12-Aug-2025

ବରପାଲି (ସୁଦାମ ଦୀପ)
ବରପାଲି ମହାବିଦ୍ୟାଳୟରେ ସ୍ଵଭାବ  କବି ଗଙ୍ଗାଧର ମେହେରଙ୍କ ପବିତ୍ର ଜୟନ୍ତୀ ଉତ୍ସବ ମହାସମାରୋହରେ ପାଳିତ ହୋଇଯାଇଛି। ଏଥିରେ ସଭାପତିତ୍ଵ କରିଥିଲେ ଅଧ୍ୟକ୍ଷା ଜୟନ୍ତୀ ଦାଶ। ଅତିଥିମାନଙ୍କ ଦ୍ଵାରା ଦୀପ ପ୍ରଜ୍ଜ୍ୱଳନ ପରେ ଛାତ୍ରଛାତ୍ରୀମାନେ ସୁମଧୁର ସ୍ୱରରେ ଗଙ୍ଗାଧର ସଙ୍ଗୀତ ଗାନ କରିଥିଲେ। ଅଧ୍ୟକ୍ଷାଙ୍କ ସ୍ୱାଗତ ସମ୍ଭାଷଣ ପରେ ଡ. ବିଶ୍ଵନାଥ ସାହୁ ଅତିଥିଙ୍କ ପରିଚୟ ପ୍ରଦାନ କରିଥିଲେ।  ପ୍ରାଧ୍ୟାପକ ସୁଶୀଳ କୁମାର ଶତପଥୀ ଅତିଥିମାନଙ୍କୁ ଉପଢ଼ୌକନ ପ୍ରଦାନ କରିଥିଲେ। ମୁଖ୍ୟବକ୍ତା ଭାବରେ ଯୋଗଦେଇଥିଲେ ଅଧ୍ୟାପକ ଗୋପାଳକୃଷ୍ଣ ମିଶ୍ର।  ସେ ନିଜ ବକ୍ତବ୍ୟରେ ଗଙ୍ଗାଧର କିପରି ବିଶ୍ଵକବିର ମାନ୍ୟତା ପାଇବାକୁ ଯୋଗ୍ୟ ସେ ବିଷୟରେ ଆଲୋକପାତ କରିଥିଲେ। ମୁଖ୍ୟ ଅତିଥି ଡ. ଉମାଶଙ୍କର ଦାଶ, ଆଞ୍ଚଳିକ ଶିକ୍ଷା ନିର୍ଦ୍ଦେଶକ, ସମ୍ବଲପୁର ଗଙ୍ଗାଧରଙ୍କୁ ଜଣେ ପୂର୍ଣ୍ଣକବି ବୋଲି ଅଭିହିତ କରିଥିଲେ।  ସଂସ୍କୃତ କାବ୍ୟାନୁଯାୟୀ ଜଣେ କବିଙ୍କୁ ପୂର୍ଣ୍ଣକବି ହେବାରେ ଯେଉଁସବୁ ଦକ୍ଷତା ଆବଶ୍ୟକ ତାହା ସ୍ଵଭାବ କବିଙ୍କ ପାଖରେ ରହିଛି ବୋଲି ସେ ଦୃଷ୍ଟାନ୍ତ ସହ ଆଲୋଚନା କରିଥିଲେ। ଜଣେ ପରିବେଶପ୍ରେମୀ ଭାବରେ ଏନ୍ଏସ୍ଏସ୍ ପ୍ରୋଗ୍ରାମ ଅଫିସର ଅଧ୍ୟାପକ ଭକ୍ତବନ୍ଧୁ ପ୍ରଧାନଙ୍କ ପ୍ରତ୍ୟକ୍ଷ ତତ୍ତ୍ଵାବଧାନରେ ସେ ମହାବିଦ୍ୟାଳୟ ପରିସରରେ ବୃକ୍ଷରୋପଣ ମଧ୍ୟ କରିଥିଲେ | ଏହାପରେ ଜୟନ୍ତୀ ଉପଲକ୍ଷେ ଅନୁଷ୍ଠିତ ବିଭିନ୍ନ ପ୍ରତିଯୋଗିତାରେ ବିଜିତ ଛାତ୍ରଛାତ୍ରୀଙ୍କୁ ପୁରସ୍କାର ପ୍ରଦାନ କରାଯାଇଥିଲା। ଏଥିରେ ସହଯୋଗ କରିଥିଲେ ଡ. ନୀଲମ ଦେବତା, ଗଣେଶ ମିଶ୍ର, ଅଧ୍ୟାପିକା ଦେବାଙ୍ଗିନୀ ସାହୁ ପ୍ରମୁଖ। ଏହି ଅବସରରେ ମହାବିଦ୍ୟାଳୟରେ ସର୍ବୋଚ୍ଚ ନମ୍ବର ରଖି ଉତ୍ତୀର୍ଣ୍ଣ ହୋଇଥିବା ଯୁକ୍ତତିନିର କୃତି ଛାତ୍ରୀ ମାନସୀ ବେହେରାଙ୍କୁ ଅର୍ଥ ଓ ଉପଢୌକନ ଦେଇ ସମ୍ମାନିତ କରାଯାଇଥିଲା | ଅଧ୍ୟାପକ ଉତ୍ତର କୁମାର ଗଡ଼ତିଆ ସଭାକୁ ସଂଯୋଜନା କରିଥିବାବେଳେ ଧନ୍ୟବାଦ ଅର୍ପଣ କରିଥିଲେ ଡ. ସମ୍ବିତା ପ୍ରଧାନ | ସହଯୋଗ କରିଥିଲେ ଅଧ୍ୟାପକ ଧିରୋଜ ତ୍ରିପାଠୀ, ଅରୁଣ କୁମାର ବାରିକ, ଅଲେଖ ମହାନନ୍ଦ, ଗୌରଚନ୍ଦ୍ର ପଧାନ, ଅଶୋକ ପଧାନ, ଭଗବାନ ମହାନନ୍ଦ, ବିଜୟ ମିଶ୍ର, ବିଭୁ ମହାନ୍ତି ପ୍ରମୁଖ ।