13-Oct-2025

ତୁଷୁରା (ପଞ୍ଚାନନ ନାଏକ) ବଲାଙ୍ଗୀର ଜିଲ୍ଲାର ତୁଷୁରା ଏନଏସିର ସଭାଗୃହରେ ରବିବାର ଶିକେରପାଟ୍ ମହୋତ୍ସବ ୨୦୨୫–୨୬ କମିଟି, ଖଡଙ୍ଗା ଅଞ୍ଚଳ ପକ୍ଷରୁ ଏକ ସାମ୍ବାଦିକ ସମ୍ମିଳନୀ ଅନୁଷ୍ଠିତ ହୋଇ ଯାଇଛି। କମିଟିର ସମ୍ପାଦକ ଶ୍ରୀ ଲମ୍ବୋଦର ମନହିରା ଅଧ୍ୟକ୍ଷତା କରିଥିବା ବେଳେ ଆସନ୍ତା ୨୫ ଡିସେମ୍ବର ରୁ ୨୯ ଡିସେମ୍ବର ୨୦୨୫ ପର୍ଯ୍ୟନ୍ତ ମୋଟ ୫ ଦିନ ଧରି ଶିକେରପାଟ୍ ମହୋତ୍ସବ ଗୁଡଭେଲାବ୍ଲକ ଅନ୍ତର୍ଗତ ଘୁନା କୁମ୍ଭାରପଦର ଖେଳପଡିଆ ଆଯୋଜିତ ହେବାର କାର୍ଯ୍ୟକ୍ରମ ରହିଥିବା ଆଯୋଜକ କମିଟି ପକ୍ଷରୁ ସୂଚନା ପ୍ରଦାନ କରାଯାଇଥିଲା। ଗୁଡଭେଲା ବ୍ଲକର ଘୁନା, ବିରାମୁଣ୍ଡା, ଜାମୁଟ ଓ ଗମ୍ଭାରିଗୁଡା ଗ୍ରାମପଞ୍ଚାୟତର ସମସ୍ତ ଜନସାଧାରଣଙ୍କ ଇଷ୍ଟଦେବତା ହେଉଛନ୍ତି ପ୍ରଭୁ ଶିକେରପାଟ୍। ପ୍ରତ୍ୟେକ ଶୁଭ କାର୍ଯ୍ୟ ପୂର୍ବରୁ ଶିକେରପାଟ୍ ନାମ ଉଚ୍ଚାରଣ ହେଉଛି ଏଠାର ଆଞ୍ଚଳିକ ପରମ୍ପରା। ଏହି ଆଦିପରମ୍ପରାକୁ ଅବିକଳ ରଖିବା ଓ ଅଞ୍ଚଳର ଏକତା ସୂତ୍ରକୁ ଶକ୍ତିଶାଳୀ କରିବା ଉଦ୍ଦେଶ୍ୟରେ ଏହି ମହୋତ୍ସବ ପାଳନ କରାଯାଉଥିବା ବେଳେ ଏହି ଖଡଙ୍ଗା ଅଞ୍ଚଳରେ ୪ ଗ୍ରାମପଞ୍ଚାୟତ ଓ ୩୨ ମୌଜା ରହିଛି। ଏହି ଭୂଖଣ୍ଡ ପୂର୍ବରେ ଖଡଙ୍ଗ ନଦୀ, ପଶ୍ଚିମରେ ରାହୁଲ, ଉତ୍ତରରେ ତେଳ ଓ ଦକ୍ଷିଣରେ କାଳୀ ଗଙ୍ଗାଜୋର ନଦୀ ଦ୍ୱାରା ପରିବେଷ୍ଟିତ। ପ୍ରାୟ ୨୫,୦୦୦  ଏକର ଭୂଭାଗରେ ଏହି ଅଞ୍ଚଳ ଅବସ୍ଥିତ ଥିବାରୁ ଏହା ଏକ ବିଶାଳ ସଂସ୍କୃତିକ ଏକକ ଭାବେ ପରିଚିତ। ପ୍ରଭୁ ଶିକେରପାଟଙ୍କ ବାର୍ଷିକ ଯାତ୍ରା ପ୍ରତିବର୍ଷ ଦୁଇଥର— ଆଷାଢ଼ ଓ ପୌଷ ଶୁକ୍ଳ ପକ୍ଷ ଦ୍ୱିତୀୟା ତିଥିରେ— ପାଳନ ହୋଇ ଥାଏ । ମହୋତ୍ସବରେ ସ୍ଥାନୀୟ ଓ ଆଞ୍ଚଳିକ କଳାକାରଙ୍କ ପାଇଁ ମଞ୍ଚ ସୃଷ୍ଟି କରାଯିବ । ଏହାସହିତ ଓଡ଼ିଶା ସରକାରଙ୍କ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ବିଭାଗ ର ସହଯୋଗରେ ଜିଲ୍ଲା ଓ ରାଜ୍ୟ ଅଞ୍ଚଳର ସାଂସ୍କୃତିକ ଦଳ ଅଂଶଗ୍ରହଣ କରିବେ। ସେହିପରି, କେନ୍ଦ୍ର ସଂସ୍କୃତି ବିଭାଗର ସହଯୋଗରେ ରାଜ୍ୟବାହାରର ଦଳ ମଧ୍ୟ ଅଂଶଗ୍ରହଣ କରିବେ।ଲୋକମାନଙ୍କ ସାଂସ୍କୃତିକ ଓ ଆର୍ଥିକ ରୁଚି ପୂରଣ ପାଇଁ ମୀନାବଜାର ଓ ପଲ୍ଲିଶ୍ରୀ ମେଳା ଆୟୋଜନ କରାଯିବ ।  ମାଗଣା ଚିକିତ୍ସା ଶିବିର, ସ୍ୱେଚ୍ଛାକୃତ ରକ୍ତଦାନ ଶିବିର, ଓ ଛାତ୍ରଛାତ୍ରୀଙ୍କ ପାଇଁ ବିଭିନ୍ନ ପ୍ରତିଯୋଗିତା ଆୟୋଜନ କରାଯିବ ବୋଳି ଆଯୋଜକ ସାମ୍ବାଦିକ ସମ୍ମିଳନୀରେ ପ୍ରକାଶ କରିଥିଲେ ।ଏହି ସାମ୍ବାଦିକ ସମ୍ମିଳନୀରେ ଭାଗବତ ନାହାକ, ଧୁବଳେଶ୍ବର ସାହୁ,ଦାଶରଥି ପଧାନ,ଲକ୍ଷ୍ମଣ ସାହୁ,ଚିନ୍ତାମଣି ରଣା,ନାରାୟଣ ଦାସ,ହାଡୁ ବଗର୍ତ୍ତୀ,ଖୁସିରାମ ଭୋଇ,ଦୀଲିପ ଭୋଇ,ରଞ୍ଜନ ମହାକୁର,ରାମଚନ୍ଦ୍ର ରଣା ଉପସ୍ଥିତ ଥିବା ବେଳେ ଧନ୍ୟବାଦ ଅର୍ପଣ କରିଥିଲେ ।