11-Jul-2025

ନୂଆପଡା(ପରମେଶ୍ଵର ମେହେର): ଓଡିଶା ଡ୍ରାଇଭର ମହାସଂଘର ନିର୍ଦ୍ଦେଶ କ୍ରମେ ୭ ଦଫା ଦାବି ନେଇ ନୂଆପଡା ଜିଲ୍ଲା ସିନାପାଲି ବ୍ଲକର ଡ୍ରାଇଭର ସଙ୍ଘ ଷ୍ଟିୟରିଂ ଛାଡ ଆନ୍ଦୋଳନକୁ ଓହ୍ଲାଇଛନ୍ତି | ଆଜି ତୃତୀୟ ଦିନରେ ଡ୍ରାଇଭର ସଂଘର ସଦସ୍ୟ ମାନେ ଏକତ୍ରିତ ହୋଇ ସିନାପାଲି ଫୋର ୱେ ଯୁଗେନପଦର ଛକ ନିକଟରେ ଆନ୍ଦୋଳନରେ ବସିଛନ୍ତି |  ସିନାପାଲିରୁ କଳାହାଣ୍ଡି ଜିଲ୍ଲା ଓ ବୋଡ଼େନ-ନୂଆପଡ଼ା ସଦର ମହକୁମା, ସିନାପାଲି ଠାରୁ ଛତିଶଗଡକୁ ଯୋଗାଯୋଗ କରୁଥିବା ରାସ୍ତାରେ ଯାନବାହାନ ଚଲାଚଳ ବନ୍ଦ ରହିଥିଲା। ଫଳରେ ଜନସାଧାରଣ  ନାହିଁ ନ ଥିବା ଅସୁବିଧାର ସମ୍ମୁଖୀନ ହୋଇଥିଲେ। ଏହି ୭ ଦଫା ଦାବୀ ପୂରଣ ନ ହେବା ଯାଏଁ ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ ଆନ୍ଦୋଳନ ଜାରୀ ରହିବ ବୋଲି ଡ୍ରାଇଭର ସଂଘ ପକ୍ଷରୁ ଚେତାବନୀ ଦିଆ ଯାଇଛି । ଏହି ୭ ଦଫା ମଧ୍ୟରୁ ୬୦ ବର୍ଷର ଡ୍ରାଇଭରଙ୍କୁ ପେନସନ ପ୍ରଦାନ, ଟ୍ୟାକ୍ସି ଅଟୋ ଡ୍ରାଇଭରଙ୍କୁ ଡ୍ରାଇଭର ଜନ କଲ୍ୟାଣ ବୋର୍ଡରେ ସାମିଲ କରିବା, ପ୍ରତିବର୍ଷ ସେପ୍ଟେମ୍ବର ୧ ତାରିଖକୁ ଡ୍ରାଇଭର ଦିବସ ଭାବେ ପାଳନ କରିବା, ପୋଲିସର ଗାଡ଼ି ଚେକିଂ କ୍ଷମତାକୁ ବନ୍ଦ କରିବା ସମେତ ଅନେକ ଦାବୀ ନେଇ ଆନ୍ଦୋଳନକୁ ଡ୍ରାଇଭର ସଂଘ ଓହ୍ଲାଇଛନ୍ତି | ଏହି ଆନ୍ଦୋଳନରେ ସଭାପତି ଜିତେନ୍ଦ୍ର ପାତ୍ର, ବୁଲୁ ପଟେଲ, ଗଗନ ବିହାରୀ ଖଣ୍ଡାୟତ, ଗୋବିନ୍ଦ ବାଗ, ସିଧୁ ମାଳି, ପବିତ୍ର ରାଉତ, ଧନୀରାମ ମାଝି, ପ୍ୟାରିଲାଲ ବାଗ, ଉପେନ୍ଦ୍ର ପ୍ରଧାନ, ଲଳିତ ଜଗତ, ପର୍ଶୁରାମ ବାଗ , କୃଷ୍ଣଚନ୍ଦ୍ର ହଂସ, ଛବିଲାଲ ମାଝି ସମେତ ଅନେକ ଆନ୍ଦୋଳନରେ ସାମିଲ ରହିଛନ୍ତି।