ ହେବ। ୯ତାରିଖରେ ଅଧିବାସ,୧୦ତାରିଖରେ କୃଷ୍ଣ ଜନ୍ମ,୧୧ରେ କୃଷ୍ଣ - ବଳରାମଙ୍କୁ ଗୋବର୍ଦ୍ଧନ ମଲ୍ଲଙ୍କ ଗୋଚାରଣ ବିଦ୍ୟା ପ୍ରଦାନ,୧୨ରେ କୃଷ୍ଣ- ବଳରାମଙ୍କ ବଣଗମନ,ଷଣ୍ଢାସୁର ବଧ,୧୩ରେ କଂସ ଦରବାର,ବକାସୁର ବଧ,୧୪ରେ ଦୋଳଲୀଳା,୧୫ରେ କଂସର ରଙ୍ଗସଭା,ଅର୍ଘାସୁର ବଧ,୧୬ରେ କୃଷ୍ଣ ବଳରାମଙ୍କ ନଗର ପରିକ୍ରମା ଓ କଲାମାଣିକ ଅନୁଷ୍ଠିତ ହେବ ।ବିନିକା ଦଧିବାମନ ମନ୍ଦିର ସମ୍ଭୁଖ ଗୋପପୁର ଏବଂ ଯୋଗେଶ୍ୱର ମନ୍ଦିର ବଣଦୁର୍ଗା ପ୍ରାଙ୍ଗଣ ମଥୁରା ନଗରୀ ଆଖ୍ୟା ଦିଆଯାଇଥିବା ଶ୍ରୀ ଦାସ ସୂଚନା ଦେଇଥିଲେ ।ଏଥିରେ କମିଟି ଉପଦେଷ୍ଟା ସୂର୍ଯ୍ୟ ନାରାୟଣ ଦାସ ଯୋଗଦେଇ ପ୍ରଚାର ପ୍ରସାରରେ ମିଡ଼ିଆ ବନ୍ଧୁ ମାନଙ୍କ ସହଯୋଗ ଯୋଗୁଁ ଏହି ଗୋକୁଲାଷ୍ଟମୀ ଲୀଳା ନାଟକରୁ ଯାତ୍ରା ପରେ ମହୋତ୍ସବରେ ପରିଣତ ହୋଇ ରାଜ୍ୟ ଓ ଦେଶରେ ପରିଚିତ ସୃଷ୍ଟି କଲାଣି।ସାଂସ୍କୃତିକ ସମ୍ପାଦକ ପଦ୍ମଲୋଚନ ସାହୁ(କାହ୍ନା) ମହୋତ୍ସବକୁ ଆକର୍ଷଣୀୟ କରିବା ନେଇ ରାଜ୍ୟର ବିଭିନ୍ନ ସ୍ଥାନରୁ କଳାକାର,ସଙ୍ଗୀତଜ୍ଞ ଆସୁଛନ୍ତି ବୋଲି କହିଥିଲେ ଶେଷରେ ଶୁଭମ ଦାସ ଧନ୍ୟବାଦ ଅର୍ପଣ କରିଥିଲେ।