28-Jan-2021

ଆଗଲପୁର:(ଦେବାଶିଷ ପଧାନ): ବଲାଙ୍ଗୀର ଜିଲ୍ଲା ଆଗଲପୁର ବ୍ଲକ ଅନ୍ତର୍ଗତ ଭରସୁଜା ପଞ୍ଚାୟତର ବିନ୍ଧାପାଲି କଲ୍ୟାଣମଣ୍ଡପ ଠାରେ ଭିନ୍ନକ୍ଷମ ସାମର୍ଥ୍ୟ ଶିବିର ଅନୁଷ୍ଠିତ ହୋଇଯାଇଛି l ମୁଖ୍ୟଅତିଥି ଭାବରେ ଲୋଇସିଂହା ବିଧାୟକ ଡ.ମୁକେଶ ମହାଲିଙ୍ଗ ଯୋଗଦେଇ ଏହି ଶିବିରକୁ ଉଦଘାଟନ କରିଥିଲେ ଓ ପ୍ରତି ୩ ମାସରେ ଥରେ ଏହିପରି ଶିବିର ଆୟୋଜନ କରିବା ପାଇଁ ବିଭାଗୀୟ ଅଧିକାରୀ ମାନଙ୍କୁ ଅନୁରୋଧ କରିଥିଲେ l ସମ୍ମାନିତ ଅତିଥି ଭାବରେ ଆଗଲପୁର ବ୍ଲକ ଉପାଧ୍ୟକ୍ଷ ମୋନମୋହନ ପଟେଲ ଯୋଗ ଦେଇଥିଲେ l ଭରସୁଜା ସରପଞ୍ଚ ଗଣେଶ କୁମାର ସାହୁଙ୍କ ସଭାପତିତ୍ୱରେ ଅନୁଷ୍ଠିତ ଶିବିରରେ ଭରସୁଜା ଗ୍ରାମପଞ୍ଚାୟତ ଓ ବ୍ଲକର ଅନ୍ୟ ପଞ୍ଚାୟତ ମାନଙ୍କରୁ ପ୍ରାୟ 200ରୁ ଅଧିକ ଭିନ୍ନକ୍ଷମ ବ୍ୟକ୍ତି ଯୋଗ ଦେଇଥିଲେ l ଶିବିରରେ ମଧୁବାବୁ ପେନସନ ଯୋଜନା, ବିଧବା ଭତ୍ତା, ଛାତ୍ରଛାତ୍ରୀ ମାନଙ୍କୁ ବାଣିଶ୍ରୀ ଯୋଜନା, ବସ୍ ପାସ, ଡି.ଆର୍.ଆଇ ଲୋନ, ହୁଇଲଚେୟାର ଓ ଅନ୍ୟ ଉପକରଣ ଗୁଡିକ ବଣ୍ଟନ କରାଯଇଥିଲା l

 ଦୁଷ୍ଟିବାଧିତ ୩୧ ଜଣ ମାନସିକ ଅନଗ୍ରସର, ୧୭ ଜଣ ଶାରୀରିକ ଭିନ୍ନକ୍ଷମ, 34 ଜଣ ଶ୍ରବଣ ବାଧିତ, ଏହିପରି ପ୍ରାୟ ୨୧ ପ୍ରକାର ଭିନ୍ନକ୍ଷମ ମାନଙ୍କୁ ସମସ୍ତ ବିଭାଗର ଡାକ୍ତର ମାନେ ଆସି ପରୀକ୍ଷା କରି ପ୍ରମାଣପତ୍ର ଦେଇଥିଲେ l ବଲାଙ୍ଗୀର ଜିଲ୍ଲା ଡି.ଏସ୍. ଓ. ନବକିଶୋର ସାହୁ ଭିନ୍ନକ୍ଷମ ବ୍ୟକ୍ତିର ଅଧିକାର ଓ ସହାୟତା ବିଷୟରେ ସମ୍ୟକ ଭାବରେ ବୁଝାଇଥିଲେ  l ତହସିଲଦାର ସନ୍ତୋଷ କୁମାର ଦାସ, ସମିର ଦିବ୍ୟାଙ୍ଗ ଟ୍ରଷ୍ଟର ପ୍ରତିଷ୍ଠାତା କୀର୍ତ୍ତନ ଦାସ, ବଲାଙ୍ଗୀର ନିରତାର କେନ୍ଦ୍ରର ଅଧିକାରୀ ଉପସ୍ଥିତ ଥିଲେ l  ସଭାକୁ ବ୍ଲକ ସାମାଜିକ ସୁରକ୍ଷା ଅଧିକାରୀ ଆଶା ପଧାନ ପ୍ରତ୍ୟକ୍ଷ ଭାବରେ ତଦାରଖ କରି ଥିଲେ l ଭରସୁଜା ପଞ୍ଚାୟତର ସମସ୍ତ ଶିକ୍ଷକ,ଅଙ୍ଗନୱାଡି କର୍ମୀ,ଆଶା କର୍ମୀ, ସହଯୋଗ କରିଥିଲେ l ଆଗଲପୁର ମାହେଶ୍ୱରୀ ସ୍ବେଛାସେବୀ ସଂଗଠନର କର୍ମକର୍ତ୍ତା ମାନେ ବିଶେଷ ସହଯୋଗ କରିଥିଲେ l ଶେଷରେ କୋରନା ଯୋଦ୍ଧା ଭାବରେ ଅଙ୍ଗନୱାଡି, ଆଶା କର୍ମୀ  ମାନଙ୍କୁ ମାନପତ୍ର ଦେଇ ଅତିଥି ମାନେ ସମ୍ବର୍ଦ୍ଧିତ କରିଥିଲେ