16-Oct-2025

ବଲାଙ୍ଗୀର(ପ୍ରେରଣା ଖବର): ବଲାଙ୍ଗୀର ଜିଲ୍ଲା ଦେଓଗାଁ ଥାନା ଅଞ୍ଚଳରେ ଦିନକୁ ଦିନ ଅପରାଧିକ କାର୍ଯ୍ୟକଳପା ବଢିଚାଲିଛି । ବିଚରାସ୍ତାରେ ଲୁଟତରଜା ହେବା ସହ ଅପରାଧିଗୋଷ୍ଠୀ ଖଣ୍ଡା ବନ୍ଧୁକ ଧରି ଲୋକଙ୍କୁ ଭୟଭିତ କରୁଛନ୍ତି । ଗତ ଦୁଇଦିନ ତଳେ ଥାନାଠାରୁ ମାତ୍ର ୧କିମ ଦୂରରେ ଥିବା କଛାରପାଲି ଠାରେ ଜଣେ ବ୍ୟକ୍ତିକୁ ହତ୍ୟାକରିବାକୁ ହାତରେ ବନ୍ଧୁକ,ଖଣ୍ଡା ଧରିଖୋଜୁଥିଲେ ଓ ଗାଁଦାଣ୍ଡରେ ହୋଲ୍ଲାବୋଲ କରିଥିଲେ କିଛି ଅପରାଧିଗୋଷ୍ଠୀ । ୪ଟି ଗାଡିରେ ୧୨ଜଣ ଯୁବକ ମାରଣାସ୍ତ୍ର ଧରି ଏହି କାଣ୍ଡ କରିଥିଲେ । କିନ୍ତୁ ପୋଲିସ କିଛି ପଦକ୍ଷେପ ନେଇନଥିଲା । ବନ୍ଧୁକ ଓ ଖଣ୍ଡା ଧରି ଲୋକଙ୍କୁ ଅଶ୍ଲିଳଭାଷାରେ ଗାଳିଗୁଲଜ କରୁଥିବାର ଭିଡିଓ ଭାଇରାଲ ହେବାପରେ ବଲାଙ୍ଗୀର ଏସପିଙ୍କ ନିର୍ଦ୍ଦେଶରେ ପୋଲିସ ଏକ ମାମଲା ରୁଜୁ କରି ଗତକାଲି ଅପରାଧିମାନଙ୍କ ମଧ୍ୟରୁ ୫ଜଣଙ୍କୁ ଗିରଫ କରି କୋର୍ଟ ଚାଲାଣ କରିଥିଲା । ତେବେ ଏହି ଘଟଣା ପଛରେ ଜଣେ ବାଙ୍ଗଲାଦେଶୀ ରୋହିଙ୍ଗ୍ୟା ମିସ୍ତ୍ରୀ ସାନାଉଲ୍ଲା ଖାଁ ରହିଥିବା ଓ ସେ ଗତ କିଛି ବର୍ଷ ହେଲା ଦେଓଗାଁରେ ଘରକରି ରହି କିଛି ଅପରାଧିଙ୍କୁ ପରିଚାଳିତ କରୁଥିବା ଅଭିଯୋଗ ହେଉଛି । ଦେଓଗାଁ ଅଞ୍ଚଳରେ ଘଥକାମ ଠିକାରେ ନେଇ ସେଠାରେ ବାହାର ରାଜ୍ୟର ମିସ୍ତ୍ରୀ ନିୟୋଜିତ କରୁଛି ଓ ବିଭିନ୍ନ ସମୟରେ ଅସାମାଜିକ କାମରେ ଲିପ୍ତ ରହୁଥିବା ଅଭିଯୋଗ ହେଉଛି । ଗତ କିଛିଦିନ ତଳେ କଛାରପାଲିର ଗଜଲକ୍ଷ୍ମୀପୂଜା ପାଇଁ ଚାନ୍ଦାପାଇଁ ଯାଇଥିବା କ୍ଲବପିଲାଙ୍କ ସହିତ ବଚସା ହୋଇଥିଲା । ଏଥିପାଇଁ ସାନାଉଲ୍ଲା ଖାଁ ଅର୍ଡା ଗାଁର ତାଙ୍କର ଶଳା ଓ ଅନ୍ୟ କିଛି ଯୁବକଙ୍କୁ ଡକାଇ ବନ୍ଧୁକ ଓ ଖଣ୍ଡା ଧରି ଲୋକଙ୍କୁ ଭୟଭିତ କରାଇଥିଲା । ପୋଲିସ ସେହି ଘଟଣାରେ ସାନାଉଲ୍ଲା ଖାଁ ସମେତ ୫ଜଣଙ୍କୁ ଗିରଫ କରି ବୁଧବାର କୋର୍ଟ ଚାଲାଣ କରିଥିଲା । ତେବେ ବାହାର ଅଞ୍ଚଳରୁ ଆସି ଅପରାଧିକ ଗୋଷ୍ଠୀ ପରିଚାଳିତ କରୁଥିବାରୁ ଲୋକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି ଓ ଏହାର ପ୍ରତିବାଦରେ ଆଜି କଛାରପାଲିର ଯୁବକମାନେ ଦେଓଗାଁବନ୍ଦ ଡାକରା ଦେଇଥିଲେ । ଦେଓଗାଁରେ ଆଜି ସମସ୍ତ ଦୋକାନବଜାର ବନ୍ଦ ରହିଥିଲା । ସ୍ଥାନୀୟ ଲୋକେ ଏକ ଶୋଭାଯାତ୍ରା କରି ପୋଲିସ ଥାନାକୁ ଗଲା ବେଳେ ଦେଓଗାଁ ଥାନାଧିକାରୀ ବୁଲୁ ମୁଣ୍ଡା ଓଲଟା ଲୋକଙ୍କୁ ଦୁର୍ବ୍ୟବହାର କରିଥିବା ଅଭିଯୋଗ ହୋଇଛି । ସେମାନେ ଖଣ୍ଡା ବନ୍ଧୁକ ଧରିଥିଲେ ସିନା କାହାକୁ ହାଣିଲେ କି କାଟିଲେ କି ବୋଲି ଥାନାଧିକାରୀ ଦାୟିତ୍ୱହୀନ ମନ୍ତବ୍ୟ ଦେବାରୁ ଲୋକଙ୍କ ମଧ୍ୟରେ ଉତ୍ତେଜନା ପ୍ରକାଶ ପାଇଥିଲା । ଉତ୍ୟକ୍ତଜନତା ଦେଓଗାଁ ଥାନା ସମ୍ମୁଖରେ ଧାରଣାରେ ବସି ପ୍ରତିବାଦ କରିଥିଲେ । ପୋଲିସ ସ୍ଥାନୀୟ ଅପରାଧିମାନଙ୍କ ସହିତ ସମ୍ପର୍କରଖି ସାଧାରଣ ଜନତାଙ୍କୁ ନାଲିଆଖି ଦେଖାଉଥିବା ଜନସାଧାରଣ ଅଭିଯୋଗ କରିଛନ୍ତି । ବଲାଙ୍ଗୀର ଏସପି ତୁରନ୍ତ ଏଦିଗରେ ପଦକ୍ଷେପ ନେବାକୁ ଜନସାଧାରଣରେ ଦାବି ହେଉଛି । ଏନେଇ ବଲାଙ୍ଗୀର ସଦର ଏସଡିପିଓ ସରୋଜକୁମାର ଉପାଧ୍ୟାୟଙ୍କୁ ପଚାରିବାରୁ ଗତକାଲି କିଛି ଅଭିଯୁକ୍ତଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି ଓ ଆଉ ଅନ୍ୟ ଅଭିଯୁକ୍ତଙ୍କୁ ଖୁବଶୀଘ୍ର ଧରାଯିବ ବୋଲି କହିଛନ୍ତି ।