12-Aug-2025

ଭୀମପାହାଡ ପାଇଁ ୧୦କୋଟି ଓ ଚାନ୍ଦଲିପାହାଡ ପାଇଁ ୧୫କୋଟି ଟଙ୍କାର ଅନୁଦାନ ଦାବି

ବଲାଙ୍ଗୀର,-ଉପମୁଖ୍ୟମନ୍ତ୍ରୀ ତଥା ପର୍ଯ୍ୟଟନ,ମହିଳା ଓ ଶିଶୁକଲ୍ୟାଣ ବିଭାଗର ମନ୍ତ୍ରୀ ଶ୍ରୀମତୀ ପ୍ରଭାତୀ ପରିଡାଙ୍କ ବଲାଙ୍ଗୀର ଗସ୍ତର ଆଜି ଶେଷଦିନ ଥିଲା । ସ୍ଥାନୀୟ ସର୍କିଟ ହାଉସଠାରେ ଆଜି ସକାଳୁ ଦେଓଗାଁ ବ୍ଲକର ଭୀମପାହାଡ ଓ ଚାନ୍ଦଲି ମହୋତ୍ସବ କମିଟିର ଏକ ପ୍ରତିନିଧିଦଳ ଉପମୁଖ୍ୟମନ୍ତ୍ରୀ ଶ୍ରୀମତୀ ପରିଡାଙ୍କୁ ଭେଟି ଆଲୋଚନା କରିବା ସହିତ ଅନୁଦାନ ପାଇଁ ଏକ ଦାବିପତ୍ର ପ୍ରଦାନ କରିଛନ୍ତି । ସେଥିରେ ଭୀମପାହାଡ ପର୍ଯ୍ୟଟନସ୍ଥଳୀର ବିକାଶ ପାଇଁ ୧୦କୋଟି ଟଙ୍କା ଓ ଚାନ୍ଦଲିପାହାଡର ପର୍ଯ୍ୟଟନସ୍ଥଳୀର ବିକାଶ ପାଇଁ ୧୫କୋଟି ଟଙ୍କାର ଅନୁଦାନ ଦେବାକୁ ଦାବି କରାଯାଇଛି । ମହୋତ୍ସବକମିଟିର ଅଧ୍ୟକ୍ଷ ତଥା ଦେଓଗାଁ ବ୍ଲକର ପୂର୍ବଅଧ୍ୟକ୍ଷ ଲକ୍ଷ୍ମଣକୁମାର ମେହେରଙ୍କ ନେତୃତ୍ୱରେ ଆସିଥିବା ଏହି କମିଟିରେ ଭୀମପାହାଡ ମହୋତ୍ସବ କମିଟିର ସଭାପତି ପ୍ରମୋଦ ବହିଦାର,ସଂପାଦକ ଗୋବର୍ଦ୍ଧନ ସାହୁ,କୋଷାଧ୍ୟକ୍ଷ ଅଭିମନ୍ୟୁ ମାଝୀ,ମକୁନ୍ଦପୁର ସରପଞ୍ଚ ଜାନକି ସାହୁ,ନନ୍ଦକିଶୋର ନାଏକ,ଚାନ୍ଦଲି ମହୋତ୍ସବ କମିଟିର ଘାସିରାମ ରଣା,ପ୍ରଦ୍ୟୁମ୍ନ ଷଢଙ୍ଗୀ,ଜ୍ୟୋତ୍ସ୍ନା ନାଏକ,ରାଜୁ ମେହେର ପ୍ରମୁଖଙ୍କ ସହିତ ଅନ୍ୟାନ୍ୟ ବ୍ୟକ୍ତି ବିଶେଷ ଯୋଗଦେଇ ଉପମୁଖ୍ୟମନ୍ତ୍ରୀଙ୍କୁ ଭେଟି ଆଲୋଚନା କରିଥିଲେ । ଚାନ୍ଦଲିପାହାଡକୁ ମୋହନ ସରକାର ପର୍ଯ୍ୟଟନସ୍ଥଳିର ମାନ୍ୟତା ଦେଇଥିବାରୁ କମିଟି ପକ୍ଷରୁ ଉପମୁଖ୍ୟମନ୍ତ୍ରୀ ତଥା ପର୍ଯ୍ୟଟନମନ୍ତ୍ରୀ ଶ୍ରୀମତୀ ପରିଡାଙ୍କୁ ଧନ୍ୟବାଦ ଜ୍ଞାପନ କରାଯାଇଥିଲା । କମିଟି ଦାବି କରିଛି ଯେ,ଭୀମପାହାଡ ପର୍ଯ୍ୟଟନସ୍ଥଳିରେ ଏପର୍ଯ୍ୟନ୍ତ ୯କୋଟିରୁ ଉର୍ଦ୍ଧ୍ୱ ଟଙ୍କାର ଅନୁଦାନ ଆସି ଖର୍ଚ୍ଚ ଚାଲିଛି । ଆହୁରି କାମ ବାକି ରହିଛି । ସେଥିପାଇଁ ଆଉ ୧୦କୋଟି ଟଙ୍କାର ଅନୁଦାନର ଆବଶ୍ୟକତା ରହିଛି । ଠିକ ସେହିପରି ଦେଷଣ୍ଢ ନିକଟସ୍ଥ ଚାନ୍ଦଲିପାହାଡ ପର୍ଯ୍ୟଟନସ୍ଥଳୀରେ ପୂର୍ବସରକାର ଦେଇଥିବା ୧କୋଟି ଟଙ୍କାର କାମ ଚାଲିଛି । ଚାନ୍ଦଲି ନିକଟସ୍ଥ ଭୁଲିଆକଟାର ପୁନଃରୁଦ୍ଧାର ପାଇଁ ପ୍ରଶାସନ ପକ୍ଷରୁ ୬କୋଟି ୭୨ଲକ୍ଷ ଟଙ୍କାର ଡିପିଆର ସରକାରଙ୍କୁ ପଠାଯାଇଛି । ସେହିପରି ଚାନ୍ଦଲିର ବିକାଶ ପାଇଁ ଆଉ ୧୦କୋଟି ଟଙ୍କାର ଡିପିଆର ପ୍ରସ୍ତୁତ ହୋଇଛି । ତେଣୁ ଏହାର ବିକାଶ ପାଇଁ ୧୫କୋଟି ଟଙ୍କାର ଅନୁଦାନ ପ୍ରଦାନ କରାଯିବାକୁ ଉପମୁଖ୍ୟମନ୍ତ୍ରୀଙ୍କ ପାଖରେ ଦାବି ରଖାଯାଇଛି । ଓଡିଶାର ବିଭିନ୍ନ ପର୍ଯ୍ୟଟନସ୍ଥଳିର ବିକାଶ ପାଇଁ ରାଜ୍ୟସରକାର ସଂକଲ୍ପ ନେଇଛନ୍ତି । ସେହିକ୍ରମରେ ଏହି ପର୍ଯ୍ୟଟନସ୍ଥଳୀମାନଙ୍କୁ ମଧ୍ୟ ଅନୁଦାନ ଦିଆଯିବ ବୋଲି ଉପମୁଖ୍ୟମନ୍ତ୍ରୀ ଶ୍ରୀମତୀ ପରିଡା ପ୍ରତିନିଧିଦଳଙ୍କୁ ପ୍ରତିଶୃତି ଦେଇଥିଲେ ।